MARKUS 2

1Uriul er a kesai el klebesei e a Jesus a liluut el mor a Kapernaum, ma chisel a uleberk el kmo ng mla mer a blil. 2Me ng di mle mereched e a re betok el chad a mlei el sokedii a blai el mo lmuut er a medal a tuangel, ma Jesus a ullisechakl er tir. 3E mlar ngii a re teual chad el mle sorir el oba tal chitechut el chad el mor a Jesus. 4E ngdi kmal mle meseked me ng dimlak le sebechir el osisebii. Mitia e te ngiluu ngii el chad el ngmasech er bebul a blai el mor sel kirel a Jesus e oibekii a chado e oimimii ngii el chitechut el chad el ngar a dukllel. 5Ma Jesus er a lesengei el kmo te kmal oumerang, e ng dilu er ngikal chitechut el chad el kmo, “Rungalek, a kngtim a mla mengubet.” 6Te mlar ngii a re bebil er a re sensei er a Llach el dilengchokl er sei el ulemdasu el kmo, 7“Ngika ngera me ng melekoi a ua isel tekoi? Tia otubel a Dios! Ng kmal di tal Dios a sebechel el ousubes a klengit!” 8Ma Jesus a di mle mereched el mo medengei a uldesuir, me ng dilu er tir el kmo, “Ngera me ng ua isei a uldesuiu? 9Ng ngera bai beot a dolekoi er ngikal chad? A de du el kmo, A kngtim a mla mengubet,’ ma lechub e de dul kmo, ‘Bekiis e mnguu a dukllem e morael el mor a blim?’ 10Ak mo ochotii er kemiu el kmo a Ngelekel a Chad a ngar ngii a klisichel er tial beluulchad el ousubes a klengit.” E sola e dilu er ngikal chitechut el chad el kmo, 11“Ak dmu er kau el kmo, bekiis e mnguu a dukllem e morael el mor a blim!” 12Me tia er a dirk lomes er ngii el rokui, e ngii el chitechut a milekiis e nguu a dukllel e orreched el merael. Me te kmal mlo imis el mechas a rengrir e oldanges er a Dios el kmo, “Ng meral dirkak a tal dosa ua itial tekoi!” 13Me ng liluut a Jesus el mor a bita er a daob er a Galilea. E a klou el seked a mlor sel le blar ngii, me ng mocha olisechakl er tir. 14E a lorolang e ng milsa tal chad er omelai el tax, ma Jesus a dilu er ngii el kmo, “Mei me mobengkek.” Ma Levi a milekiis el mo obengkel a Jesus. 15E a uriul e a Jesus a mlor a blengur er a blil a Levi. Te mle betok el chad er a omelai el tax ma re mekngit el chad a uleltirakl er a Jesus el mei me te betok er tir a mlar a blengur el obengkel ngii ma rubengkel. 16E a re bebil er a re sensei er a Llach el Farisi a milsa Jesus el obengterir a re mekngit el chad ma re chad er omelai el tax el omengur, me tuleker er a rubengkel a Jesus el kmo, “Ngera ma Jesus omengur el obengterir a re ua itirkal chad?” 17Ma Jesus a rirengesterir me ng ulenger er tir el kmo, “A re chad el diak el secher a diak lousbech er a toktang, e ngdi tirkel smecher ousbech er ngii. Ng dimlak kmei el me omekedong er a re ungil el chad, ak bai omekedong er a re mekngit el chad.” 18A tar a klebesei e a rubengkel a Johanes el Chad er a Techolb ma rubengterir a re Farisi a ulelsengerenger. Ma re bebil er a re chad a mlor a Jesus e oker er ngii el kmo, “Ngera ma rubengkel a Johanes el Chad er a Techolb ma rubengterir a re Farisi a olsengerenger e a rubengkem a diak?” 19Ma Jesus a ulenger er tir el kmo, “Cho momdasu e ng sebechir a re chad el mlor a mur er a chebechiil el olsengerenger a lobengkel ngikel chad el mlo bechiil? Ng kmal diak! A klemengetel a lobengkel ngikel chad el mlo bechiil e ng kmal diak bo lolsengerenger. 20Ngdi ngar ngii a belsechel e ng mo mengai er a delongelir miseikid e te mochu olsengerenger. 21“Ng diak a chad el oba beches el mamed el melabek er a mechut el bail, ele sel beches el tabek a mekurs e sodelii sel mechut el bail me ng bai mengal mo klou a selodel er ngii. 22Ma ka chad el oleitel er a beches el bilong er a mechut el blil a bilong, ele beches el bilong a mol oibekii a blil el mechut el budel a charm me ng metemall ma bilong a remiid. Ng bai kirel a beches el bilong el moitel er a beches el blil a bilong.” 23A tal Ulengull el Sils, e a Jesus a uleak a deliul a dellomel, ma rubengkel a le dilak me te milengib a redechel e mengilekelek e mengang. 24Ma re Farisi a dilu er a Jesus el kmo, “Ngera ma rubengkem a meruul a diak el kirel doruul er a Ulengull el Sils?” 25Ma Jesus a ulenger er tir el kmo, “Ng dirkak mchuiu a chisel a ikel le riruul a David er ser a bo lousbech a kall? Ngii ma re chedal a mlo songerenger, 26me ng mlo soiseb er a blil a Dios e ngilai a blauang el uldars el mor a Dios me ng mengang. E a Abiathar a mle Ngarbab el Prist. A loeak a Llach e te di prist a sebechir el mengang a ikel blauang, e ngdi David a milengang e dirrek el milsterir a re chedal me te mengang.” 27Ma Jesus a mirrekui er a cheldechedechal el kmo, “A Ulengull el Sils a merruul el kirel a chad, ng diak le chad a merruul el kirel a Ulengull el Sils. 28Ma Ngelekel a Chad a Rubak er a Ulengull el Sils.”

will be added

X\