LUKAS 21

1A Jesus a mirriik e milseterir a re merau el chad el melecha tengetengir er a blil a tenget er a Templo 2e dirrek el milsa tal kmal chebuul el melakl dil el lilecha teblol sens. 3Me ng dilu el kmo, “Ak dmu er kemiu el kmo ngikal melakl dil a lilecha kuk betok er a le lilecha re bek el chad. 4Ele tirkel bebil er a re chad a millenget a ikel oumeder er tir; e ngdi ngikal redil a ua ise chelebulel e lilecha rokui el lousbech er a klengar er ngii.” 5A re bebil er a rubengkel a Jesus a mle katekoi el kirel a Templo el kmo ng meral klebokel a ikel bad er ngii ma tenget el modars er ngii el mor a Dios. Ma Jesus a dilu el kmo, 6“A tar a klebesei e a ikal rokui el momes er chelechang a di mo obriid el mo diak a di chimol bad el mo medechel er sel le ngar ngii.” 7Me tokere el kmo, “Sensei, ng mor ngii er oingerang? E ngera mor ngii el olechotel el kmo ng mla me sel belsechel el le bor ngii a ikang?” 8Ma Jesus a dilu el kmo, “Kom mo kerekikl me ng diak mecheuid. Te betok el chad a mei el mo oba ngklek e melekoi el kmo, ‘Ng ngak ingii!’ e dirrek el kmo, ‘Ng mla me belsechel!’ Ngdi kele bo moltirakl er tir. 9Cho bo mrenges a mekemad ma uldikel e lak bo medakt; ele ika kirel el omuchel el mei, ngdi diak di le mereched el mo ulebongel.” 10Ng dirrek el dilu el kmo, “A meklou el beluu a mo kaumekemad; ma renged a mo kaodechelakl. 11E mor ngii er ker me ker a kdekudel el desiu, ma bosech, ma meringel el rakt; e mor ngii a ngodech ma kdekudel el tekoi el ngar a eanged el mei. 12Ngdi uchei er a le bor ngii a ikal rokui, e kom mo mudechem e modechelakl; kom mo mukerrekeriil er a blil ongdibel e mo mekelebus; kom mo mengai el mor mederir a re king ma re merreder el ngak a uchul. 13Itia ia mo techelliu el ouchais er a Ungil Chais. 14Kom mtebechel a uldesuiu er uchei er isel belsechel me lak bo bekikl el kmo ng mekera cho bo mosaod er kemiu, 15ele kmo meskemiu a tekingiu ma llemesiu, ma re cherrouiu a mo diak lesaod ma lechub e lutekangel. 16A re demmiu ma re delemiu, ma re tar kemiu, ma re chedemiu, ma re sechelimiu a mo oltutakl er kemiu; ma re bebil er kemiu a bo lomekoad er tir. 17A re bek el chad a mo ouketui er kemiu el ngak a uchul. 18Ngdi diak a di teluol chui er a bdelmiu el mo remiid. 19A le meduch a rengmiu el outekangel, e kom mo osobel a klengar er kemiu. 20“Sel mesa Jerusalem el bla liueklii a re soldau, e bo modengei el kmo ng di kmedul metemall. 21Isei e tirkel ngar a Judea a kirir el chemiis el mor a rois; me tirkel ngar a Jerusalem a kirir el tuobed, me tirkel ngar a ikrel a diak be le siseb. 22Ele ikei a ikel ‘Sils el bo lobals er ngii a re chad,’ el mo oltaut a ikel rokui el lolekoi a Chedaol Llechukl. 23Ng kmal mo kdekudel el sils el kirir a redil el dioll ma rubeteterir a re tolechoi! A kdekudel ringel a mer tial beluu, ma Dios a mo omals er a re chad. 24A re bebil a mo mad er a saider, e a re bebil a mengai el mor a bek el beluu el mo kelebus; e a re diak loumera er a Dios a mo roderdii a Jerusalem el dimerkmo le mei a ulebengelel a omerrederir. 25“Ng mor ngii a ngodech el tekoi el duubech er a sils, ma buil, ma btuch. A re chad er a bek el beluu er tial beluulchad a mo suebek a rengrir el medakt er a derremkel a daob ma chedesaoch. 26A re chad a mo diak lodenge rengrir er a dakt sel longiil a ikel mochu er ngii er a beluulchad el rokir, ele ikel ngar ngii a klisichel el ngar a melidiul a mo tuobed er a ikel kirel el ngar ngii. 27Isei e a Ngelekel a Chad a me duum, el le mei e ng ngar a eabed el oba kloul klisiich ma klebkall. 28Sel lomuchel el mor ngii a ikal tekoi, e kom mekiis el mo dmangesbab ele osebeliu a kmedang.” 29E a Jesus a milengedecheduch er tir er tial okesiu el kmo, “Ka momdasu er a kerrekar el fig ma bek el kerrekar. 30Sel mues a llel el oldemiang e kom medengei el kmo a belsechel a kleald a kmedang. 31Me ng ua isei, sel mues a ikal tekoi el mochar ngii, e bo modengei el kmo a Rengedel a Dios a kmedal mei. 32“Lak mobes el kmo a ikal tekoi el rokui a mor ngii er uchei er a le mad a rokui el chad, el tir a chad er chelechang. 33A eanged ma chutem a mo nguemed e ngdi tekingek a kmal diak bo le ngemed. 34“Alii ng mo blak a rengmiu me ng diak di bo mechesang er a betok el meklou el blengur ma omelim ma ulekerreu er tial klechad, ele cho mua isei e kom mo kibetiekl a le me sel Sils 35el ua lobib a bedikl. Ele sel Sils a mei er a rokui el chad el ngar a beluulchad el rokir. 36Bo mklekar e di blechoel el meluluuch me le bor ngii a klisichiu el mtekangel a rengmiu er a ikel rokui el mor ngii el tekoi, me bo le sebechiu el dechor er medal a Ngelekel a Chad.” 37A Jesus a ullisechakl er a Templo, a le mellomes, e sel bo le kebesengei e ng tuobed el mor a Rois er Olib. 38E a bek el tutau e a rokui el chad omkokl el mor a Templo el mo orrenges er ngii.

will be added

X\