MARKUS 13

1Ma le tebeda Jesus er a Templo, e a tar a rubengkel a dilu el kmo, “Sensei, ka momes! Ng meral ungil a ikal cheldukl bad ma blai!” 2Ma Jesus a dilu er ngii el kmo, “Komes a ikal meklou el blai? Ng diak a tar a ikal bad el mo medechel er a olsechelel; ng rokui el di mo mongkangk.” 3Ma Jesus a dilengchokl er a Rois er Olib el ngii el rois a chemau a Templo e a Petrus, ma Jakobus, ma Johanes, ma Andreas a di mle tir el tang el mer ngii. 4Te dilu er ngii el kmo, “Ka msbedemam el kmo ng oingerang e a ikal tekoi a mor ngii, e msbedemam er a mo olengchelel a bo letaut a ikal rokui.” 5Ma Jesus a dula er tir el kmo, “Bo mkerekikl me lak a chad el mengeuid er kemiu. 6Te betok el chad a mei el oba ngklek me te mo dmu el kmo, ‘Ngak Ingii!’ me te mo choitikikterir a re betok el chad. 7Lak bo louedikel a rengmiu cho mrenges a chisel a mekemad el kmeed ma lechub e ng cheroid. A choua ikal tekoi a kirel mo duubech, e ngdi diak le belkul a kmo a ulebongel a mermang. 8A beluu ma beluu a mo kaumekemad, ma renged ma renged a mo kautok. Ma desiu a mor ngii er ker me ker, ma bosech me ng mor ngii. A ikal tekoi a ua kot el rengelel a cheroll. 9“Kemiu di le kemiu el mo kerekikl. Kom mo mudechem e mengai el mor a kerrekeriil. Te mo cholbedemiu er a blil ongdibel; ng ngak a uchul e kom mo dechor er mederir a re merreder ma re king e olecholt er a Ungil Chais er tir. 10E ngdi uchei er a le mei a ulebongel, e a Ebangkelio a kirel mosisechakl el mor a rokui el chad. 11Me sel le ngikemiu el mor a kerrekeriil, e lak el sebek a rengmiu el kirel cho bo molekoi; ele sel bo le belsechel, e kom di mo melekoi a ikel ekor kemiu. Ele tekoi el bo molekoi a diak le tekingiu; ng ngar a Chedaol Reng el ekor kemiu. 12A chad a mo otuteklii a tar ngii el kirel a kodall. Ma chedam me ng mo ua isei el mor a re ngelekel. Ma re ngalek a mo omtok er a re demerir ma re derrir e mo uchul a kodellir. 13A re bek el chad a mo ouketui er kemiu el ngak a uchul. Ngdi ngikel outekangel el mor a ulebongel a mo suobel. 14“Kom mo mesa ‘Ngikel Melemall a Chedaol’ el dechor er sel diak le kirel el ngar ngii.” (Kemiu el menguiu momtab er a belkul tiang!) “Isei e tirkel ngar a Judea le chiis el mor a bukl. 15Ma chad el ngar bebul a blai lak bo le metengel e lak bo le siseb er a blai el leko ng mela ngerang. 16Ma chad el ngar a sers lak lluut el mor a blai el leko ng mo melai er a ikrel a bilel. 17Ng mo klou el chelebuul el kirir tirkel redil el dioll ma re dirk oltut er a re ngalek! 18Molengit er a Dios ma ikal tekoi lak bo le dubech er a temel a kerrasem! 19A ikel ringel el mor ngii er a ikel sils a kmal mo imis el dirkak le ngar ngii er a lomuchel a Dios el mebii a beluulchad el mer chelechang. Ma ka lluut el mor ngii er chelechal mong. 20Ngdi Rubak a kilsadel a ildisel a ikel sils, ele lak, e ng diak a tal chad el mo medechel. Ng tirkel ngellitel el chedal a uchul, e ng riruul a ikel sils el mo kesai. 21“Ma lsekum ng ngar ngii a chad el dmu er kemiu el kmo, ‘Mesang, ngkakid a Mesias!’ ma lechub e ng kmo, ‘Ng ngar sei!’ e lak moumerang er ngii. 22Ele re diak le meral Mesias ma re diak le meral profet a me duum. Te mo olab olangch ma ongasireng el tekoi el mengeblad er a re ngellitel er a Dios, a le sebechir. 23E ngdi kemiu bo mkerekikl e ak mla subedemiu er a rokui el tekoi el kirel a ngar medad. 24“Uriul er a belsechel a ringel e a sils a mo milkolk, ma buil a mo diak a dichel, 25ma btuch a mo ruebet er a eanged, ma klisiich el ngar a melidiul a mo diak lultebechel. 26E a Ngelekel a Chad a me duum el ngar a chelsel a eabed el oba klou el klisiich ma klebkall. 27Ng mo odercheterir a re anghel el mor a ikel eual uchul a eolt el mengideb er a re ngellitel er a Dios el melai er tir er a beluulchad el rokir. 28“Mnga klubeliu er a kerrekar el fig. A rechelel sel bocha le mengrengrang ma llel lolsebang, e kom medengei el kmo ng mocha belsechel a kleald. 29Me ng ua isei, cho mesenge ikal tekoi el toutang, e bo modengei el kmo ng mermang el kmeda er a tuangel. 30Ak meral subedemiu el kmo a uche er a le ngemed a re chad er tial telecheroll e a ikal rokui el tekoi a mo duubech. 31A eanged ma chutem a mo nguemed, e ngdi tekingek a diak bo le ngemed. 32“Ng diak a medengelii sel sils ma lechub e ng sel sikang a le mei, ng ka le anghel er a eanged, ma lechub e ng Ngalek; ngdi tal Chedam a medengelii. 33Bo mekar e mkerekikl, ele ng diak modengelii a le mer ngii isel belsechel. 34Ng di ua chad el mor a omerael el mechere mesiungel me ng oungerachel er a blil er uriul er a bla ledu urerir a re derta er tir e ledu er a mengkerengel a tuangel me di le klekar. 35Bo mklekar, e ng diak modengelii a le mer ngii a mastang er a blai el kmo ng kekesus, ng sueleb er a klebesei, ng mochu tutau, ma lechub e ng ngesechel a sils. 36Ma di le mereched el mei, e lak le betik er kemiu el mechiuaiu. 37Ma ikal kdu er kemiu, a tekingek el mor a rokui el chad el kmo: Bo mkerekikl!”

will be added

X\