LUKAS 15

1A tar a klebesei er a bo lorrenges er a Jesus a re betok el mela tax ma re kuk bebil er a re mekngit el chad, 2e a re Farisi ma re sensei er a Llach a mocha mengeremrum el kmo, “Ngikal chad a melai er a re mekngit el chad el mei e dirrek el omengur el obengterir!” 3Mitia e a Jesus a mocha mengedecheduch er tial okesiu er tir el kmo, 4“Chomko tar kemiu a olab a 100 el sib e a tar ngii a remiid, e ng kol mekerang? Ng mo mechei a ikel 99 er a ked, e ngii a mo osiik er ngikel chimong el ririid el dimerkmo le betik er ngii. 5E sel le betik er ngii e ng kmal mo ungil a rengul me ng cholngii 6e nguu el lmuut el mo remei. E sola e mo mekedongeterir a re sechelil ma re kiei er bita er ngii el mo kldibel e dmu er tir el kmo, ‘Ng kmal ungil a renguk ele kmla metik er a ririid el chermek el sib. Mei me doldeu a rengud!’ 7Ak subedemiu el kmo, ng ua isei, el mo klou a deurreng er a eanged el kirel a tal mekngit el chad a lobult el kuk klou er a deurreng el kirir a re 99 el ungil chad el diak lousbech el obult. 8“Ma lechub a tal redil el olab a tacher el udoud el silber, ng mo mekera a leriid a chimo er ngii? Ng mo mekerdii olbidel, e riekii a blil, e blak a rengul el osiik er ngii er a blai el rokir el dimerkmo le betik er ngii. 9E sel le betik er ngii, e ng mo mekedongeterir a re sechelil ma re kiei er bita er ngii el mo dmak e dmu er tir el kmo, ‘Ng kmal ungil a renguk ele kmla metik er sel udoud el kurridii. Mei me doldeu a rengud!’ 10Ak subedemiu el kmo, a re anghel er a Dios a ua isei el mo dmeu a rengrir a lobult a tal mekngit el chad.” 11E dirrek a Jesus el dilu el kmo, “A tal chad a mlar ngii a re terul ngelekel el sechal. 12Ngikel kekerei a mlor ngii e dmu el kmo, ‘Chedam, beskak er chelecha ikel blingelek er a klalo.’ Mitia e ngiil chad a milii a kloklel er tir el terul ngelekel. 13E a uriul er a bebil klebesei e ngikal kekerei a ulterau a blingelel er a klalo e ngma udoud e tuobed el merael. Ng mirrael el mor a cheroid el beluu me ng okngemed a ududel er a tametereng el klengar. 14Ng ulekngemed a ikel bek el mlar ngii er ngii, e sola e a klou el bosech a mlor ngii er a beluu el rokir, e ngii a bechachongang el diak a ngera er ngii. 15Ng mlo oureor el kirel a tal chad er isel beluu, me ng ulderchii el mor a sersel el mo omeka babii. 16Ng mlo soal el mo mengang a kelel a babii, ele ng dimlak a msa kelel. 17Me ng millebedebek el mol mong e dula el kmo, ‘A rokui el oureor el kirel a demak a ngar ngii a kelir el kuk betok er a ikel sebechir el kmang, e ngak a ngar tial medku er a klengerenger. 18Ak bai merolu el mor a demak mak dmu er ngii el kmo, “Chedam, ak mla mor a klengit el omtok er kau ma Dios. 19Ng dikea le kirek el okedongall el ngelekem; me di mrellak el mo tar a re chad er a ureor.’” 20Me ng milekiis e merola el mor a demal. “Ng dirk mle cheroid er a blai e a demal a mesang, me ng kmal mlo chubur, me ng rirurt el mong el mechulii ngiil ngelekel e turengur a medal. 21Ma ngelekel a dula el kmo, ‘Chedam, ak mla mor a klengit el omtok er kau ma Dios; me ng dikea le kirek el okedongall el ngelekem.’ 22E a lechub e a demal a ulemekedo er a re mesiungel e dmu el kmo, ‘Mereched! Mnguu sel kot el ungil bail el mei e bilii. Mlia kebkab er a chimal e motuu oeacher er ochil. 23E sola e bo mokodir ngikel mekreos el ngelekel a kerbou, e mei me doldeu a rengud el meruul er a blengur! 24Ele ngikal ngelekek a mlad e mla lmuut el me chad, ng ririid, e kede mla metik er ngii!’ Mitia te mocha meruul er a blengur er a deurreng. 25“Itiaikid e ngikel klou a mle dibus el ngar a sers. E tia er a le merma el me kmeed er a blai e ng orrenges er a tumetum ma ngloik. 26Me ng okerir a tar a re mesiou e oker er ngii el kmo, ‘Ng ngera ngar ngii?’ 27Me ng dilu el kmo, “A ochellem a mla lmuut el me remei, ma demam a mla mekodir sel mekreos el ngelekel a kerbou ele ng mla me ngelekel el dimlak le mekesakl.’ 28Me ng mlo kesib a rengul e chetikol el mo tmuu er a blai, ma demal a mlo tuobed e olengit er ngii me bo letuu. 29Me ng dmu er a demal el kmo, ‘Mesang, ng mle bek el rak el kuureor el kirem el ua tal sibai e dimlak a tekingem el kchitii, e ngera ke milskak? Ng ka di ble le chimo kul kaming me kurruul er a blengur er a deurreng el obengterir a re sechelik! 30E a lleta el mei ngikal ngelekem el mla chemoit a bek el kloklem er a re prostitute, e ke mekodir a mekreos el kerbou el kirel!’ 31Ma demal a dula er ngii el kmo, ‘Rungalek, kau a di blechoel el obengkek, ma ikel rokui el kloklek a kloklem. 32Ngdi ochellem a mle ulekoad e chelecha e ng mocha chad; ng ririid e kede mla metik er ngii misei ia uchul e ng kired el meruul er a blengur e oldeu a rengud.’”

will be added

X\