LUKAS 2

1A Kaiser Augustus a ultebedii a tekingel me le menga ulecherangel er a re chad er a rengedel a Rom el rokir. 2Tial kot el omelai er a ulecherangel er a re chad a mlor ngii er a le kabernor er a Siria a Kirinius. 3Isei e a re bek el chad a mlo meluches a ngklir er a ikel beluu el le chad er ngii. 4Ma Josef a mlar a Nasareth er a Galilea el mor a beluu er a Bethlehem er a Judea el sel le mlechell er ngii a King David. A Josef a mlor isei ele ng chad er a blil a David. 5Ng mlo meluches er a ngklel ngii ma Maria el mle telbiil el mo bechil. E ngiil Maria a mle dioll 6me ser a le ngar a Bethlehem e ng mocha belsechel el omechell. 7Me ng milechellii a ketengel el sechal, e mililii er a mamed e mekedusii er ongolel a charm. Ng mlo meseked a lengiil el blai me ng dimlak a bo le kiei er ngii. 8Isel beluu a mlar ngii a re bebil el mengkar a sib el mlar a ked er a klebesei el mengkar a delebechel el sib. 9E a tal anghel er a Rubak a mlo duum er tir ma klebkellel a Rubak a diliich el meliuekl er tir me te kmal mlo medakt. 10Me ngii el anghel a dilu er tir el kmo, “Lak kom medakt! Ngak olab a ungil chais el ekor kemiu, el ngii a mo mesterir a rokuil chad a klou el deurreng. 11Chelechal sils e a Osebeliu el ngii a Kristus el Rubak a mlechell er a belual a David. 12E tiakid a mo olechotel el ekor kemiu el kmo kom mo metik er a tal tolechoi el bliull er a mamed e ulekedurs er ongolel a charm.” 13E dimlak le meketeket e ng duum a cheldebechel er a re anghel er a eanged e ulebengkel ngiil anghel el oldanges er a Dios el kmo: 14“A odanges le bor a Dios el ngar sel kot el ngarbab el eanged, ma budech le bor tirkel dmeu a rengul a Dios er tir el ngar a beluulchad!” 15Me sera lluut a re anghel el merael el mor a eanged, e a re mengkar a sib a katekinga el kmo, “Mei, me dorael el mor a Bethlehem me desa tial tekoi el bla le sbedid er ngii a Rubak.” 16Isei e tulerreched el mong e mlo metik er a Maria ma Josef, e milsa ngiil tolechoi el ulekedurs er ongolel a charm. 17Me ser a lesang, e tuluuchais er a Maria ma Josef er a ikel le dilu anghel el kirel ngiil ngalek. 18Me tirkel rokui el rirenges a ikel lullekoi a re mengkar a sib a kmal mlo mechas a rengrir. 19Ma Maria kmal millebedebek ngii el tekoi er a chelsel a rengul. 20Ma re mengkar a sib a liluut el merael, e milengitakl odanges el mor a Dios el kirel a rokui el le rirenges e miles, el kmal di ua ikel le dilu er tir a anghel. 21E uriul er euid el klebesei, el bocha le belsechel el lobotk ngiil tolechoi, e ng mlungakl el Jesus, el ngii el ngakl a le bilsterir a anghel er uchei er a bo le dioll er ngii a delal. 22E a loltirakl a Llach er a Moses e ng mlo belsechel el bo lolenget a tenget er omengikiid el kirel a Josef ma Maria. Me te ngiluu ngiil ngalek el mor a Jerusalem el mo olecholt er ngii er a Rubak, 23el ua ikel llechukl er a llechul a Rubak el kmo, “A kot el ngalek el sechal a kirel el modars el mor a Rubak.” 24Te dirrek el mlo oldars a tenget el loltirakl a llechul a Rubak, ng teblol belochel er a ked ma lechub el teblol ulekeroul el ngelekel a belochel. 25Iseikid e ng mlar ngii a tal chad el Simeon a ngklel el kiliei er a Jerusalem. Ng tar a mle ungil chad, el meluu er a Dios, e milengiil er a Dios el me olsobel er a Israel. Ng mlar ngii er ngii a Chedaol Reng 26me ng silbedii el kmo ng diak le mad el dimerkmo bo lesa meltib el Mesias er a Rubak. 27Ma Simeon a milechetikaik er a Chedaol Reng el mo soiseb er a Templo. E a demal ma delal a Jesus er a le nguu el mo soiseb er a Templo el mo mengedmokl a ikel lolekoi a Llach el kirel, 28e a Simeon a kiluekuii ngiil ngalek e uleldanges er a Dios el kmo: 29“Chelechang e Rubak e ke mla otutii a telbilem, ma mesiungem a sebechel el merael el ngar a budech. 30A medak a mla mesa Osobel, 31el mkildmeklii er mederir a rokui el chad: 32El llomes el mo ochotii a uldesuel a rengum er a re Chisentael e mo uchul odengesir a re chedam el Israel.” 33Ma demal ma delal ngiil ngalek a mlo mechas a rengrir er a ikel tekoi el le dilu Simeon el kirel ngiil ngalek. 34E a Simeon a ulemekngeltengat er tir e dilu er a Maria el delal el kmo, “Ngikal ngalek a mlengilt er a Dios el kirel a rebetir ma ngesecheklir a re betok er a Israel. Ng mo olangch el mlar a Dios el lomtok er ngii a re betok el chad, 35misei e ng mo chemolt a berrotel el uldesuel a rengrir. E a klengiterreng el ua kedorm el oles a mo tomellii a rengum.” 36- 37Ng mlar ngii a tal chuodel profet el dil, el Hana ngklel, el ngelekel a Fanuel er a klebliil er a Aser. Ng di mle euid el rak el le bechiil e ng mad a bechil me ng di mle mesobil el mo 84 a rekil, e kmal dimlak bo le cheroid er a Templo. Ng milengull er a Dios er a llomes ma klebesei el olsengerenger e meluluuch. 38Isei el osisiu el sikang er a le ngar a Templo a Maria ma Josef, e ng mlei me ng mirreng a sulel a Dios e milengedecheduch el kirel ngiil ngalek el mor tirkel rokui el milengiil er a Dios el kirel olbetelel a Jerusalem. 39Ma Josef ma Maria er a le rekui a rokui el mle kirir el meruul el oltirakl er a llechul a Rubak, e te liluut el mo remei er a belurir er a Nasareth er a Galilea. 40E ngiil ngalek a mirrael el mo klou el ultebechel, e kmal mellomes a rengul e a Dios a mle ungil a rengul er ngii. 41E a bek el rak e a demal ma delal a Jesus a mlor a Jerusalem el mor a Chedaol Sils er a Baskua. 42Me ser a bo le truich ma eru rekil a Jesus, e te mlong el di ua bek el rak. 43E ser a bo le merek a chedaol sils, e te mirrael el leko te mo remei e ngdi ngalek el Jesus a dirk mlar a Jerusalem, e a demal ma delal a diak lodengei. 44Tulemdasu el kmo ng teloi er a seked e ngdi uriul er a tal sils, e te mocha osiik er ngii er a delongelir a re chederir ma re sechelirir. 45Ng dimlak le betik er ngii, me te liluut el mor a Jerusalem e osiik er ngii er sei. 46Ma ongede er a klebesei e te miltik er ngii er a Templo, el dengchokl er a delongelir a re sensei er a Judea el orrenges er tir e oker a ker er tir. 47E a rokui el ulerrenges er ngii a mlo mechas a rengrir er a llemesel a rengul a longer er tir. 48A demal ma delal a kilebetiekl er a lesang, ma delal a dula er ngii el kmo, “Rungalek, ngera me ke ua isei er kemam? Ngak ma demam a kmal mle suebek a rengmam e osiik er kau.” 49Me ng ulenger er tir el kmo, “Ngera me kom ulsiik er ngak? Ng dimlak modengei el kmo ng kirek el ngar a blil a Demak?” 50Ngdi tir a dimlak lutebengii a belkul a tekingel. 51Isei e a Jesus a liluut el obengterir el mor a Nasareth, e ulerrenges a tekingir. A delal a millebedebek er a rengul ngiil rokui el tekoi. 52E a Jesus a mirrael el mo meklou a bedengel ma llemesel a rengul, e dul mle ungil er a rengul a Dios e ungil er a rengrir a re chad.

will be added

X\