MARKUS 10

1A Jesus a mirrael el mor a beluu er a Judea e mlo imuul er a Omoachel Jordan. Ma klou el seked a luuta el mo mekideb er ngii, me ng ullisechakl er tir ele ng di mle blechoel el ua isei. 2Ma re bebil er a re Farisi a mler ngii el melasem el omedikl er ngii me tuleker er ngii el kmo, “Ka msbedemam. Ng di subed er a llechud a sechal a le chitii a bechil?” 3Ma Jesus a ulenger el oker er tir el kmo, “Ngeral llach a le bilskemiu a Moses?” 4Me tulenger el kmo, “A Moses a kilengei er kemam el kmo ng sebechel a sechal el luchesii a babier er a dertel a chebechiil e choitii a bechil.” 5Ma Jesus a dilu er tir el kmo, “Ng delecherecherel a rengmiu a uchul ma Moses a lilechesii tial llach el meskemiu. 6Ngdi ngar a Chedaol Llechukl a kmo ser a lobeob a beluulchad e a Dios a milebii a chad el sechal ma redil, 7ma uchul ma sechal a mo cheroid er a demal ma delal e mo kiei el obengkel a bechil; 8e tir el terung a mo tal chelechad, me ng dikea le terung, e te mocha tang. 9Ma chad a diak le kirel el merort er sel bla lokur a Dios.” 10Ma le bocha er a blai e a rubengkel a Jesus a liluut el oker er ngii er tial tekoi. 11Me ng dilu er tir el kmo, “A sechal el choitii a bechil e mo bechil a tar a redil a mla mor a laokreng el omtok er a di mla bechil. 12E dirrek el ua isei a lsekum a redil a choitii a bechil e mo bechil a tar a chad e ng mocha er a laokreng.” 13A re bebil er a re chad a ulebeteterir a re ngalek el mor a Jesus me bo lomor a chimal er tir, e ngdi rubengkel a uluungeroel er tir. 14Ser a bo lodenge Jesus e ng ngilasech a rengul me ng dilu er a rubengkel el kmo, “Bechititerir a re mekekerei el ngalek me le mer ngak, e lak molekebai er tir, ele Rengedel a Dios a kirir. 15Ak meral subedemiu el kmo ngikel diak le nguu a Rengedel a Dios el ua ia ngalek a diak el sebechel el mo soiseb er ngii.” 16Me ng ulemechull er tir el ngalek, e ulemor a chimal er tir e ulemekngeltengat er tir. 17Ma lluut a Jesus el melemolem er omerolel, e a tal chad a rirurt el mo outubuach er medal e uleker er a Jesus el kmo, “Ungil Sensei, ng ngera bo krellii e ak mo nguu a diak a ulebengelel klengar?” 18Ma Jesus a uleker er ngii el kmo, “Ngera me koleker er ngak el kmo ungil? Ng diak a tal chad el ungil, ng di tal Dios. 19Kau a medengei a llach el kmo, ‘Lak bo le melaok a rengum; lak bo momekoad; lak bo morechorech; lak bo molekoi a telingaol el kirel a chad; lak bo mongeblad; bo mongull er a demam ma delam.’” 20Me ngii el chad a dilu er a Jesus el kmo, “Sensei, a ikal rokui el llach a di kuleltirakl er ser a kngalek el mer chelechang.” 21Ma Jesus a ulemes er ngii e mle betik a rengul er ngii e dilu el kmo, “Kau ousbech er a kmal di tal tekoi. Morael el mo oterau a ikel rokui el ngar ngii er kau, e mngai a ikel udoud el mesterir a re mechebuul, me bo merau er medal a Dios; e mereko e mei me moltirakl er ngak.” 22Ma le rengesa ika ngikal chad, e ngdi mlo ngodech a medal me ng merola el kmal mekngit a rengul ele ng kmal mle betok a kloklel. 23Ma Jesus a mileltii e omes el mor a rubengkel e dilu el kmo, “Ng kmal meral meringel er a re merau el chad el mo soiseb er a Rengedel a Dios!” 24Ma rubengkel a kilbetiekl er a ikal tekoi, e a Jesus a millemolem er a cheldechedechal el kmo, “Rengelekei, ng meral meringel a mo soiseb er a Rengedel a Dios! 25Ng bai kuk meringel er a merau el chad el mo soiseb er a Rengedel a Dios er a charm el kiamo a bo le siseb er a belsebselel a rasm.” 26Ma rubengkel a kmal mlo imis el mechas a rengrir me te mle kakerker er a delongelir el kmo, “Me tia le ua isei e ng techa sebechel el mo suobel?” 27Ma Jesus a ulemes er tir e kmo, “Tiang a diak el sebechel er a re chad e ngdi sebechel er a Dios ele rokuil tekoi a di sebechel er a Dios.” 28Ma Petrus a melekinga el kmo, “Mesang, aki mla mechei a bek el tekoi e mo oltirakl er kau.” 29Ma Jesus a dilu er tir el kmo, “Ng ua isei, mak subedemiu el kmo ngikel mo ikrii a blil ma lechub a re bebil er ngii el sechal ma redil ma lechub a demal ma lechub a delal ma lechub a re ngelekel ma lechub a chetemel el kirek ma kirel a Ebangkelio, 30a mo ngmai a lmuut el betok er chelechang, ng mo ngmai a derdart el blai ma re bebil er ngii el sechal ma redil ma re delal ma re ngelekel ma chetemel, e dirrek el mo chuarm er odechelakl; e sel mel beluulchad e ng mo nguu a diak a ulebengelel klengar. 31E ngdi betok a re ngar uchei er chelechang el mor uriul, ma re betok a re ngar uriul er chelechang el mor uchei.” 32Ma lorolang a Jesus ma rubengkel el mor a Jerusalem, e a Jesus a uleak uchei er tir, ma rubengkel a mlo mechas a rengrir, me tirkel chad el ulebengterir a mlo medakt. Ma Jesus a ileklterir a re truich ma terung el obengkel e uluuchais er tir er a ikel tekoi el mo duubech el kirel. 33Ng dilu er tir el kmo, “Ka morrenges. Kid a mor a Jerusalem e a Ngelekel a Chad a mo mengai el mor a chimorir a re bderrir a re prist ma re sensei er a Llach. Te mo melsii el mo kirel a kodall e mo nguu el mor a chimorir a re Chisentael, 34me te mo dongulii e tubar e cholebedii e mekodir; ngdi uriul er edel klebesei e ng mo mekiis er a kodall.” 35A Jakobus ma Johanes el ngelekel a Sebedeus a mlor a Jesus e dilu er ngii el kmo, “Sensei, ngar ngii a kmal somam cho mrellii el kiram.” 36Ma Jesus a dilu er tir el kmo, “Ng ngera somiu ak rellii?” 37Me te dilu er ngii el kmo, “Ng somam cho mkengei me bo kimdengchokl el obengkem er a klebkellem el tang a ngar a kadekmem ma tang a ngar a katerum.” 38Ma Jesus a dilu er tir el kmo, “Ng kmal diak modengelii cho molengit er ngii. Ng sebechiu el mo melim er sel kob el bo kulim er ngii? Ng sebechiu el mo metecholb er sel techolb el bo kmetecholb er ngii?” 39Me te dilu el kmo, “Ng sebecham.” Ma Jesus a ulenger er tir el kmo, “Sel kob el bo kulim er ngii cho bo molim er ngii, ma techolb el bo kmetecholb er ngii cho bo metecholb er ngii. 40Ngdi tirkel mo dengchokl er a kadekmek ma kateruk a diak le ngak a melilt er tir ele ng Dios a melutk er a re mor ngii.” 41Ma le rengesa tirkel truich el obengkel a Jesus e ng ngilasech a rengrir er a Jakobus ma Johanes. 42Ma Jesus a ulleker er tir el mo dmak e dilu el kmo, “Kemiu a medengei el kmo tirkel chad el metutk el mo merreder er a re Chisentael a kmal oumerreder er tir ma re ngarbab el chad a mengedereder er tir. 43Ngdi tial teletael a diak bo le ua isei er a delongeliu. Ngikel soal el mo kot el ngarbab er a delongeliu a kirel el mo mesiungiu; 44ma lsekum ng ngar ngii er kemiu a soal el mor uchei, e ng kirel el mo sibmiu el rokui. 45Ele Ngelekel a Chad a dimlak le mei el mo siungel, ng bai mlei el mo mesiou e tongetengii a klengar er ngii el mo ngbetir a re betok el chad.” 46Te mlor a Jeriko, e a lorola ngii ma rubengkel ma klou el seked, e a tal meiko e chebuul chad el Bartimeus a ngklel el ngelekel a Timeus a dilengchokl er a tkul a rael. 47Me ser a le renges el kmo a Jesus er a Nasareth a ngar sei, e ng uleldiu el kmo, “Jesus el Ngelekel a David! Bo mchebkak!” 48Ma re betok el chad a chileklii e dmu er ngii el kmo bo mluk. Ngdi ngii a mengal mlo klou a ngerel el oldiu el kmo, “Ngelekel a David! Bo mchebkak!” 49Ma Jesus a mlo dechor e dilu el kmo, “Mokerir el mei!” Me tulekerir ngii el meiko el chad el mei e dilu er ngii el kmo, “Bo lungil a rengum e bekiis e ng oleker er kau.” 50Me ng di mle mereched el medebedii a ikrel a bilel e mekiis el merael el mor a Jesus. 51Ma Jesus a uleker er ngii el kmo, “Ng ngera soam ak rellii el kirem?”, Me ng ulenger el kmo, “Sensei, ng soak el mo omes.” 52Ma Jesus a dilu er ngii el kmo, “Morael, e ke mocha ungil ele kau el oumerang.” Me ng di mle mereched el mo omes, me ng merola el obengkel a Jesus.

will be added

X\