MARKUS 14

1Ngdi medechel ku erul sils er uchei er a belsechel a ikel Chedaol el Sils er a Baskua ma Diak Omkukel Blauang. Ma re bderrir a re prist, ma re sensei er a Llach a ulsiik a cheldechulel e di le berrotel el mdechemii a Jesus e lokodir. 2Te dilu el kmo, “Ng diak doruul er ngii er sel belsechel a Baskua ma ikel Chedaol Sils er a Diak Omkukel Blauang, ele ng mol mor ngii a uldikel er a delongelir a re chad.” 3Ma Jesus a mlar a Bethania er a blil a Simon el silecher el chebedes. Ng ulemengur e a tal redil a mlo tmuu er a blai el oba butiliang el alabaster el mui er ngii a meringel a cheral el chilt el diak lurrechomel el nard, e milengii e oitelii er a bdelul a Jesus. 4Te mlar ngii a re bebil er a re mlar itial blengur el mlo kesib a rengrir me te mle katekoi el kmo, “Ngera belkul e ng mengeberochel er a chilt? 5Ng kmal mle sebechel el moterau er a betok er 300 el silber el udoud, e a udoud a mor a re mechebuul.” Te kmal uluungeroel er ngii. 6Ma Jesus a dilu el kmo, “Ka bo becherei! Ngera me kom ua isei er ngii? Ngika mla rullii a kmal ungil e klebokel el tekoi el kirek. 7A re mechebuul a di blechoel el obengkemiu me sel bo le somiu e ng di sebechiu el meruul a ungil el mor tir. Ngdi ngak a diak di kblechoel el obengkemiu. 8Me ngikal dil a mla rullii sel sebechel me ng mla chemilt a bedengek er uchei er a omelakl. 9Ak meral subedemiu el kmo a ikel beluu er a beluulchad el mo oberk a Ebangkelio er ngii, a dirrek el mo mechedecheduch er ngii tial bla le rellii ngikal redil me te mo melatk er ngii a re chad.” 10Ma Judas Iskariot el tar tirkel truich ma terung a mlor a re bderrir a re prist el osiik er a rolel e loterur a Jesus er tir. 11Ng mlo ungil a rengrir er a ikel le dilu el tekoi, me te dilu el kmo te mo msa udoud el kirel. Ma Judas a mocha osiik a ungil cheldechulel e loterur a Jesus er tir. 12Ser a kot el sils er a ikel Chedaol Sils er a Diak Omkukel Blauang e ng mle kirel el okodall a ngelekel a sib el kirel a blengur er a Baskua, ma rubengkel a uleker el kmo, “Ngar ker a soam aki bo mkedmeklii el kirel a blengur er kid er a Baskua?” 13Ma Jesus a uldercheterir a re terung er tir e dilu er tir el kmo, “Morael el mo soiseb er a beluu, e a cho bong e kom mo osiueklii a tal chad el oba ollumel er a ralm, me kom mo okiuellel 14el mor sel blai el bo le siseb er ngii, me kom mong e dmu er a rubak er sel blai el kmo, A Sensei oker er kau el kmo ng ngar ker sel delemerab el bo kimoruul er a blengur er a Baskua er ngii ngak ma rubengkek?’ 15Seikid e ng mo ochotii er kemiu a klou el delemerab el ngar a nikai el kldmokl e ngar ngii a bek el klekedall er ngii me kom mo kudmeklii a blengur er kid er isei.” 16Ma rubengkel a mirrael el mong e miltik a bek el tekoi el di ua ikel le dilu er tir a Jesus, me te kildmokl a ikel mo kirel a blengur er a Baskua. 17Ma bocha le kebesengei e a Jesus a mlei ngii ma re truich ma terung el obengkel. 18Ma le ngar a tebel el omengur, e a Jesus a dilu er tir el kmo, “Ak subedemiu el kmo a tar kemiu a mo olterau er ngak, ng tar obengkek el omengur.” 19Me te rokui el kmal mlo mekngit a rengrir e mocha ouderta er tir el oker er ngii el kmo, “Ng ngak?” 20Ma Jesus a ulenger er tir el kmo, “Ng di tar kemiu el truich ma terung el ngikel bo kimdak el omarech er a blauang er a chimol belatong. 21A Ngelekel a Chad a mo mad el ua ikel ngar a Chedaol Llechukl, e ngdi chebuul ngikel chad el mo oterur a Ngelekel a Chad! Ng bai ungil chomko ng dimlak le mechell!” 22Me tia er a lomengur, e a Jesus a ngiluu a blauang e mereng a sulel a Dios e milechedii e mesterir a rubengkel e dilu el kmo, “Mnguu tiang, e tiang a bedengek.” 23E sola e ngiluu a kob e mirreng a sulel a Dios e milsterir. Me te rokui el millim er ngii. 24Ma Jesus a dilu er tir el kmo, “Tiang a rsechek, el melisiich er a telbilel a Dios er a rengedel a deleuill, el mo omaoch el kirir a re betok el chad. 25Ak meral dmu er kemiu el kmo, ng kmal diak kluut el mo melim er tial bilong el mo lmuut er sel sils el bo kulim er a beches el bilong er a Rengedel a Dios.” 26E sola e te milengitakl odanges e tilobed el mor a Rois er Olib. 27Ma Jesus a dilu er tir el kmo, “Kemiu el rokui a di mo choitak ele Chedaol Llechukl a kmo, A Dios a mo mekodir a mengkerengel a sib me ng meterakl a sib.’ 28Ngdi sel kbekiis er a kodall e ak mo okiu uchei er kemiu el mor a Galilea.” 29Ma Petrus a dilu el kmo, “A re chad a mo choitau, e ngdi ngak a kmal diak bo kchitau!” 30Ma Jesus a dula er a Petrus el kmo, “Chelechal kesus er uchei er a bo lerul lorros a malk e kau a mo edei el mdu el kmo ng diak modengelkak.” 31Ma Petrus a dilu el kmo, “A bo le kirek el mad el kirem me ngak a kmal di diak bo kdu el kmo ng diak kudengelkau!” Tirkel rokui el obengkel me te millekoi osisiu el tekoi. 32E sola me te mlor a Gethsemane, ma Jesus a dilu er a rubengkel el kmo, “Mei me bo mdengchokl er tiang e ngak bo kululuuch.” 33E ngiluu a Petrus ma Jakobus ma Johanes me te dilak el merael. A Jesus a kmal mlo imis el chuarm er a kngtil a rengul, 34me ng dilu er tir el kmo, “A kngtil a renguk a soal el mekodkak. Di mngar tiang e mongkar.” 35E ngii a ngilsechekl el telkib el mo cheroid er tir e mlo terrob er a chutem, e milluluuch el kmo, a bo le sebechel e bo le iiu er ngii tial ringel. 36Ng milluluuch el kmo, “Chedam, Chedam! A rokui el tekoi a kmal di sebechem. Mnguu tial kob el choridii er ngak. Ngdi diak le sel soak; di le bor sel soam.” 37Me ng liluut el mor sel le mlar ngii tirkel tedei er a rubengkel e miltik er tir el mechiuaiu. Me ng dilu er a Petrus el kmo, “Simon, ke mla mo mechiuaiu? Ng dimlak el sebechem el mekar el di tal sikang?” 38Ma Jesus a dilu er tir el kmo, “Mongkar e moluluuch me lak kom rebet er ongetikaik el mor a klengit. A rengul a chad a mesisiich, e ngdi klechad a mengitechut er ngii.” 39Ng liluut el merael el mor cheroid e meluluuch el melekoi a osisiu el tekoi. 40E liluut el mor sel le ngar ngii a rubengkel e miltik er tir el mechiuaiu; ele ng mlo diak el sebechir el mtekangel a mederir, e mlo diak lodengei el kmo ng ngera te dmu er ngii. 41Ma lleta el mei el mochang me ng ongedei kung e ng dilu er tir el kmo, “Kom dirk mechiuaiu e olengull? Tilecha ungiang! A belsechel a mla mei! Mesang, chelechang e a Ngelekel a Chad a mla moterau e mo mengai el mor a chimorir a re mekngit el chad. 42Bekiis e dorael e ngkakid ngikel mo olterau er ngak el mermang!” 43Ma Jesus a dirk mengedecheduch e a Judas el tar tirkel truich ma terung a mermang ngii ma cheldebechel er a re soldau el olab a saider ma chelebed el mlodurech er a re bderrir a re prist, ma re sensei er a Llach, ma re mechuodel. 44Me ngikal mlo olterau er a Jesus a mla ochotii olangch er tial cheldebechel el le dilak el kmo, “Ngikel chad el bo kterengur a medal, ngkeikid ngii el chad el somiu el omdechem er ngii. Kom mo mdechemii e nguu el merael e mo ungil mengkar er ngii.” 45Ma le merma Judas e ng di mle mereched el mor a Jesus e dilu el kmo, “Sensei!” e tirrengur a medal. 46Me te mildechemii a Jesus. 47Ma tar tirkal mle dechor er isei a ngilmersii a saider er ngii e ngiluu el melauch er a sibil a Ngarbab el Prist el dobesii a bital dingal. 48Ma Jesus a dilu er tir el kmo, “Kemiu ng kiriu el mei el olab a saider ma chelebed el omdechem er ngak el di ua ia kdengerenger el chad? 49Ak ulebengkemiu er a bek el sils e ulisechakl er a Templo e dimlak momdechem er ngak. Ngdi ng mo ua isei me bo letaut a Chedaol Llechukl.” 50Itia e a rokui el obengkel a chilitii e chemiis. 51E mlar ngii a tal kekerel chad el mle bliull er a mamed e uleak ullel a Jesus. Te millasem el omdechem er ngii, 52e ngdi ngii a chilitii ngii el mamed e chemiis el di meau. 53Ma Jesus a mlengai el mor a blil a Ngarbab el Prist el ble le kldibel er ngii a rokui el bderrir a re prist, ma re mechuodel, ma re sensei er a Llach. 54E a Petrus a uleltirakl er a Jesus el di ngar cheroid e mlo soiseb er a mekesekesel a Ngarbab el Prist. E mlo dengchokl el obengterir a re mengkar e meseb er a ngau. 55E a re bderrir a re prist ma Olbiil el rokir a millasem el osiik a bebil er a tekoi el mo uchul e lotuteklii a Jesus me bo le mad, e ngdi dimlak a ngeral sebechir el metik. 56Te betok el chad a ulemulak el leko tolecholt a kngtil a Jesus e ngdi dimlak bo le ta tekingir. 57E a re kuk bebil er a re chad a mlo dechor e uluuchais er tial diak le meral chais el kirel a Jesus el kmo, 58“Aki rirengesii el kmo, Ak mo torudii tial lurruul er ngii a re chad el Templo e a uriul er a edel klebesei e ak mekedecherur a chimong el diak el rruul er a re chad.’” 59Tir me ng dirrek el dimlak bo le ta tekingir. 60Ma Ngarbab el Prist a mlo dechor er mederir el rokui e uleker er a Jesus el kmo, “Kau ng diak a tekingem el kirel tial ultelechakl el kirem?” 61Ngdi Jesus a di liluk el dimlak a ngeral lolekoi. Ma Ngarbab el Prist a liluut el oker er ngii el kmo, “Kau ke Mesias, el Ngelekel a Odengesall el Dios?” 62Ma Jesus a ulenger el kmo, “Ng ngak Ingii. Kemiu el rokui a mo omes er a Ngelekel a Chad el dengchokl er a mo bedul a kadekmel Olab a Bek el Klisiich, e ngar a eabed er a eanged el mei!” 63Mitia e a Ngarbab el Prist a di mle ngii el sodelii a bilel e dilu el kmo, “Ngera kede dirk osiik er ngii! 64Kom mla remenges otubel a Dios el tuobed er a ngerel. Ng ngera uldesuiu?” Tir el rokui a di mle sorir a Jesus a bo le mad. 65Ma re bebil er tir a mlo melub er a Jesus, e lilechet a medal e mengelebed er ngii, e dilu er ngii el kmo, “Ka molangch el kmo ng techa chillebedau!” A re mengkar a ngiluu e olebedii. 66Ma Petrus a dirk mlar ser iou el ngar a mekesokes, e a tal redil el mesiungel a Ngarbab el Prist a mlei. 67Ma lesa Petrus el meseb er a ngau e ng ulngengii e dilu el kmo, “Kau a dirrek el ulebengkel a Jesus er a Nasareth.” 68Ngdi ngii a uluumededenger er ngii el tekoi e dilu el kmo, “Ng kmal diak kudengei cho molekoi el tekoi.” E mirrael el tuobed er a siseball e a malk a merros. 69E ngikel mesiou el dil a milsa Petrus er isei me ng liluut el melekoi er a re chad el di mle dechor er isei el kmo, “Ngika tar tir!” 70Ngdi Petrus a liluut el kmo ng diak kudengelii tial tekoi. E di mle telkib e tirkel dilechor er bita er ngii a liluut el melekoi er a Petrus el kmo, “Ng kmal diak el sebechem el kmo ng diak mtar tir, ele kau a chad er a Galilea.” 71Ma Petrus a dilu el kmo, “Ak meral melekoi a klemerang! A Dios a mo melsak a lsekum ak umulak. Ngikal chad el molekoi er ngii a meral diak kudengelii!” 72Itia e a malk a mocha ongeru el lorros, ma Petrus a lotka le dilu er ngii a Jesus el tekoi el kmo, “Uchei er a lorros a malk el erung, e kau a mo edei el mdu el kmo ng diak modengelkak.” Mitia e ng kmal mlo imis el mekngit a rengul e mlo klou el lmangel.

will be added

X\