LUKAS 3

1Ser a ongetruich ma eim er a rak er a lorreder a Kaiser Tiberius, ma Pontius Pilatus le kabernor er a Judea, ma Herodes lorreder er a Galilea, ma obekul er a Filip lorreder er a beluu er a Iturea ma Trakonitis, ma Lisanias lorreder er a Abilene, 2ma Anas ma Kaifas le Ngarbab el Prist, e a tekingel a Dios a mlor a Johanes el ngelekel a Sekaria el ngar a ked. 3Misei e a Johanes a mlor a ikel beluu el rokui el ngar bita er a Omoachel Jordan e ullisechakl el kmo, “Mobult er a kngtmiu, e bo metecholb, me lousubes a kngtmiu a Dios.” 4Ng ua llechukl er a babier er a Profet Isaia el kmo: “Ng ngar ngii a ngar a ked el oldiu el kmo: ‘Mkedmeklii a rolel a Rubak; mlemeltii a rael el bo loeak ngii! 5A bek el dellas bo le mokeek, ma bek el bukl ma rois bo le moded; ma mechebirukel el rael bo le melemalt, ma mekngit el rael le meruul el mo ungil; 6e a rokui el chad er a beluulchad a mo mesa Osobel er a Dios!’” 7Te kmal betok el chad a mlor a Johanes el mo metecholb. Me ng dilu er tir el kmo, “E a, kom kor a charm! Ng techa dilu er kemiu el kmo ng sebechiu el chemiis er sel merkung el kerrekerilel a Dios? 8Mochotii olechotel el kmo kom mla obult er a kngtmiu, e lak mkatekoi el kmo kom ngelekel a Abraham. Ak subedemiu el kmo a Dios a sebechel el remuul a ikal bad el mo ngelekel a Abraham! 9A otilech a kldmokl el omukel a kerrekar er ollemelel, ma bek el kerrekar el diak lourodech a ungil rodech a mo medebes e obidokl er a chelsel a ngau.” 10Ma re chad a uleker er ngii el kmo, “A le ua isei, e aki mekerang?” 11Me ng dilu er tir el kmo, “Ngikel teblo chelechedal a bilel, le nguu a tang el msa tar a chad el diak a chelechedal a bilel, me ngikel ngar ngii a kelel a kirel el rousii.” 12E a re bebil el chad er omelai el tax a mlong el leko te mo metecholb, me tuleker er ngii el kmo, “Sensei, e kemam a mekerang?” 13Me ng dilu er tir el kmo, “Lak molai a udoud el kuk ngar bab er sel kirel el telkael.” 14Ma re bebil el soldau a dirrek el uleker er ngii el kmo, “E kemam, ng ngera ki bo moruul?” Me ng dilu er tir el kmo, “Lak moba orimel el melai a ududel a tar a re chad ma lechub e mongesuul el oltutakl er a tar a chad. Bo lungilbesul er a rengmiu a ildisel a ududiu.” 15Itia e ng mocha er ngii omeltkir a re chad, e te mocha omdasu el kmo a Johanes kele le ngii a Mesias. 16Ma Johanes a dula er tir el rokui el kmo, “Ngak a melecholb er kemiu el olab a ralm, e ngdi ngar ngii a merekung el kuk ngarbab er ngak, el ngak a diak kredemelel a melubet oecherel. Ingii a mo melecholb er kemiu el oba Chedaol Reng ma ngau. 17Ng oba sebel el meleakl a budel a redechel a wheat e mesuk er a chelsel a soko. A budel a lolul er a kmal diak le mad el ngau.” 18A Johanes a ullisechakl er a Ebangkelio er a re chad el okiu a betok el kakerous el rolel e orrimel er tir me te melodech a blekerdelir. 19Ngdi Johanes a chileklii a Herodes el merreder, ele ng mlo bechil a Herodias el bechil a tar ngii, e dirrek el betok el mekngit el tekoi a lurruul. 20E a lmuut el kmal mekngit el le rirellii a Herodes, a ngiluu a Johanes el sukur er a kelebus. 21Uriul er a bla le metecholb a rokui el chad, e a Jesus me ng dirrek el mlo metecholb. E ser a loluluuch e a eanged a ulebok, 22e a Chedaol Reng a mlo metengel er bebul el ua teletelel a belochel. E a ngor a mlar a eanged e melekoi el kmo, “Kau a betik er a renguk el Ngelekek, el odeuir a renguk.” 23A Jesus a ulemuchel er a urerel er a le bekord 30 rekil. E a re chad a ulemdasu el kmo ng ngelekel a Josef el ngelekel a Heli. 24A Heli a ngelekel a Mathat el ngelekel a Levi, ma Levi a ngelekel a Melki el ngelekel a Janai, ma Janai a ngelekel a Josef 25el ngelekel a Matathias, ma Matathias a ngelekel a Amos el ngelekel a Nahum, ma Nahum a ngelekel a Esli el ngelekel a Nagai, 26ma Nagai a ngelekel a Maath el ngelekel a Matathias, ma Matathias a ngelekel a Semein el ngelekel a Josek, ma Josek a ngelekel a Joda 27el ngelekel a Joanan, ma Joanan a ngelekel a Resa el ngelekel a Serubabel, ma Serubabel a ngelekel a Sealtiel el ngelekel a Neri, 28ma Neri a ngelekel a Melki el ngelekel a Adi, ma Adi a ngelekel a Kosam el ngelekel a Elmadam, ma Elmadam a ngelekel a Er 29el ngelekel a Josua, ma Josua a ngelekel a Elieser el ngelekel a Jorim, ma Jorim a ngelekel a Mathat el ngelekel a Levi, 30ma Levi a ngelekel a Simeon el ngelekel a Juda, ma Juda a ngelekel a Josef el ngelekel a Jonam, ma Jonam a ngelekel a Eliakim, 31el ngelekel a Melea, ma Melea a ngelekel a Menna el ngelekel a Matatha, ma Matatha a ngelekel a Nathan el ngelekel a David, ma David a ngelekel a Jesse, 32el ngelekel a Obed, ma Obed a ngelekel a Boas el ngelekel a Salmon, ma Salmon a ngelekel a Nason, 33el ngelekel a Aminadab, ma Aminadab a ngelekel a Admin el ngelekel a Arni, ma Arni a ngelekel a Hesron el ngelekel a Peres, ma Peres a ngelekel a Juda, 34el ngelekel a Jakob, ma Jakob a ngelekel a Isak el ngelekel a Abraham, ma Abraham a ngelekel a Tera el ngelekel a Nahor, 35ma Nahor a ngelekel a Serug el ngelekel a Reu ma Reu a ngelekel a Peleg el ngelekel a Eber, ma Eber a ngelekel a Sela, 36el ngelekel a Kainan, ma Kainan a ngelekel a Arfaksad el ngelekel a Sem, ma Sem a ngelekel a Noah el ngelekel a Lamek, 37ma Lamek a ngelekel a Methusela el ngelekel a Henok, ma Henok a ngelekel a Jared el ngelekel a Mahalaleel, ma Mahalaleel a ngelekel a Kenan, 38el ngelekel a Enos, ma Enos a ngelekel a Seth el ngelekel a Adam, ma Adam a ngelekel a Dios.

will be added

X\