MARKUS 4

1Ma Jesus a liluut el mo olisechakl er a bita er a Daob er a Galilea. Ma klou el seked er a re chad a mler ngii, me ng mlo doiderekl er a bos el mlar a daob e mo dengchokl er a chelsel, e tial klou el seked a di mlar a beluu el chemau a daob. 2Ma Jesus a ullisechakl er tir a betok el tekoi el olab okesiu me ng dilu el kmo, 3“Ka morrenges! Ng mlar ngii a tal chad el mlo omriid a tane. 4Me ser a lomriid a tane er a sers, e a bebil a rirebet er a rael ma suebek el charm a kilang. 5E a bebil er a tane a rirebet er a ngar ngii a risois er ngii el chutem el meliliut a chetemel, me ng di mle mereched el duubech ele ng mle meched a chetemel. 6E a bo le meringel a sils e ng meldul ele risel a dimlak le dolech er a chutem me ng mlo moalech. 7Ma bebil er a tane a rirebet er a deliul a tochedulik, me ng dilubech a tochedulik el obengkel e lmechet me ng dimlak lourodech. 8E a kuk bebil er a tane a rirebet er a ungil chutem me ng dilubech el mo meklou el ourodech el bebil a dersokedei, ma bebil a dersokolem, ma bebil a derdart.” 9Ma Jesus a mirrekui er a cheldechedechal el kmo, “Morrenges a le ngar ngii a dingemiu!” 10Ma bocha di le ngii el tang a Jesus, e a re bebil er tirkel ulerrenges er ngii a ulebengterir tirkel truich ma terung el obengkel el mer ngii e uleker a belkul a ikel okesiu. 11Me ng dilu er tir el kmo, “Kemiu a bla le rellemiu el mo medengei a bertelel a Rengedel a Dios, e ngdi tirkel bebil er a re chad el ngar a ikrel a mo orrenges a bek el tekoi el oeak okesiu. 12Misei, ‘e tomes el omes e diak a le ues, e orrenges el orrenges e diak a bo lodengei. Ele lak le ua isei e te mo obult el mor a Dios, e ngii a mo ousubes a kngterir.’” 13Ma Jesus a uleker er tir el kmo, “Kemiu ng diak mutebengii a belkul tial okesiu? E mekera e sebechiu el mo medengei a belkul a ikel bebil er a okesiu? 14Ngikel omriid a tane a omriid a tekingel a Dios. 15A re bebil er a re chad a ua ikel tane el rirebet er a tkul a rael, el sel le renges a tekingel a Dios e a Satan a mei el ngmai er tir. 16Ma re bebil er a re chad a ua ikel tane el rirebet er a ngar ngii a risois er ngii el chutem. Sel le rengesii a tekingel a Dios e ng mereched el mo dmeu a rengrir er ngii. 17Ngdi diak lungil el medalem er a rengrir me ng diak le meketeket el medechel, e a le bor ngii a ringel ma lechub e ng odechelakl el kirel a tekingel a Dios, e te di mereched el mo diak loltirakl a ikel loumerang. 18E a re bebil er a re chad a ua ikel tane el rirebet er a deliul a tochedulik el sel le renges a tekingel a Dios, 19e a chelsengul tial klengar, ma ngibes er a kerruul ma rokui el tametreng er a klechad a soiseb el lmechet a tekingel a Dios me ng di mo diak lourodech. 20E a re bebil er a re chad a ua tane el rirebet er a ungil chutem. Te remenges a tekingel a Dios e ngmai el dualem er a rengrir, me te mo ourodech el bebil a dersokedei, ma bebil a dersokolem, ma bebil a derdart.” 21Ma Jesus a dilu er tir el kmo, “Ng diak a chad el mekerdii olbidel e dongebii ma lechub e ng loia er eungel a dusall. Ng bai loia er olsechelel. 22A ikel berrotel a di mo chemolt, ma ikel delekedokel me ng diak lobart. 23Misei e morrenges a le ngar ngii a dingemiu!” 24E dirrek el dilu er tir el kmo, “Bo le blak a rengmiu el omtab a ikel morrenges! Sel olkael el mousbech er ngii el mor a re chad seikid a bo lousbech er ngii a Dios el ekor kemiu. 25Ngikel chad el ngar ngii a ngera er ngii a lluut el msa betok, e ngikel diak a ngera er ngii a lengai a ikel ngar ngii el mo lmuut er a ikel kmal di kesai el lolab.” 26Ma Jesus a liluut el dmu er tir el kmo, “A Rengedel a Dios a ua tal chad el omriid a tane er a sers. 27E a bek el kebesengei e ng mo bad e a bek el tutau e ng mekiis. Ma tane me ng dilubech el mo meklou, e ngdi ngii a dimlak lodengei el kmo, ng milekera e duubech el mo ua isei. 28Ele chutem a di ngii el mekdbechii a dellomel e mekdubech a redechel, a kot e ng duubech a tiul e ng bngal e ng mor ngii a betok el redechel. 29Ma bocha le meduch a rodech e a chad er a sers a nguu a kamelengel el mo meridm ele ng mla mo belsechel omeridm.” 30Ma Jesus a uleker el kmo, “A Rengedel a Dios ng ua ngerang? Ngera ungil el okesiu el knguu el omekesiu er ngii? 31Ng ua tiakid. A tal chad a ngiluu a tane er a meringel el kot el kekerei a tane er ngii el dellomel er a beluulchad el mo dolemii er a sersel. 32Ngii el dellomel a duubech e merael el mo klou e oltobed a meklou el rechelel ma suebek el charm a mo meruul a lukel er ngii.” 33Ma Jesus a ullisechakl er a osisecheklel el mor a re chad el olab a betok el okesiu el ua ikang, el di ikel sebechir el orrenges e mo medengei. 34Me ng di uluusbech el mengedecheduch er tir el olab okesiu. Ngdi ser a di bo le ngii ma rubengkel, e ng silaod a rokui el tekoi er tir. 35Ma bocha le kebesengei er tial osisiu el sils, e a Jesus a dilu er a rubengkel el kmo, “Mei me bo de iuul el mor a bitang.” 36Ma rubengkel a Jesus a milechititerir a re chad e mo doiderekl er a bos el le dilengchokl er ngii a Jesus me te dilak el merael. Ng mlar ngii a kuk bebil er a bos el mlar isei. 37E di mle mereched el mor ngii a kmal klou el oiu ma bos a mocha mesesecheseb. 38E a Jesus a milechiuaiu er uriul er a bos el ouchiull. Ma rubengkel a Jesus a mlo olekiis er ngii el kmo, “Sensei, ng diak momekerreu er kid a de mad?” 39Ma Jesus a mlo dechor e dilu el kmo, “Eolt, bo mchelellakl; chedesaoch, bo meiusech!” Me ng di mlo diak a eolt e mo meiusech. 40Ma Jesus a melekinga er a rubengkel el kmo, “Ngera me kom medakt? Kemiu ng diak moumerang?” 41Me te mlo medakt e mechas a rengrir, me te katekoi el kmo, “Ngikal chad ng kol techang el eolt ma chedesaoch orrenges er ngii?”

will be added

X\