LUKAS 18

1A Jesus a milengedecheduch er a tal okesiu er a rubengkel el olisechakl er tir el kmo ng kirir el di blechoel el meluluuch el kmal diak bo le kekere rengrir. 2Ng dilu el kmo, “Ng mlar ngii a tal chad er a kerrekeriil er a chimol beluu el dimlak le medakt er a Dios ma ka lolengmes er a re chad. 3E mlar ngii a tal melakl dil er ngiil beluu el di ulemais el mor ngii e olengit er ngii el kmo, ‘Mngebetak er ngikel oltutakl er ngak 4Ng mle meketeket el di dimlak a ngeral le rellii ngiil chad er a kerrekeriil, e a uriul e ng melebedebek er a rengul el kmo, ‘Ngak a diak kmedakt er a Dios el diak kulengmes er a re chad, e 5ngdi ngikal melakl dil a di me mengesang er ngak, mak mochu oukerrekeriil el smodii me ng mengubet. Ele lak, e ng di omais el mei el mol oterkii a renguk!’” 6Ma Rubak a millemolem er a cheldechedechal el kmo, “Momtab a ikel le dilu ngikel mekngit el chad er a kerrekeriil. 7A le ua isei, e a Dios ng diak bo lungil el kongei er a re chedal el olengit a ngesou er ngii er a llomes ma klebesei? Ng kol mo meoud el olengeseu er tir? 8Ak subedemiu el kmo, ng di mo mereched el mo ungil el ngosuterir. Ngdi sel le mei a Ngelekel a Chad e ng kol me metik er a ruumerang el ngar a beluulchad?” 9A Jesus a dirrek el milengedecheduch er a okesiu er tirkel chad el omdasu el kmo ng di tir a ungil me ng metengel osengir er a re bebil er a re chad. Ng dilu el kmo, 10“A tar a klebesei e a re terul chad a mlor a Templo el mo meluluuch, a tang a mle Farisi, ma tang a chad er omelai el tax. 11Ngikal Farisi a mle ileakl el dechor e meluluuch el kmo, Ak mereng a sulem e Dios, ele ng diak kumerober a kloklir a re chad, el diak kungebirukel, ma lechub e le melaok a renguk el ua re bebil er a re chad. Ak mereng a sulem ele ng diak kua ngikel ngar sei el chad er omelai el tax. 12A tal sandei e a kulsengerenger el erul klebesei, e a ikel soiseb er ngak a kumeskau ongeltacher er ngii.’ 13E ngdi ngikel chad er omelai el tax a di dilechor er cheroid e dimlak lokisii a medal el bedul a eanged, e mirrusech er a ulul e dmu el kmo, ‘Dios, bo mchebkak, e ak mekngit el chad!’” 14A Jesus a dilu el kmo, “Ak subedemiu el kmo ng dimlak le ngikel Farisi, e ng bai ngikel chad er omelai el tax a mlo remei el melemalt er medal a Dios. Ele ngikel di ngii el olengesechekl er ngii a mo monganget, me ngikel di ngii el olenganget er ngii a mo mongesechekl.” 15A re bebil chad a ngilititerir a re ngelekir el mor a Jesus el leko bo lomor a chimal er tir. Ma rubengkel a Jesus er a leseterir e te chileklterir, 16e ngdi Jesus a ulemekedo er a re ngalek el mor ngii e dilu el kmo, “Bechititerir a re ngalek me le mer ngak e lak molekebai er tir, ele Rengedel a Dios a kirir a re ua itirkang. 17Lak mobes er tiang! Ngikel diak le nguu a Rengedel a Dios el ua kekerel ngalek a kmal diak bo le siseb er ngii.” 18Ma tal mengeteklir a re chad er a Judea okere er a Jesus el kmo, “Ungil Sensei, ngak ak mekera e mo nguu a diak a ulebengelel klengar?” 19Ma Jesus a dilu el kmo, “Ngera uchul me koleker er ngak el kmo ungil? Ng diak a chad el ungil ng di tal Dios. 20Kau a medenge llach el kmo: ‘Lak le melaok a rengum; lak momekoad; lak morechorech; lak momulak el oltutakl er a tar a chad; mongull er a demam ma delam.’” 21Me ngiil chad a dula el kmo, “A ikal rokui el llach a di kullab er ser a kkekerei el mer chelechang.” 22Ma Jesus er a le renges a tekingel e ng dilu er ngii el kmo, “Ng dirk ngar ngii a tar a tekoi el kirem el meruul er ngii. Bo moterau a ikel ngar ngii er kau el rokui e mrous a cheral er a re mechebuul, me le bor ngii a uchul a iltetem er a eanged; e sola e mei me moltirakl er ngak.” 23Me ser a le renges a ikal tekoi ngiil chad, e ng kmal mlo mekngit a rengul ele ng kmal mle merau. 24A Jesus a milsang el mlo mekngit a rengul me ng dilu el kmo, “Ng meral meringel er a re merau el chad el mo soiseb er a Rengedel a Dios! 25Ng bai kuk meringel er a tal merau el chad el mo soiseb er a Rengedel a Dios er a chimol kiamo a bo le siseb er a belsebselel a rasm.” 26Ma re chad el rirengesii a uleker el kmo, “A le ua isei, e ng techa sebechel el mo suobel?” 27Ma Jesus a ulenger er tir el kmo, “A ikel diak el sebechel a chad a di sebechel a Dios.” 28Me ng dula Petrus el kmo, “E kemam a mekerang? Aki mla chemoit a delengcheklam e oltirakl er kau.” 29Ma Jesus a dilu el kmo, “Ochoi, mak subedemiu el kmo a ngii di le chad el choitii a delengcheklel ma lechub a bechil ma lechub a rudam er ngii ma lechub a demal ma delal ma lechub a re ngelekel el Rengedel a Dios a uchul 30a mo ngmai a lmuut el betok er chelechang me sel mei el beluulchad e ng mo nguu a diak a ulebengelel klengar.” 31A Jesus a ngilititerir a re truich ma terung el obengkel el mo ileakl e dmu er tir el kmo, “Mesang! Kede mochu er a Jerusalem el sel bo letaut er ngii a ikel rokui el lulluches a re profet el kirel a Ngelekel a Chad. 32Ng mo mengai el mor a chimorir a re Chisentael me te mo melenguul er ngii, e oltuub er ngii, e melub er ngii. 33Te mo mengelebed er ngii e mo mekodir, ngdi uriul er edel klebesei e ng mo mekiis er a kodall.” 34A rubengkel a dimlak lutab a ikal tekoi; ng mle berrotel er tir a belkul ngiil tekoi, me ng dimlak bo lodengei a ikel lolekoi a Jesus. 35A Jesus er a bocha lekeed er a Jeriko, e a tal meiko el chad a dilengchokl er a tkul a rael el olengit a ngii di le ngerang. 36Me ser a lorrenges er a re betok el chad el mo engelakl e ng uleker el kmo, “Ng ngera ngar ngii?” 37Me tuluuchais er ngii el kmo, “A Jesus er a Nasareth a merma engelakl.” 38Me ng uleldiu el kmo, “Jesus, el Ngelekel a David, bo mchebkak!” 39Ma re chad el uleak uchei a chileklii e dmu er ngii me bo lluk. Ngdi ngii a mengal uleldiu el mo klou a ngerel el dmu el kmo, “Ngelekel a David, bo mchebkak!” 40Ma Jesus a mlo dechor e dmu me te nguu ngiil meiko el chad el mor ngii. Me ser a bo lekeed e a Jesus a uleker er ngii el kmo, 41“Ng ngera soam a krellii el kirem?” Me ng ulenger el kmo, “Rubak, ng soak el mo omes.” 42Ma Jesus a dilu er ngii el kmo, “A le ua isei e bo momes! Kau el oumerang a uchul me ke mocha ungil.” 43Me ng di mle mereched el mo sebechel el omes, me ng uleltirakl er a Jesus, el mereng a sulel a Dios. Ma re betok el chad er a lesang, e te rokui el uleldanges er a Dios.

will be added

X\