LUKAS 17

1A Jesus a dilu er a rubengkel el kmo, “A ikel rulleterir a re chad me te mor a klengit a diak bo lak, e ngdi kmal mo chebuul ngikel chad el rulleterir a re chad el mor a klengit! 2Ng bai ungil er ngii a le mekabs a klou el bad er a chiklel e bo lobidokl er a daob, er a bo luchul e tirkel mekekerei le bor a klengit. 3Isei e bo mkerekikl omerelliu! “A lsekum a tar kemiu a mor a klengit, e bo mosmechokl er ngii, ma lsekum ng mo ouuchel er a rengul e mousubes a kngtil. 4Ma lsekum ng euid el le bor a klengit el bedul kau er a tal sils, e a bek el le mer kau e ledu el kmo, ng dikea kluut, e ng kirem el ousubes a kngtil.” 5Ma re apostol a dilu er a Rubak el kmo, “Mrellemam el mo mesisiich el oumerang.” 6Ma Rubak a dilu el kmo, “Chomko kom oumerang el ua klungel a tane er a meringel, e ng sebechiu el dmu er tial kerrekar el mulberry el kmo, ‘Mobadel er ollemelem e bo medalem er a daob!’ e ng mor a ikel molekoi. 7“A le ngar ngii a tar kemiu el ngar ngii a mesiungel el mesib er a sers ma lechub e ng mengkar a sib, e ng kol mo dmu er ngii el kmo mereched el me omengur sel be lerei? 8Ng kmal diak! Ng bai mo dmu er ngii el kmo, ‘Mkedmeklii a belsilek, e sola e mutechulau e mosiou er ngak me sel bo kmerek e momengur kung.’ 9A mesiou el oltirakl a tekoi el meldu er ngii ng kor a diak le kirel el doreng a sulel? 10Ng dirrek el ua isei er kemiu, sel bla mruul a ikel rokui el mlodurech el mo meruul e mdu el kmo, ‘Kid a di mesiou; ma ikel bla deruul a kired el meruul.’” 11A Jesus er a lorael el mor a Jerusalem, e ng ulekiu oliochel er a Samaria ma Galilea. 12Ng mirrael el mor a tal kekerel beluu e ulsiuklterir a re truich el chad el chebedes. Te di dilechor er cheroid 13e oldiu el kmo, “Jesus! Mastang! Bo mchebkemam!” 14Ma Jesus er a leseterir e ng dilu er tir el kmo, “Bor a re prist me lesekemiu.” Te dirk ngar a rael e mocha klikiid a bedengir. 15Ma tar tir er a lesengei el kmo ng mla mo ungil, e ng liluut, e mle klou a ngerel el oldanges er a Dios. 16Ng mlo terrob er ochil a Jesus e mirreng a sulel. E ngiil chad a mle chad er a Samaria. 17Ma Jesus a dula el kmo, “Te mle truich el chad a mo ungil; te ngar ker tirkel tetiu? 18Ngera uchul me ng di tal ngikal chad er a ngodech el beluu a liluut el me mereng a sulel a Dios?” 19A Jesus a dilu er ngii el kmo, “Bekiis el merael, e ng kau el oumerang a uchul me ke mla mo ungil.” 20A re bebil el Farisi a uleker er a Jesus el kmo ng oingerang e ng me Rengedel a Dios. Ma mle nger er ngii a kmo, “A Rengedel a Dios a le mei, e ng diak domes er ngii el mei. 21El ka chad el mo dmu el kmo, ‘Mesang, tiakid.’ ma lechub, e ‘Sekid!’; ele Rengedel a Dios a ngar a chelsiu.” 22E sola e dilu er a rubengkel el kmo, “A tar a klebesei e kom moureng el mesa tar a ikel sils er a Ngelekel a Chad, e ngdi diak bo mesang. 23Te mor ngii a re mo melekoi er kemiu el kmo, ‘Mesang, ng ngar sei!’ ma lechub e te kmo, ‘Mesang, ng ngar tiang!’ Kele bo mtobed el osiik er ngii. 24Sel sils er a Ngelekel a Chad a mo ua bisebusech el omisebusech er a bital eanged el mor a bitang el meklemesii el rokir. 25Ngdi kot e ng kirel mo chuarm er a betok el tekoi e mo motngakl er a re chad er chelechang. 26A ikel sils er a Ngelekel a Chad a mo ua sel taem er a Noah. 27A re bek el chad a di milengang e melim, ma re mlo bechiil el mo lmuut er sel sils er a bo le siseb er a diall a Noah e le me eeleb el mekodeterir el rokui. 28Ngdi mo ua sel taem er a Lot. A re bek el chad a di milengang e melim, e omechar e olterau, e melalem a dellomel e omekedechor a blai. 29Sel sils er a le tobed er a Sodom a Lot, e a chull el ngau ma sulfur a mlar a eanged el mei el mekodeterir el rokui. 30Ng mo ua isei er sel sils el bo lecholt a Ngelekel a Chad. 31Isel sils e a chad el ngar a chado er a blil a diak le kirel el mo metengel el mo melai a kloklel er a chelsel a blai. 32Lak mobes er a bechil a Lot! 33Ngikel melasem el olsobel er a klengar er ngii a mo oridii, e ngikel oridii a klengar er ngii a mo osebelii. 34Ak dmu er kemiu el kmo, sel kesus e ng mor ngii a re terul chad el bad er a tal dusall; e a ta mo mengai e a tang a mo medechel. 35Ma re terul redil a bo ledak el mengsous, e a ta mo mengai e a tang a mo medechel. 36Ma re terul chad a mo ngar a sers; e a ta mo mengai, e a tang a mo medechel.” 37Ma rubengkel a uleker er ngii el kmo, “Rubak, ng mor ngii er ker?” Ma Jesus a dilu el kmo, “Sel le ngar ngii a ulekoad el chad, ise ia bo le mechudel er ngii a uasi.”

will be added

X\