MARKUS 16

1Uriul er a Ulengull el Sils, e a Maria Magdalene ma Maria el delal a Jakobus ma Salome a mlo mechar a chilt el mo mengilt er a bedengel a Jesus. 2Me ng kmal di mle tutau er a Sunday, e te mor a debull. 3- 4Ma le ngar a omerolir el mong e te katekoi el kmo, “Ng techa er kid a mo toitiur sel bad el ngar medal a debull?” (Ng kmal mle klou el bad.) E a lomes el mor bab e te milsa ngii el bad el mla metitai. 5Me te mlo soiseb er a chelsel a debull, e milsa kekerei el chad el dengchokl er a mo bedul a kadikm el oubail er a becheleleu el bail, me te kmal kilbetiekl e mechas a rengrir. 6Ng dilu er tir el kmo, “Lak le mechas a rengmiu. Ak medengei el kmo kom osiik er a Jesus er a Nasareth el ngikel meldeel er a kerus. Ng dibus er tiang, ele ng mla mekiis er a kodall! Mei me mesa sel blo llia er ngii. 7Morael el mo subedeterir a rubengkel e dirrek el msbedii a Petrus el kmo, ‘A Jesus a di ma mor uchei er kemiu el mor a Galilea, me kom mo mesa el kmal di ua ikel di bla ledu er kemiu.’” 8Me te mlo tuobed e remurt el kmal omritel e mechas a rengrir me te di liluk, ele te mle medakt. DI MLA ULEBONGEL ER A EBANGKELIO 9[Ser a le bekiis a Jesus er a kodall er a kmal dirk tutau er a Sunday, e ng mle kot el mo duum er a Maria Magdalene, el ngikel lultobed a euid el mekngit el chelid er ngii. 10Ma Maria Magdalene a mlo subedeterir a rubengkel a Jesus ele te milengeiung; 11mitia er a le rengesii a Maria Magdalene el ouchais el kmo a Jesus a mla mekiis me ng mla mesang, e ng dimlak bo loumera er ngii. 12Ma uriul er tiang e a Jesus a mlo chemolt er a re teru er a rubengkel er a le ngar a omerolir el mor a beluu, el kuk mle ngodech el blekeradel. 13Me te liluut el mo ouchais er tirkel bebil er tir e ngdi dimlak bo loumera er ngii el chais. 14E a mlo uriul el bo lecholt er tir a Jesus, a re truich ma tang el obengkel, er a lomengur. Ng uluungeroel er tir ele tir el dimlak loumerang, e dirrek el mle medecherecher a rengrir el dimlak bo loumera chisir tirkel milsang el mla mekiis er a kodall. 15Ma Jesus a dilu er tir el kmo, “Bor a beluulchad el rokir e molisechakl er a Ebangkelio er a re bek el chad. 16Ngdi ngikel mo oumerang e metecholb a mo suobel; e ngikel diak bo loumerang a mo medebeakl. 17A ruumerang a bo le besterir a klisiich el meruul a mengasireng el tekoi, e oltobed a mekngit el chelid el oba ngklek; e mo mengedecheduch a diak dodengei el tekoi; 18ma lsekum toreked a bersoech ma lechub e te nguim a dok e ng diak bo le mekesakl; te mo kmed a chimorir er a re smecher el chad e te mo ungil.” 19Ma uriul er a longedecheduch er tir a Jesus e ng milekider el mor bab el mor a eanged e mlo dengchokl er a kadekmel a Dios. 20Ma rubengkel a mirrael el olisechakl er ker me ker, e a Rubak a ullengeseu er tir el olab a mengasireng el tekoi el melisiich osisecheklir el kmo ng kmal merang.]

will be added

X\