LUKAS 22

1A belsechel a Baskua el Chedaol Sils er a Diak Omkukel Blauang a mocha kmeed, 2ma re bderrir a re prist ma re sensei er a Llach a mle medakt er a re chad, me tulsiik a cheldechulel e di berrotel el mekodir a Jesus. 3A Satan a siliseb er a Judas el tar a re truich ma terul obengkel a Jesus el lomekedo er ngii el Iskariot. 4Ng tilobed a Judas el mo mengedecheduch er a re bderrir a re prist ma re merreder er a re mengkerengel a Templo el osiik er a mo ungil rolel e loterur a Jesus er tir. 5Ng mlo ungil a rengrir er ngiil tekoi me te dilu el kmo te mo msa udoud el kirel. 6A Judas a kilengei er itiang e mocha osiik a cheldechulel e lak bo lodengei a re chad, e ngii le nguu a Jesus el mesterir. 7E merma Chedaol Sils er a Diak Omkukel Blauang, el sel kirel el okodall er ngii a ngelekel a sib el kirel a blengur er a Baskua. 8Ma Jesus a uleldurech er a Petrus ma Johanes e dilu er tir el kmo, “Bo mkedmeklii a blengur er kid er a Baskua.” 9Me tuleker er ngii el kmo, “Ng soam a bo kim kedmeklii er ker?” 10Me ng dilu el kmo, “Sel bo msiseb er a beluu e kom mo osiueklii a tal chad el oba ollumel el ralm, me kom mo okiuellel el mor sel blai el bo letuu er ngii, 11e mo dmu er a rubak er sel blai el kmo, A Sensei a oker er kau el kmo, ng ngar ker sel delemerab el bo kimoruul er a blengur er a Baskua er ngii ngak ma rubengkek?’ 12Ng mo ochotii er kemiu a klou el delemerab er a nikai el di ngar ngii a bek el klekedall er ngii me kom mo kudmeklii a blengur er isei.” 13Te mirrael el mong e miltik a bek el tekoi el di ua ikel le dilu er tir a Jesus, me te kildmokl a kirel a blengur er a Baskua. 14E a bocha le belsechel, e a Jesus a mlor a tebel er a blengur me ng dilengchokl el obengterir a re apostol. 15Ng dilu er tir el kmo, “Ak kmal di uluureng el mo omengur el obengkemiu er tial blengur er a Baskua er uchei er a bo kcharm! 16Ele ksubedemiu el kmo, ng diak kluut el mor ngii el blengur el dimerkmo bo letaut sel meral belkul er a Rengedel a Dios.” 17E sola e a Jesus a ngiluu a kob, e mirreng a sulel a Dios e dilu el kmo, “Mnguu tial rousii er a delongeliu. 18Ak subedemiu el kmo chelechal mong e ng dikea kulim er tial bilong el dimerkmo le mei a Rengedel a Dios.” 19E sola e ngiluu a blauang, e mereng a sulel a Dios e mechedii e mesterir e dmu el kmo, “Tia bedengek el mo modars el kiriu. Moruul er ngii el kirel omeltkiu er ngak.” 20E a uriul er a belsoil e ng dirrek el ngiluu a kob el mesterir e dmu el kmo, “Tial kob a beches el telbilel a Dios el mo mutebechel er a rsechek el mo modars el kiriu. 21“Ngdi mesang, ngikel olterau er ngak a kimdak el ngar tial tebel! 22A Ngelekel a Chad a mo mad el di ua sel bla le tibir a Dios, ngdi kmal mo chebuul ngikel chad el olterau er ngii!” 23Me te mocha kakerker el kmo ng kol techa er tir a mo meruul er tial tekoi. 24Ng dilubech a klaititekangel er a delongelir el kmo ng kol techa er tir a kot el ngarbab. 25Ma Jesus a dilu er tir el kmo, “A re king er a re diak loumera er a Dios olab a klisiich el mengedereder er a re chederir, ma re merreder a sorir a lomekedo er tir el kmo, ‘Te Sechelirir a re chad.’ 26Ngdi tia diak le ua isei el kiriu; ngikel kot el ngarbab er a delongeliu a bai kirel el mo kot el ngariou, me ngikel mengetikaik a kirel mo ua mesiou. 27Ng techa ngarbab; ng ngikel dengchokl el omengur ma lechub e ng ngikel mesiou er ngii? Ng ulterekokl el ngikel dengchokl ingikei ia ngarbab. Ngdi ngak a ngar a delongeliu el di ua ia mesiou. 28“Kemiu a di ulebengkek er a chelsel a rokui el ongarm el mler ngak; 29misei e ak mo meskemiu a klisiich el mo mengedereder, el di ua Demak el mla meskak a klisiich el mo mengedereder. 30Kom mo omengur er a tebelek el ngar a Rengedek, e mo dengchokl er a kingall er omerreder e mengedereder a tacher ma teblol klebliil er a Israel. 31“Simon, Simon! Morrenges! A Satan a mla nguu a turk el mo mengarm er kemiu el rokui, e meleakl er a re ungil er a re mekngit, el ua chad er a sers el meleakl a techel a redechel a wheat er a budel. 32Ngdi ngak a mla meluluuch el kirem e Simon, me lak bo mechitechut el oumerang. E sel mleta el mer ngak, e ng kirem el smisicheterir a rudam er kau.” 33Ma Petrus a dilu el kmo, “Rubak, ngak a kldmokl el obengkem el mor a kelebus, e mo mad el obengkem!” 34Me ng dula Jesus el kmo, “Petrus, ak subedau el kmo, chelechal kesus e sel lorros a malk e kau a mla mo edei el moumededenger er ngak.” 35E a Jesus a uleker er a rubengkel el kmo, “Ser a kuderchemiu el di dimlak molab a chidib, ma tutuu, ma lechub a oeacher, e ng ngar ngii a mlo ngesonges er kemiu?” Me tulenger el kmo, “Ng dimlak.” 36Ma Jesus a dilu el kmo, “Chelechang, e ngikel ngar ngii a chidbengel ma lechub e ng tutungel a kirel el nguu; me ngikel diak a saider er ngii a kirel el oterur a ikrel a bilel e mecherar a tar a saider. 37Ele ksubedemiu el kmo a ikel lolekoi a Chedaol Llechukl el kmo, ‘Ng obasech el tar a re mekngit,’ a mo tmaut el kirek, ele ikel llechukl el kirek a toutang.” 38Ma rubengkel a dilu el kmo, “Rubak, a ikakid eruol saider el ngar tiang!” Me ng dilu el kmo, “A ilecha ungiang!” 39A Jesus a tilobed er a Jerusalem el mor a Rois er Olib el di ua ngar a mong; ma rubengkel a le dilak el mong. 40Me tia er a le bochang e ng dilu er tir el kmo, “Moluluuch me lak kom mekesuseu er ongarm.” 41E ngii a ngilseklii er tir el mo cheroid el ua cherridel a teluetech el bad e mlo outubuach e meluluuch. 42Ng dilu el kmo, “Chedam, a lungil er a rengum, e mnguu tial kob er a ringel el choridii er ngak. Ngdi motireklii sel soam, e lak el sel soak.” 43E a tal anghel a mlar a eanged el mo duum er ngii e millisiich er ngii. 44Ng kmal mlo chuarm er a ringel me ng mengal mlo blak a rengul el meluluuch, ma klsbengel a mlo ua ngimech el rasech el olechars er a chutem. 45E a le merekong el meluluuch me le bekiis el merael el lmuut el mor a rubengkel e ng miltik er tir el mla imiit a mederir, el mechitechut a bedengir er a kngtil a rengrir. 46Me ng dilu er tir el kmo, “Ng ngera me kom mechiuaiu? Bekiis e moluluuch me lak kom mekesuseu er ongarm.” 47Me ng dirk mengedecheduch a Jesus, e a klou el seked a dumiang, e a Judas el tar a re truich ma terung a oba medal omerael. Me ng mlor a Jesus el mo melungel er a medal. 48Ma Jesus a dilu el kmo, “Judas, koba omelungel el mad el olterau er a Ngelekel a Chad?” 49Ma rubengkel a Jesus el mlar bitar ngii er a lesenge tial mochar ngii, e tuleker el kmo, “Rubak, aki melauch ku el olab a saider?” 50E a tar tir a millauch er a mesiungel a Ngarbab el Prist el dobesii a kadekmel a dingal. 51Ma Jesus a dilu el kmo, “Ng ungiang!” E ulerekedii sel le mlar ngii a dingal me ng liluut a dingal er a smechel el lulemekungil er ngii. 52E a Jesus a dula er tirkal mlo melai er ngii el bderrir a re prist ma re ofiser er a re mengkerengel a Templo ma re mechuodel el kmo, “Ngak ak ua dengerenger el chad, me kom mei el olab a saider ma chelebed? 53Ak ulebengkemiu er a bek el sils er a Templo, e dimlak molasem el omdechem er ngak. Ngdi chelechal longedereder a klisichel a ilkokl, e ng kiriu el ua isei.” 54Me te mildechemii a Jesus e nguu el mor a blil a Ngarbab el Prist; e a Petrus a uleak ullir el di mle cheroid. 55Ng mlar ngii a ngau el ngar a belngel a mekesokes ma Petrus a mlo dengchokl el teloi er a re chad el iliuekl er ngii. 56E a tal mesiou el redil er a lesang el dengchokl er bita er a ngau, e ng ullengeng er ngii e dmu el kmo, “Ngikal chad a dirrek el ulebengkel a Jesus!” 57Ma Petrus a dilu el kmo, “E a kel dil, ng kmal diak kudengelii el chad!” 58E dimlak bo le meketeket e a tar a chad a dilengchii a Petrus me ng dmu el kmo, “Kau a dirrek el tar tir!” Ma Petrus a dmu el kmo, “A rrach, ngak a diak ktar tir!” 59E a bocha lechib a bekord tal sikang e a kuk tar a chad a kmal uluutekangel el kmo, “Ngikal chad a ulterekokl el ulebengkel a Jesus ele ng dirrek el chad er a Galilea!” 60Me ng dula Petrus el kmo, “A rrach, ng diak kudengei a ilechal molekoi!” Me ng dirkak bo le merek el melekoi e a malk a merros. 61Ma Rubak a meltii el omes er a Petrus, ma Petrus a mlo lmatk a tekingel a Rubak er a ledu er ngii el kmo, “Uchei er a lorros a malk e ng mo edei el moumededenger er ngak.” 62Itia e a Petrus a tilobed el mor rikl e lilangel el kmal mekngit a rengul. 63Tirkel chad el milengkar er a Jesus a millenguul er ngii e mengelebed er ngii. 64Te lilechet a medal e mengelebed er ngii e dmu er ngii el kmo, “Ka molangch el kmo ng techa chillebedau!” 65Ng betok el tekoi er otuub a lullekoi el mor ngii. 66E a bocha le mellomes, e a re mechuodel, ma re bderrir a re prist, ma re sensei er a Llach a mlo kldibel e nguu a Jesus el mor mederir a re chad er Olbiil. 67Me tuleker er ngii el kmo, “Ka msbedemam el kmo, kau ke Mesias?” Me ng ulenger el kmo, “A bo ksbedemiu e ng diak bo moumera er ngak; 68ma bo kuker er kemiu er a tar a ker, me ng diak bo monger er ngii. 69Ngdi chelechal mong e a Ngelekel a Chad a mo dengchokl er a kadekmel a Dios el Olab a Bek el Klisiich.” 70Me te rokui el uleker el kmo, “A le ua isei, e kau ke Ngelekel a Dios?” Me ng dmu er tir el kmo, “Ng kemiu a melekoi el kmo ak Ngelekel a Dios.” 71Me te dula el kmo, “Ng dikea dousbech er a re ngodech el ocholt; ele kede mla remenges er a ngerel!”

will be added

X\