LUKAS 9

1A Jesus a milekedongeterir a re truich ma terul obengkel el mo kldibel e mesterir a klisiich ma omengedereder el mo oldik a rokui el mekngit el chelid e omekungil a rakt. 2E sola e uldercheterir el mo olisechakl er a Rengedel a Dios, e omekungil er a re smecher, 3ngdi uchei e ng dilu er tir el kmo, “Ng diak a ngeral molab er tial omerael, ng ka le skors, el ka le tutuu, el ka le kall, el ka ludoud, el ka loidelliu. 4E sel beluu el le ngikemiu er ngii cho bo mkiei er osisiu el blai el mor sel morael, 5e sel diak le ngikemiu a re chad er ngii el beluu, cho mtobed er ngii e smirs a chebechab er ochemiu el olechotel a kmo ng mekngit omerellir.” 6Ma rubengkel a tilobed el mor a ikel rokui el mekekerel beluu el olisechakl er a Ungil Chais e omekungil er a re smecher. 7A Herodes, el merreder er a Galilea er a le renges a rokui el tekoi el mla mor ngii e ng kmal mlo mechedeng a rengul ele re bebil er a re chad a melekoi el kmo a Johanes el Chad er a Techolb a mla lmuut el me chad. 8Ma re bebil a kmo a Elias a mla me duum, ma re kuk bebil a kmo ng tar a re profet er a irechar el mla lmuut el me chad. 9Me ng dula Herodes el kmo, “A Johanes a bla knguu a bdelul, e ngika ng techa el kurrenges a chisel?” Ng kmal mle soal el mesa Jesus. 10A re apostol a liluut el mor a Jesus e uluuchais er ngii a ikel bek el lurruul. Me ng ngilititerir e te ngoseklterir el mor a chimol beluu el Bethsaida ngklel. 11E a seked er a bo lodengei, e tuleltirakl er ngii. Me ng ngilititerir e milengedecheduch er tir a chisel a Rengedel a Dios, e ulemekungil er tirkel silecher. 12Ma bocha le kebesengei e a re truich ma terul obengkel a mocha er ngii e kmo, “Msmesmecheterir a re chad me bo le sebechir el mor a ikel beluu ma sers el meliuekl er tiang me losiik a kelir ma bo le kiei er ngii, e tia diak a delengchokl er ngii.” 13Ngdi Jesus a dilu er tir el kmo, “Kemiu momeka er tir.” Me te dilu el kmo, “Ng di kleim el blaua ma erul ngikel a ngar ngii er kemam. Ng soam a bo kim omechar a kelel tial seked el rokir?” 14(Te mlar ngii a bekord el 5,000 el sechal.) Ma Jesus a dula er a rubengkel el kmo, “Mdu er a re chad me lobii el mo dersokeim a dmak el dengchokl.” 15E a bocha le merek a rubengkel el omii er a re chad, 16e a Jesus a ngilai a ikal kleim el blauang ma erul ngikel, e dilengesii a eanged, e mereng a sulel a Dios el kirel, e milached, e milsterir a rubengkel me te mo merous er a re chad. 17Te rokui el milenga el mo medinges, e a rubengkel a chiludel a derengel el tacher ma teblol sualo. 18A tar a klebesei e a Jesus a di mle ngii el tang el meluluuch, e a rubengkel a mlor ngii me ng uleker er tir el kmo, “A re chad te kmo ngak ak techang?” 19Me te dmu el kmo, “A re bebil a melekoi el kmo ke Johanes el Chad er a Techolb, e a re bebil a kmo ke Elias, e a re kuk bebil a kmo ke tar a re profet er a irechar el mla lmuut el me chad.” 20Me ng okere el kmo, “E kemiu a kmo ngak ak techang?” Ma Petrus onger el kmo, “Kau a Mesias er a Dios.” 21Itia e a Jesus a kmal mocha mengelechel er tir me ng diak louchais er a re chad er ngii el tekoi. 22E dirrek el dilu er tir el kmo, “A Ngelekel a Chad a kirel kmal mo chuarm, e mo motngakl er a re mechuodel, ma re bderrir a re prist, ma re sensei er a Llach. Ng mo mokoad e ngdi ongedel sils e ng mo mekiis er a kodall.” 23E dmu er tir el rokui el kmo, “A lsekum ng ngar ngii a soal el obengkek, e ng kirel mo diak lolatk er a di ngii e bai nguu a kerus er ngii er a bek el sils e oltirakl er ngak. 24Ele ngikel soal el di olsobel er a klengar er ngii oridii, e ngikel oridii a klengar er ngii el ngak a uchul a bai osebelii. 25Ng ngar ngii a mo klungiolel er a chad a lsekum ng korekerngii a beluulchad el rokir e ngii a mo remiid? Ng kmal diak! 26A lsekum ng ngar ngii a merur er ngak ma osisecheklek, e a Ngelekel a Chad a mo merur er ngii sel le mei el ngar a klebkellel ma klebkellel a Chedam ma re chedaol anghel. 27Ak meral dmu er kemiu el kmo te ngar ngii a re ngar tiang el diak le mad er uchei er a lesa Rengedel a Dios.” 28Ng mlo chuib a bekord el tal sandei er a ledu ikal tekoi a Jesus, e sola e ng ngiluu a Petrus, ma Johanes, ma Jakobus el mo ngmasech er a rois el mo meluluuch. 29Me tial loluluuch, e a medal a mlengodech ma bilel a mlo medidiich a chellelengel. 30E tiaikid e te di dilum a re terul chad el mengedecheduch er ngii. Tirkang a Moses ma Elias 31el mle duum el ngar a klebkellel a eanged e mengedecheduch er a Jesus el kirel a uldesuel a Dios el bochu loltaut er ngii el oeak a kodellel er a Jerusalem. 32E a Petrus me tirkel le dilak a iliit a mederir, e tia er a le mekar e te milsa klebkellel a Jesus, me tirkal terul chad el dechor el obengkel. 33E a bocha le kebii tir el chad ma Jesus, e a Petrus a dmu er ngii el kmo, “Mastang, ng kmal ungil a di de ngar tiang! Kede mo remuul a kldei el delidui, el chimong a kirem, ma chimong a kirel a Moses, ma chimong a kirel a Elias.” (Ng dilu ikang ele ng mlo diak lodenge lolekoi.) 34Me ng dirk mengedecheduch e a eabed a mei el chuchebeterir; ma rubengkel a Jesus a mlo medakt er a le bor bebrir ngiil eabed. 35E mlar ngii el eabed a ngor el melekoi el kmo, “Ngika Ngelekek, el bla kngiltii, me morrenges er ngii!” 36E ser a bo lak a melekoi, e a Jesus a di mlo ngii el tang. A rubengkel a di liluk el kirel ngiil tekoi er iseikid e dimlak louchais er a ngii di le chad er a ikel lules. 37A bo le kukuk er a loldengelengel a Jesus ngii ma re tedei er a rubengkel, e a kloul seked a mlo olsiuekl er ngii. 38E a tal chad el teloi er a seked a uleldiu el kmo, “Sensei, ak ulengit er kau me mesa ngikal di tal ngelekek! 39A mekngit el chelid sel lorekedii e ng di mo oldiu, e ng mdesii me ng mo outeriobs a ngerel, e ngii a di omekcharm er ngii el diak le chitii! 40Ak ullengit er a rubengkem me lotebedii e dimlak el sebechir.” 41Me ng dula Jesus el kmo, “Kom meral cheleuid el chad e diak moumerang! Ng ua ngera klteketel el dirk kubengkemiu? Ak dirk outekangel el obengkemiu el mo oingerang?” E sola e dula er ngii el chad el kmo, “Mnguu a ngelekem el mei.” 42Me tial le bocha ngiil buik, e a mekngit el chelid a miltekelengii er a chutem el kuk mochar tial blekerdelel a rektel. Ma Jesus a chileklii ngiil mekngit el chelid, e ulemekungil er ngii el buik, e ngiluu el msa demal. 43A rokuil chad a mlo mechas a rengrir er a mesisiich el klisichel a Dios. Ma re chad a dirk mechas a rengrir er a bek el omerellel a Jesus, e ngii a dmu er a rubengkel el kmo, 44“Kele mobes a ikal bochu kulekoi er kemiu! A Ngelekel a Chad a mor eungel a klisichir a re chad.” 45A rubengkel a dimlak lodengelii a belkul itiang. Ng mle berrotel er tir me ng dimlak el sebechir el mtebengii, e ngdi te mle medakt el oker er ngii. 46Ng mlor ngii a klaititekangel er a delongelir a rubengkel er a kmo ng techa er tir a kot el ngarbab. 47A Jesus a mle medengei a ngar a uldesuir me ng ngiluu a tal ngalek el mekedecherur er bitar ngii 48e dmu er tir el kmo, “Ngikel nguu ngikal ngalek el oba ngklek a ngoikak; me ngikel ngoikak, a dirrek el nguu ngikel ulderchak. Ele ngikel kot el ngariou er a delongeliu el rokui, ingikei ia kot el ngarbab.” 49E a Johanes a dula el kmo, “Mastang, aki milsa tal chad el oba ngklem el oldik a mekngit el chelid, maki milerrob er ngii ele ng diak le tar obengked.” 50Ma Jesus a dula er ngii me tirkal bebil er obengkel el kmo, “Lak morrob er ngii, ele ngikel diak lomtok er kemiu a olab el mer kemiu.” 51A bocha lekeed a belsechel el bo le mengai a Jesus el mor a eanged, e ng kildmeklii er a uldesuel e tobeda el ngar omerolel el mor a Jerusalem. 52Ng uldercheterir a ruderchelel el oeak uchei er ngii el mor a chimol beluu er a Samaria el mo mengedmokl a bek el tekoi el kirel. 53Ngdi re chad er ngii a mle chetirir el melai er ngii, ele ng mle bleketakl el kmo ng mor a Jerusalem. 54Ma rubengkel el Jakobus ma Johanes er a lesa itiang e te dula el kmo, “Rubak, ng soam aki motengelii a ngau er a eanged el me olekngemed er tir?” 55A Jesus a mileltii el choklterir 56e sola e ngii ma rubengkel a mirrael el mor a kuk tar a beluu. 57Me tial le ngar a rael e a tal chad a mlor a Jesus e dmu er ngii el kmo, “Ng soak el obengkem el mor a ikel bor ngii.” 58Me ng dula er ngii a Jesus el kmo, “A fox a ngar ngii a blil el chiechab, ma suebek el charm er a melidiul a ngar ngii a lukel, e ngdi Ngelekel a Chad a diak a bo lotilii a bdelul er ngii e olengull.” 59E dmu er a kuk tar a chad el kmo, “Mei me mobengkek.” Me ngiil chad a kmo, “Rubak a kot e bechikak me bo kdeklii a demak.” 60Ma Jesus a kmo, “Bechititerir a rulekoad me di le tir el melakl er a re mad. E kau morael el mo omerk er a Rengedel a Dios.” 61Ma kuk tar a chad a dmu el kmo, “Ng soak el obengkem e Rubak, ngdi kot e mkengei me ba bo kulmesumech er a telungalek er ngak.” 62Ma Jesus a dmu er ngii el kmo, “Ngikel omuchel el mesib e di mechechisngekl el bedul uriul a diak lungil el kirel a Rengedel a Dios.”

will be added

X\