LUKAS 14

1A tar a Ulengull el Sils e a Jesus a mlo omengur er a blil a tar a ngarbab el Farisi, ma re chad a di ulemdidm a blekerdelel a Jesus. 2E a tal chad el mle oburk a ochil ma chimal a mlar medal a Jesus, 3ma Jesus a mocha oker er a re sensei er a Llach ma re Farisi el kmo, “Ng subed er a Llach er kid el omekungil a rakt er a Ulengull el Sils, ma lechub e ng diak?” 4Te di liluk el diak a melekoi. Ma Jesus a ngiluu ngiil chad e omekungil er ngii e dmu er ngii me ng merael. 5E sola e dmu er tir el kmo, “Chomko ngelekel a tar kemiu ma lechub e ng chermel kerbou a ruebet er a chido er a Ulengull el Sils, e ng diak di mereched el mo otebedii er isel Ulengull el Sils?” 6Ng dimlak el sebechir el onger er ngii el kirel itiang. 7A Jesus a ulemtab el kmo a re bebil er tirkel mler a blengur a millilt a ngarbab el kingall, me ng mocha mengedecheduch er tial okesiu el mor tir el rokui el kmo, 8“Sel le ngar ngii a omekedong er kau el mor a merengel a chebechiil, e lak bong el mo dengchokl er a ngarbab el kingall. Ele ng sebechel mor ngii a kuk ngarbab el chad er kau el mokedong, 9me sel le mei ngikel ulemekedo er kemiu el terung e ledu er kau el kmo, ‘Msall e bo le kiei er tia ngikang.’ e seikid e ke mocha merur el mo kiei er a ngariou el kingall. 10Ng bai sel cho mokedong, e bong el mo dengchokl er a ngariou el kingall, ma le mei ngikel ulemekedong e ledu er kau el kmo, ‘A rrach, mer tiei el ngarbab el kingall.’ e seikid e ng mo ungil a chisem er mederir tirkel rokui el mdak el dengchokl. 11Ele ngikel di ngii el olengesechekl er ngii a mo monganget, me ngikel di ngii el olenganget er ngii a mo mongesechekl.” 12E sola e a Jesus a dilu er ngikal ulemekedo er ngii el kmo, “Sel moruul a blengur ma lechub e ng mur e lak di momekedo er a re sechelim ma lechub e te bebil er kau ma lechub e te chedam ma lechub e te merau el chad el ngar bita er kau, ele te dirrek el kuk mo omekedo er kau, misei e ke ngmai a medal a ikel cho mriruul. 13Sel moruul er a mur, e momekedo er a re mechebuul, ma re chelemus, ma re chitechut ocherir, ma re meiko, 14me bo mngeltengat, ele ng diak el sebechir el mtechei a sulem. Ma Dios a mo omteche sulem er sel sils el bo le bekiis er a kodall a rungil chad.” 15Ma tar a chad el dilengchokl er a tebel er a le renges a ika e ng dula er a Jesus el kmo, “Te ngeltengat tirkel mo omengur er a Rengedel a Dios!” 16Me ng dilu er ngii a Jesus el kmo, “Ng mlar ngii a tal chad el mirruul er a mur e ulemekedo er a re betok el chad. 17Me ser a bocha le belsechel a mur, e ng ulderchii a mesiungel el mo mesubed er a re mlor tir a subed el kmo, ‘Mei, e a rokui el tekoi a mla mekedmokl!’ 18Itia e te mocha kauderta er tir el melmesumech. Me ngikel kot a dilu er ngii el mesiou el kmo, Ak mla mecherar a tar a chutem me ng kirek el mo omes er ngii, mak ulengit me bechikak.’ 19Me ngikel tang a dmu el kmo, “Ak mla mechar a kleim el derteblol kaukbuk el kerbou me ngak tial ngar omerolek el mo melasem, mak ulengit me bechikak.’ 20Ma kuk tang a dmu el kmo, ‘Ngak tial dirk mlo bechiil misei a uchul e ng diak el sebechek el ekong.’ 21Me ng luuta ngiil mesiou el mo subedii a mastang er ngii er a ikal tekoi el rokui. Ma mastang a mlo kesib a rengul e dula er a mesiungel el kmo, ‘Mereched el tuobed el mor a ikel meklou ma mekekerel rael er a beluu e molai er a re mechebuul, ma re chelemus, ma re meiko, ma re chitechut ocherir el mei.’ 22Me ng dimlak le meketeket e ngiil mesiou a dmu el kmo, ‘Rubak, a ikel mdilung a bla kruul, e ngdi blai a dirk mededaes.’ 23Ma mastang a dmu er ngiil mesiou el kmo, ‘Bor a ikel meklou ma mekekerel rael er a ikrel a beluu e momecheoch er a re chad me le mei, me bo le meseked a blik. 24Ak subedemiu el rokui el kmo ng diak a tar tirkel chad el mlokedong el mo chuarm a kelek!’” 25Ng mlar ngii a klou el seked el ulebengkel a Jesus el merael, me ng mileltii el mo chemau tir e dmu el kmo, 26“Ngikel mer ngak a diak el sebechel el mo obengkek a lak bo le betik a rengul er ngak el kuk ngar uchei er a le betik a rengul er a demal ma delal, ma bechil ma re ngelekel, ma re bebil er ngii el sechal ma redil el mo lmuut er ngii. 27Ngikel diak el chelengii a kerus er ngii e be loltirakl er ngak a diak el sebechel el mo obengkek. 28A lsekum ng ngar ngii er kemiu a melatk el mo omekedechor er a tebekebok, e a kot e ng mo dengchokl e mes a mo cheral e mesal kmo ng ngar ngii a udoud el sebechel el rokir ngiil ureor ng diak. 29Ele lsekum ng diak le ua isei, e ng di mo loia omekedecheraol e a uriul er isei e ng dikea le merekui ngiil tebekebok; ma rokui el mo mesang a mo melenguul er ngiil chad. 30Te mo dmu el kmo, ‘Ngikal chad a di milechelii okedecherul a tebekebok e dikea le sebechel el rokir!’ 31A le ngar ngii a king el obengterir a re 10,000 el chad el mo oumekemad er a kuk tar a king el obengterir a re 20,000, e ng omuchel el tirterii el kmo a klisichel ng sebechel el mo omtok er ngikel tar a king. 32E a lsekum ng diak el sebechel, e ng dirk cheroid e ng odercheterir a re chedal el osiueklii ngikel kuk tar a king e olengit me le meruul a budech er a delongelir.” 33E sola e a Jesus a dilu el kmo, “Ng dirrek el mo ua isei el diak a tar kemiu el sebechel el mo obengkek a lak le ngebetii a rengul er a rokui el kloklel. 34“A sar a ungil klalo, e ngdi lsekum ng remiid a cherrecherel, e ng dikea rolel e lluut el mo mecherocher. 35E diak lungil er a chutem el ka lungil el ramek, me ng di chiitel e merekong. Misei, e a lsekum ng ngar ngii a dingemiu el orrenges e morrenges!”

will be added

X\