LUKAS 7

1Ma bocha le merek a Jesus el mengedecheduch er a re chad, e ng mirrael el mor a Kapernaum. 2E mlar ngii a tal mesiungel a ofiser er a re soldau er a Rom el kmal betik er a rengul el silecher el mochu er a kodall. 3Me ser a le renges a chisel a Jesus e ng uldercheterir a re bebil mechuodel el chad er a Judea el mo olengit er ngii me bo lomekungil er a mesiungel. 4Me te mlor a Jesus e ulemecheoch er ngii el kmo, “Ngikal chad a kmal kirem el ngosuir. 5Ng betik a rengul er a re chad er a beluad, e milekedecherur a blil ongdibel er kid.” 6Ma Jesus a ulebengterir el merael. E a bocha lekeed er a blai e ngiil ofiser a uldercheterir a re mesiungel el mo dmu tekingel er ngii el kmo, “Rubak, lak mongesang er kau el mei. E ngak a diak lungil cho be msiseb er a blik, 7e dirrek el diak kulatk el kmo ng ungil kiko kumes er kau. Di mdu tekingem me bo lungil a mesiungek. 8Ele ngak a dirrek el ngar eungir a re ngarbab el ofiser, e kuk ngar ngii a re soldau el ngar eungek. Me sel kdu er a tang el kmo, ‘Bong!’ e ng mong; ma kdu er a tang el kmo, ‘Mei!’ e ng mei; ma kuldurech er a mesiungek el kmo, ‘Mrellii tiang!’ e ng rullii.” 9A Jesus a mlo mechas a rengul er a le renges a ikal tekoi me ng mileltii el mor a seked el uleltirakl er ngii e dmu el kmo, “Ak subedemiu el kmo a choua tial blekerdelel a chad el oumerang a dirkak kbetik er ngii, el ka le ngar ngii er a Israel!” 10Me tirkal oderuchel a liluut el mor a blil ngikal ofiser e a le bong e ng mla mo ungil a mesiungel. 11Uriul er itiang e a Jesus ma rubengkel ma klou el seked a dilak el mor a chimol beluu el Nain a ngklel. 12Ma le bocha er a siseball er ngii el beluu, ma re chad a mocha tuobed el oba mla mad el chad, el di tal ngelekel a tal melakl dil. E a re betok el chad er a beluu a ulebengkel a delal. 13Ma Rubak er a lesa ngiil melakl dil e ng mlo chubur me ng dilu er ngii el kmo, “Lak mlangel.” 14E sola e mirrael el mo rutechii a kahol me tirkal chad el milengol er ngii a mlo dechor. E a Jesus a dmu el kmo, “Kel chad, ak dmu er kau el kmo bekiis!” 15Me ngikal mlad el chad a mlo dengchokl e mocha mengedecheduch. Ma Jesus a ngiluu el mo msa delal. 16Me tirkal chad a rokui el mlo medakt e uleldanges er a Dios el kmo, “A mesisiich el profet a dumia er a delongeled!” E dirrek el dilu el kmo, “A Dios a merma olsobel er a re chedal!” 17Tial chisel a Jesus a uleberk er a Judea el rokir el mo lmuut er a ikel beluu el iliuekl er ngii. 18E a rubengkel a Johanes el chad er a Techolb er a louchais er ngii a ikal tekoi el rokui, e ng milkedongeterir a re teru er tir 19e uldercheterir el mor a Rubak el mo oker er ngii el kmo, “Kau ke ngikel le dilu Johanes el kmo ng kirel mei, ma lechub e ng dirk ngar ngii a kimongiil er ngii?” 20Me te mlor a Jesus e dilu er ngii el kmo, “A Johanes el chad er a Techolb a ulderchemam el me oker er kau el kmo ke ngikel le dilu Johanes el kmo ng kirel mei, ma lechub e ng dirk ngar ngii a kimongiil er ngii?” 21Iseikid e a Jesus a ulemekungil er a re betok el meringel a rektir, ma re blekall er a mekngit el chelid, ma re betok el meiko a mlo omes. 22Me ng dilu er a ruderchelel a Johanes el kmo, “Bong e msbedii a Johanes er a ikel bla mues ma ikel bla mrenges; a re meiko a mocha omes, ma re chitechut a mocha merael, ma re chebedes a mekikidang, ma re mechad a mocha orrenges, ma re mlad a luutal mo chad, ma Ungil Chais a mosisecheklang el mor a re mechebuul. 23Te ngeltengat tirkel diak le rrau a rengrir er ngak!” 24Ma lorolang a ruderchelel a Johanes e a Jesus a mocha mengedecheduch el kirel el kmo, “Ng ngera kom mlo omes er ngii er ser cho mtobed el mor a Johanes er a ked? Kom mlo omes er a chudel el lolmesim er ngii a eolt? 25Ngera kom mlo omes er ngii? Kom mlo omes er a chad el ungil bliull? A re ungil bliull e ngarbab a delengcheklir el chad a dosiik er tir er a blil a king! 26Ka msbedak el kmo ng ngera kom mlo omes er ngii. Kom mlo omes er a profet? Choi, ng profet, e ngdi cho mulsang a kuk ngarbab er a profet. 27Ele Johanes a ngikel lolekoi er ngii a Chedaol Llechukl el kmo, ‘A Dios a dilu el kmo ak mo oderchii oderchelek el oeak uchei er kau el mo meledaes er a rolem.’ 28Mak subedemiu el kmo, “A Johanes a ngarbab er a re bek el chad, e ngdi ngikel kot el ngariou er a Rengedel a Dios a kuk ngarbab er a Johanes.” 29A rokui el chad el ulerrenges er ngii el uldimukl er a re melai a tax a ullengesenges a melemalt el tekingel a Dios me te mlo metecholb er a Johanes. 30E ngdi re Farisi ma re sensei er a Llach a ulemtok er a uldesuel a Dios el kirir me ng dimlak le metecholb er a Johanes. 31“Ng ngera sebeched el oba el omekesiu er a re chad er chelechang? Te ua teletelel a ngerang? 32Te ua re ngalek el dengchokl er a blil omilil e a re bebil a melekoi el mor a re bebil el kmo, Aki uluutumetum a chelitakl er a merengel a chebechiil el kiriu, e dimlak kom moloik! Maki milengitakl a chelitakl er a kemeldiil e dimlak kom langel!’ 33A Johanes el chad er a Techolb er a le mei e ng ulelsengerenger e dimlak lolim a bilong, e kom dmu el kmo, ‘Ngika ngar ngii a mekngit el chelid er ngii!’ 34E a kuk le mei a Ngelekel a Chad el mengang e melim, e kom kmo, ‘Mesa ngikal ngemokel el chad, e sekengim er a bilong, e ousechelei er a re melai a tax ma re kuk bebil er a re mekngit el chad!’ 35A llomeserreng er a Dios a chemolt el melemalt er tirkel rokui el oltirakl er ngii.” 36A tal Farisi a milengemedaol er a Jesus el mo omengur er a blil, ma Jesus a mlor a blil ngiil chad. 37E sel beluu a le kiliei er ngii a tal redil el kmal mle mekngit a blekerdelel e dengerenger. Ngiil redil er a le renges el kmo a Jesus a ulemengur er a blil a Farisi, e ng ngiluu a butiliang el alabaster el ngar ngii a ungil a bul chilt er ngii 38e mlong el mo dechor er ullel el kmeed er ochil a Jesus e lilangel ma iuechel a medal a dilekimes ochil a Jesus. Me ng mocha mesuld el olab a chiul, e melungel, e olechubel er tial chilt er ngii. 39Me ngikal Farisi er a lesang, e ng mengedecheduch er a rengul el kmo, “Chomko ngikal chad a meral profet, e ng mo medengei el kmo ngika ng techal redil el merutech er ngii; e dirrek el mo medengei el kmo ng mekngit a blekerdelel e dengerenger!” 40Ma Jesus a dula er ngii el kmo, “Simon, ng ngar ngii a soak el melekoi er kau.” Me ng dilu el kmo, “Choi e Sensei, ka molekoi.” 41Me ng dula Jesus el kmo, “Ng mlar ngii a re terul chad el ulemed a udoud er a tar a chad. A tang a miled a 500 ma tang a miled a 50 . 42E dimlak a tar tir el sebechel kokad a belsel me ngikal le biled a ududel a di chiloit. Cho momdasu e ng techa er tirkel terung a kmal mlo betik a rengul er ngikel chad?” 43Ma Simon a ulenger el kmo, “Ak umdasu e ng ngikel mlechoit a betok el belsel.” Ma Jesus a dilu el kmo, “Ng klemerang cho bla mdung.” 44E sola e ulebult el bedul ngii el redil e dmu er a Simon el kmo, “Ke mesa ngikal redil? Ak mle soiseb er a blim e dimlak beskak orseuel ochik, e ngikal redil a mla remisu ochik el olab a iuechel a medal, e smuld el olab a chiul. 45Ng dimlak mterengur a medak er a be ktuu, e ngii ngkaikid er a lolungel ochik er ser a kmei el mer chelechang. 46Me kau a dimlak mrengsii a bdeluk er a cheluch, e ngikal redil a mla chemilt ochik er a ungil a bul chilt. 47Mak subedau el kmo a klou el bltikerreng el bla lochotii ngikal redil olecholt el kmo ng betok el kngtil a mla musubes. Ele ngikel musubes er a kesai a di kekerei a bltkil a rengul.” 48E sola e a Jesus a dilu er ngii el redil el kmo, “A kngtim a mla musubes.” 49Me tirkal dilengchokl el obengkel er a blengur a katekinga el kmo, “Ngika ng techal chad el leko ng dirrek el ousubes a klengit?” 50Ma Jesus a dmu er ngiil redil el kmo, “Kau oumerang a uchul me ke mo suobel, me morael el ngar a budech.”

will be added

X\