LUKAS 5

1A tar a klebesei e a Jesus a dilechor er a tkul a Daob er a Genesaret e a re chad a ketitech el mor ngii el leko te mo orrenges a tekingel a Dios. 2E a lomes a teblol bos e ng ulengasech, e a re chad er omenged a mla mechei e tir a merisu a ukedir. 3Ma Jesus a diliderekl er a bos er a Simon, el tar ngii el bos e ullengit er ngii me ng odbechii el telkib el mo cheroid er a beluu. Ma Jesus a mlo dengchokl er a bos e ullisechakl er a seked. 4E a bocha le merek el mengedecheduch e ng dmu er a Simon el kmo, “Mnguu a bos el oikal mor a dmolech, e kau ma re kldemem motengel a uuked el nguu a telekesokes.” 5Ma Simon a dilu el kmo, “Mastang, aki mlar a chei el tal kesus e di dimlak a cheldmam; ngdi ke melekingang mak mo otengel a uuked.” 6Me tultengel a uuked el kosokes a betok el ngikel me kilong mesodel a ukedir. 7Me te mocha rnelau er a re bebil er tir el ngar sel tar a bos el mo olengeseu er tir. Me te mlong me te mekeek ngiil erul bos el kmal mlo ruumk me kilong ruchorech. 8E a Simon Petrus er a lesa tial tekoi e ng mlo outubuach er medal a Jesus e dilu el kmo, “Rubak, bo mcheroid er ngak, e ngak a mekngit el chad!” 9Ngii me tirkel bebil er a re chad el ulebengkel a rokui el mlo mechas a rengrir er a ildisel a ngikel el le kilsokes. 10A Jakobus ma Johanes el ngelekel a Sebedeus el le dilak el ngar a chei tir ma Simon me ng dirrek el mlo mechas a rengrir. Ma Jesus a dula er a Simon el kmo, “Lak medakt, e chelechal mong e ke mo mengesokes er a re chad.” 11Me te mocha ongasech a bos er a beluu, e meche rokui el tekoi e mo oltirakl er a Jesus. 12A tar a klebesei e a Jesus a mlar a tal beluu el mlar ngii a chad er ngii el mle chebedes. E ser a lesa Jesus e ng mlo chebecheb er a chutem e ullengit er ngii el kmo, “Rubak, chomko ng soam, e ng sebechem el kikidak!” 13Ma Jesus a uldersii a chimal el rutechii e kmo, “Ng soak, me bo mklikiid!” Me ng di mle mereched el mo ungil ngiil chad. 14E a Jesus a milengelechel er ngii el kmo, “Kele mouchais er a ngii di le chad. Ke bai di melemalt el mor a prist me ng mesekau e ochotau er a re chad el kmo ke mla mo ungil e tongetengii a tenget el oltirakl a ikel le dilu Moses.” 15A chisel a Jesus a mengal uleberk, ma kloul seked er a re chad a mlong el leko te mo orrenges er ngii, e ngii bo lomekungil a rektir. 16Ngdi Jesus a mle blechoel el mor a diak a chad er ngii e meluluuch. 17A tar a klebesei, e a re bebil Farisi ma re sensei er a Llach el mlar a bek el beluu er a Galilea, ma Judea, ma Jerusalem a dilengchokl er a lolisechakl a Jesus. Ng mlar ngii a klisichel a Rubak er a Jesus el omekungil er a re smecher. 18A re bebil el chad a uleba tal chitechut el chad el ngar a dukllel, e millasem el olsiseb er ngii er a blai el mor medal a Jesus. 19E ngdi kmal mle meseked me ng dimlak el sebechir el osisebii. Mitia e te nguu el ngmasech el mor bebul a blai e rullii a sebechir el oimimii er ngii, e oimimii el ngar a dukllel e otetechii er a delongelel a seked el mor medal a Jesus. 20Ma Jesus er a lesa el kmo toumera tirkal chad e ng dilu er ngikal chitechut el kmo, “Rrach, a kngtim a mla musubes.” 21Ma re sensei er a Llach ma re Farisi a mocha ngemuu el kmo, “Ng techal chad ngikang el melekoi a ua isel otubel a Dios? Ng di tal Dios a sebechel el ousubes a klengit!” 22A Jesus a mle medengei a uldesuir me ng uleker er tir el kmo, “Ngera me kom melebedebek a ua isel tekoi? 23Ng ngera bai beot, a de du el kmo, A kngtim a mla musubes.’ ma lechub e de du el kmo, ‘Bekiis e morael’? 24A le ua isei e ak mo ochotii er kemiu el kmo a Ngelekel a Chad a ngar ngii a klisichel er tial beluulchad el ousubes a klengit.” E sola e dula er ngikal chitechut el kmo, “Ak dmu er kau el kmo bekiis el nguu a dukllem e morael el mor a blim!” 25Te rokui el milsa ngiil chad el di milekiis el nguu a dukllel, e merael el mo remei el oldanges er a Dios. 26Me te rokui el kmal mlo mechas a rengrir! Te kmal mlo medakt e uleldanges er a Dios el kmo, “Ng meral ongasireng el tekoi a bla desa er chelechal sils!” 27Uriul er itiang, e a Jesus a tilobed el merael e mesa tal chad er omelai el tax el Levi ngklel, el dengchokl er a blil a omelai el tax me ng dmu er ngii el kmo, “Mei, me mobengkek.” 28Ma Levi a milekiis el mechei a rokui el tekoi, e mlo oltirakl er a Jesus. 29E sola e a Levi a rirellii a klou el blengur er a blil el kirel a Jesus, e a re betok er tirkel mlar a blengur a mle chad er omelai el tax mar kuk di bebil er a re chad. 30Ma re bebil el Farisi ma re bebil er tir el sensei er a Llach a mlo ngemuu e mlor a rubengkel a Jesus e oker er tir el kmo, “Kemiu ngera me ko mengang e melim el obengterir a re melai a tax ma re mekngit e ketiaol chad?” 31Me ng ulenger er tir a Jesus el kmo, “A re smecher ousbech er a toktang, e a re mesisiich a diak. 32Ngak a mlei el diak kumekedong er a re melemalt, e ak bai omekedong er a re mekngit e ketiaol chad me te mo obult.” 33A re bebil el chad a mlor a Jesus e kmo, “A rubengkel a Johanes a mle mekudem el olsengerenger e meluluuch, ma rubengterir a re Farisi me te ua isei; e a rubengkem a di meruul a blengur.” 34Ma Jesus a dilu el kmo, “Cho momdasu, e ng sebechir a re chad el mlor a mur er a chebechiil el mo songerenger a lobengterir ngikel chad el mlo bechiil? Ng kmal diak! 35Ngdi sel le mengai er a delongelir ngikel mlo bechiil, e seikid e te mochu olsengerenger.” 36A Jesus a dirrek el millekoi er tial okesiu el mor tir el kmo, “Ng diak a chad el mesodel er a beches el bail el oba el melabek er a mechut el bail. A le uai isei, e ng mla sodelii a beches el bail, e sel beches el mamed a diak lungil el dmak ngii ma mechut. 37El ka chad el oleitel er a beches el bilong er a mechut el blil a bilong, ele beches el bilong a oibekii a blil el mechut el budel a charm me ng metemall ma bilong a mechubel. 38Ng bai kirel a beches el bilong el moitel er a beches el blil a bilong! 39A chad el mla ngilmii a mechut el bilong a diak el soal a beches, ele ng kmo, ‘A mechut a bai ungil.’”

will be added

X\