LUKAS 6

1A tal Ulengull el Sils e a Jesus a ulekiu a delongelel a dellomel el wheat, ma rubengkel a mocha mengib a redechel el mengilekelek e mengang. 2Ma re bebil el Farisi a uleker el kmo, “Ng ngera uchul me kom meruul a ikel lolekebai a Llach el kmo ng diak el sebeched el meruul a le Ulengull el Sils?” 3Ma Jesus a ulenger er tir el kmo, “Ng dirkak mchuiu a chisel a ikel le riruul a David ngii ma re chedal er ser a bo le sengerenger? 4A David a siliseb er a blil a Dios el ngma blauang el uldars el mor a Dios el mengang e dirrek el milsterir a re chedal me te mengang. E tia omtok er a Llach er kid. Te di prist a kirir el menga ikel blauang e diak el subed er a ngii di le chad el mengang.” 5Ma Jesus a mirrekui er a cheldechedechal el kmo, “A Ngelekel a Chad a Rubak er a Ulengull el Sils.” 6E a kuk tar a Ulengull el Sils, e a Jesus a mlor a blil ongdibel e olisechakl, e mlar ngii a tal chad el chitechut a kadekmel a chimal. 7E a re bebil er a re sensei er a Llach ma re bebil el Farisi el ulsiik er a mo uchul e lotuteklii a Jesus, a mle blak a rengrir el omdidm er ngii el kmo ng omekungil er a Ulengull el Sils ng diak. 8A Jesus a di mle medenge uldesuir me ng dilu er ngikal chad el kmo, “Bekiis el me dechor er tiei.” Me ng milekiis ngiil chad el mo dechor. 9E sola e a Jesus a dilu er tir el kmo, “Ka msall e kuker, a doltirakl a Llach er kid e ngera subed el doruul a le Ulengull el Sils? Ng ungil a dolengeseu e dolsobel er a klengar er a chad, ma lechub e dolemall e domekoad?” 10Ng mirriik er tir el rokui e sola e dula er ngii el chad el kmo, “Mtemetii a chimam.” Me ng tilemetii a chimal me ng liluut er a smechel. 11Ng kmal mlo kesib a rengrir me te mocha katekoi er a kmo te mo mekera er a Jesus. 12Iseikid e a Jesus a mlo ngmasech er a tal bukl el mo meluluuch me ng mle tal kesus el loluluuch el mor a Dios. 13E a bocha le tutau, e ng ulemekedong er a rubengkel e ngililteterir a re truich ma terung el lulemekedong er tir el apostol. 14Ng Simon (el lulemekedong er ngii el Petrus), ma tar ngii er a Andreas, ma Jakobus, ma Johanes, ma Filip, ma Bartholomeus, 15ma Mateus, ma Thomas, ma Jakobus el ngelekel a Alfeus, ma Simon (el chedal a cheldebechel el Ngarablakerreng) 16ma Judas el ngelekel a Jakobus, ma Judas Iskariot el ngikel ulterur a Jesus. 17A Jesus er a lorael el me metengel er a bukl ngii ma re apostol er ngii, e ng mlo dechor er oberberk el chutem el ble le kldibel er ngii a re betok el obengkel. Ng dirrek el mlar ngii a klou el seked er a re chad el mlar a Judea el rokir, ma Jerusalem, ma beluu er a tkul a daob er a Tyre ma Sidon 18el leko te mo orrenges er ngii, me ngii lomekungil a rektir. Tirkel lulemekcharm er tir a mekngit el chelid el mlong a mlo ungil. 19Ma rokui el chad a mlo blak a rengrir el mo merutech er ngii ele ng mlar ngii a klisiich el tilobed er ngii el omekungil er tir el rokui. 20A Jesus a ulemes er a rubengkel e dilu el kmo, “Kom ngeltengat a re mechebuul, ele Rengedel a Dios a klokliu! 21“Kom ngeltengat a re songerenger er chelechang, ele kom mo medinges! “Kom ngeltengat a re lmangel er chelechang, ele kom mo ocherechur! 22“Kom ngeltengat a louketui er kemiu a re chad, e loldik er kemiu, e loltuub er kemiu, e lolekoi el kmo kom mekngit, el Ngelekel a Chad a uchul! 23Sel bo le ua isei, e bo lungil a rengmiu e mordekekl er a deurreng, ele klou el omeksulliu a kldmokl er a eanged el kiriu. A ruchelir a mirruul choua isel tekoi el mor a re profet. 24“Ngdi kom kmal chebuul a re merau er chelechang, ele kom mla ngmai a klungioliu. 25“Kom kmal chebuul a re medinges er chelechang, ele kom mo songerenger! “Kom kmal chebuul a rucherechur er chelechang, ele kom mo lmangel e mengebechub! 26“Kom kmal chebuul a lechat er kemiu a re chad, ele ruchelir a millekoi choua isel tekoi el kirir a re diak le meral profet. 27“Ngdi ngak a dmu er kemiu el orrenges er ngak el kmo: Bo le betik a rengmiu er a re cherrouiu, e moruul a ungil el mor tirkel ouketui er kemiu, 28momekngeltengat er a re melebeakl er kemiu, e moluluuch el kirir a re mekngit a tekingir er kemiu. 29Ma le ngar ngii a chosuerngii a bita er otengem, e bechere me le dirrek el chosuerngii sel bitang; ma lsekum ng ngar ngii a nguu a ikrel a bilem, e lak mongreos er a chelsel a bilem. 30A le ngar ngii olengit a ngera er kau e bsang, e a le ngar ngii a nguu a kloklem, e lak mluut el mo melai er ngii. 31Moruul el mor a re chad a ikel somiu a loruul el ekor kemiu. 32“A lsekum ngdi betik a rengmiu er tirkel betik a rengrir er kemiu, e ng ngeral klungiaol ekor kemiu? A re meruul a klengit a dirrek el kaubltikerreng. 33Ma lsekum kom di meruul a ungil el mor tirkel meruul a ungil el ekor kemiu, me ng diak a klungiaol el ekor kemiu; ele re meruul a klengit me te dirrek el ua isei. 34Ma cho di mkengei er tirkel modengelterir el kmo te mo oluut a ildisel a ikel loleng el klokliu, me ng diak le klungiaol el kiriu. A re meruul a klengit me te dirrek el keleng a klalo, e olluut er osisiu el ildisel a klalo el le lileng. 35Lak mua isei! Bai bo le betik a rengmiu er a re cherrouiu, e moruul a ungil el mor tir; e lak mola medal a lleng el klokliu. Cho bo mua isei, e ng mo klou omeksulliu, me kemiu a mo ngelekel a Kot el Ngarbab el Dios. Ele ngii a ungil el mor a re diak loreng a saul ma re dengerenger. 36Me bo mchubechub el ua Demmiu el chubechub. 37“Lak di mereched el omdasu a mekngit el kirir a re chad, me lak bo loukerrekeriil er kemiu a Dios; e lak molebeakl er a re chad, me lak bo lolebeakl er kemiu a Dios; mousubes a kngterir a re chad, ma Dios bo lousubes a kngtmiu. 38Bo bekerurau el mor a re chad ma Dios bo le bekerurau el ekor kemiu. Ng ulterekokl el kmal mo bekerurau el ekor kemiu me ng mo oitel a ikel lomeskemiu el mor sel cherrungel el telkelel a sebechiu el ngmai. Ele sel olkael el mousbech er ngii el kirir a re chad isei a bo lousbech er ngii a Dios el kiriu.” 39A Jesus a uluuchais er tir er tial okesiu el kmo, “A meiko a diak el sebechel el mengetakl er a kuk tar a meiko, ele le ua isei e te di dul mo ruebet er a delebedeb. 40Ng diak a ngalek er a skuul el kuk ngarbab er a sensei er ngii; ngdi ngalek er a skuul sel le cherrungel el rokui omesubel e ng mo ua sensei er ngii. 41“Ngera me komes er a chieb er a medal odam er kau, e diak mudesuii a kerrekar el ngar a medam? 42Cholebo e ng diak el sebechem el mesa kerrekar el ngar a medam, e mekera e sebechem el melekoi er odam er kau el kmo, ‘Msall e rrang, e knguu a chieb er a medam’? E a cheblad! A kot e mnguu a kerrekar er a medam me bo le bleketakl osengem me le sebechem el mesa chieb er a medal odam er kau. 43“Ng diak a ungil el kerrekar el ourodech a mekngit el rodech, el ka mekngit el kerrekar el ourodech a ungil rodech. 44A bek el kerrekar a bo dodengei er a redechel; ng diak a melai a redechel a kerrekar el fig er a tochedulik, el diak a mengib a kreip er a bara er oreomel. 45A ungil chad oltobed a ungil er a ungil el omsengelel a rengul, ma mekngit el chad oltobed a mekngit er a mekngit el omsengelel a rengul. Ele ikel mui er a reng a me tuobed er a ngor. 46“Ngera me kom omekedong er ngak el kmo, ‘Rubak, Rubak.’ e diak moruul a ikel kdu er kemiu? 47Ngikel mer ngak el orrenges a tekingek e olab, a bo kuchotii el kmo ng ua techang. 48Ng ua tal chad el omekedechor er a blil, me ng kiesii a chutem el mo dmolech, e loia uchetemel a blil er a risois. Ng miltengel a imui er omoachel ma eeleb a mlor ngii el blai, e ngdi dimlak le simesmengii ele ng mle ungil el ulekedechor. 49Ngdi ngikel orrenges a tekingek e diak loltirakl a ua tal chad el omekedechor er a blil el di diak a uchetemel; me sel le bor ngii a eeleb e ng di mereched el muukel el di me mecherad.”

will be added

X\