MARKUS 3

1Ma Jesus a liluut el mor a blil ongdibel er a re chad er a Judea e a tal chitechut a chimal chad a mlar isei. 2E sola e mlar ngii a re bebil chad el mle sorir el osiik er a mo uchul e totuteklii a Jesus. Tulemdidm er ngii el kmo ng mo omekungil er ngikal chitechut a chimal chad er a Ulengull el Sils, ng diak. 3Ma Jesus a dilu er ngii el chad el kmo, “Bekiis el mei.” 4E sola e a Jesus a uleker er tirkal chad el kmo, “A doltirakl a Llach er kid, e ng ngera subed el doruul a le Ulengull el Sils? A doruul a ungil, ada doruul a mekngit? A dolsobel er a klengar er a chad, ada dolemall er ngii?” E ngdi tir a kmal di liluk, 5ma Jesus a ulemerk er osengel el mor tir el rokui el kesib a rengul, e ngdi dirrek el mlo chubteterir er a delecherecherel a rengrir. Me ng dilu er ngii el chad el kmo, “Mtemetii a chimam.” Me ng tilemetii a chimal me ng mlo ungil. 6Ma re Farisi a tilobed er a blil ongdibel e di mle mereched el mo katekoi tir ma re bebil el chedal a King Herodes er a kmo te mekera e mekodir a Jesus. 7E sola e a Jesus ma rubengkel a mirrael el mo bedul a Daob er a Galilea, e a klou el seked el mlar a Galilea ma Judea a mlei el uleltirakl er ngii, 8ma re mlar a Jerusalem, ma beluu er a Idumea, ma ongos er a Jordan ma beluu er a Tyre ma Sidon a mlei el me omes er a Jesus ele te rirenges a chisel a ikel tekoi el lurruul. 9Ma lesal klunga seked e a Jesus a dilu er a rubengkel me le kedmeklii a tar a bos el le bor ngii, me lak le motitech er a re chad. 10Te mle betok el chad a lulemekungil er tir er a rektir, me tirkel chilarm er a rektir a mle ketitech el sorir el mo rutechii a Jesus me bo lungil er a rektir. 11Me tirkel mlar ngii a mekngit el chelid er tir sel lesa Jesus, e te di mo blengkangk er medal e oldiu el klou a ngerir el kmo, “Kau a Ngelekel a Dios!” 12Ma Jesus a mle mesisiich el mengelechel a ikel mekngit el chelid me lak louchais el kmo ngii el Jesus ng techang. 13Ma Jesus a mlo ngmasech er a bukl e ulemekedong er tirkel ulebengkel el mor ngii, 14e ngililteterir a re truich ma terung el lulemekedong er tir el apostol. E dilu er tir el kmo, “Ak mla ngiltemiu el mo obengkek, e ak dirrek el mo oldurech er kemiu el mo tuobed el mo olisechakl, 15e meskemiu a klisiich el oltobed a mekngit el chelid.” 16Tirkakid tirkel truich ma terung el lullilt er tir, ng Simon (el lulengklii a Jesus el Petrus); 17ma Jakobus, el ngelekel a Sebedeus ma tar ngii er a Johanes, (el lulengklterir el Boanerkes, el belkul a kmo “re ngelekel a Derumk”); 18ma Andreas ma Filip ma Bartholomeus ma Mateus ma Thomas ma Jakobus el ngelekel a Alfeus, ma Thadeus ma Simon (el chedal a cheldebechel el Ngarablakerreng), 19ma Judas Iskariot el ngikel ulterur a Jesus. 20Uriul er itiang e a Jesus a mlor a blil. E liluut a seked el me mekideb ma Jesus ma rubengkel a mlo diak a techellir el omengur. 21E a re bebil er a re chad a kmo, “Ngika mla mo kebelung!” Ma le renges a re chad er a blil e te mlong el mo melai er ngii. 22Ma re bebil er a re sensei er a Llach el mlar a Jerusalem el mei a dilu el kmo, “Ngika ngar ngii er ngii a Beelsebul, el merreder a mekngit el chelid, e omsa klisiich el oltobed a mekngit el chelid.” 23Mitia e a Jesus a milekedongeterir el mei e milengedecheduch er a tal okesiu el mor tir el kmo, “Ng mekera Satan a loldik er a Satan? 24A lsekum a beluu a metiud e mo kautok, e sel beluu a di mereched el mo diak le beluu. 25Ma chimol telungalek el obii e mo kautok, a mo diak le cherrungel el telungalek. 26Ma lsekum a rengedel a Satan a metiud el mo betok el cheldebechel e kautok, e ng kmal diak bo le mesisiich, e bai mo nguemed. 27“Ng kmal diak a chad el melatk a mo soiseb el melai a klalo er a blil a mesisiich el chad a lak le kot el lochetii e bochu lolai a klalo er a chelsel a blil. 28“Mak kmal meral dmu er kemiu el kmo, a rokui el klengit el le ruul a re chad ma lolekoi el mekngit a sebechel a Dios el ousubes. 29Ngdi ngikel melekoi a mekngit el tekoi el omtok er a Chedaol Reng a mla mor a klengit el kmal diak le bo lousubes er ngii el mo cherechar.” 30(A Jesus a dillii tiang ele re bebil er a re chad a dilu el kmo, “Ng ngar ngii a mekngit el chelid er ngii.”) 31Ma le mermang a re tar a Jesus ma delal, e te di mle dechor er rikl e oldurech el mo oleker er ngii. 32Ele klou el seked a mle dengchokl el iliuekl er ngii, me te silbedii el kmo, “A delam ma re tar kau el sechal ma redil a ngar rikl el sorir el omes er kau.” 33Ma Jesus a dilu er tir el kmo, “Ng techa delak? Te rua techang a re tar ngak?” 34E ulemes el mor tirkal chad el dengchokl er bita er ngii e dilu el kmo, “Ka momes! Tirkakid a delak ma re tar ngak. 35Ngikel meruul a ikel soal a Dios ingikei a tar ngak e delak.”

will be added

X\