LUKAS 13

1Itia e a re bebil chad a uluuchais er a Jesus a chisir a re chad er a Galilea el lulekodeterir a Pilatus er a lolenget a tenget el mor a Dios. 2Ma Jesus a dilu el kmo, “Cho momdasu e tirkel chad er a Galilea te kuk mekngit er a re bek el chad er a Galilea a uchul me te mlad el ua isei? 3Ng kmal diak! Ak subedemiu el kmo a lsekum ng diak mobult er a kngtmiu, e kom rokui el di mo mad el ua itir. 4E tirkel truich ma teai el chad el mlad er a Siloam er ser a le muukel a turm el otelcheterir a kuk mekerang? Cho momdasu e ng olechotel a kmo te kuk mekngit er a re bek el chad el kiei er a Jerusalem? 5Ng kmal diak! Ak subedemiu el kmo kemiu a lsekum ng diak mobult er a kngtmiu, e kom rokui el mo mad el ua itir.” 6E sola e a Jesus a uluuchais er tir er tial okesiu el kmo, “A tal chad a dillemii a kerrekar el fig er a sersel. Ng mlo osiik a redechel e dimlak a ngeral le betik er ngii. 7Me ng dula er a chad er a sersel el kmo, ‘Mesang, ng mocha edel rak el di kumais el mei el osiik a redechel tial kerrekar el fig, e di diak a kbetik. Mukelii! Ngera ultutelel a di lomekseked er a chutem?’ 8Ma chad er a sers a dula el kmo, ‘Rubak, becherei el lmuut el tal rak; e ak mo kiesii a uchul el meliuekl e locha bebil er a ramek er ngii. 9Ma lsekum ng mo ourodech er tial mel rak, e ng ungiang; e a lsekum ng di diak, e seikid e mukelii kung.’” 10A tal Ulengull el Sils e a Jesus a ullisechakl er a blil ongdibel. 11E mlar ngii a tal redil el mekngit el chelid a ulelsecher er ngii el truich ma eai el rak, me ng di deluoik kung el dikea le metamet. 12Ma Jesus er a lesang e ng millekoi er ngii el kmo, “Redil, ke mla mo ungil er a rektem!” 13Ng milor a chimal er ngii me ng di miltamet a chelechedal e mocha oldanges er a Dios. 14Ma tebechelel a blil ongdibel a ngilasech a rengul, ele Jesus a ulemekungil er a Ulengull el Sils, me ng melekinga er a re chad el kmo, “Ng ngar ngii elolem el sils el kired el oureor er ngii; misei e mei er a ikeikid el sils el kirel a ukeruul, e lak kom mei er a Ulengull el Sils.” 15Ma Rubak a dilu er ngii el kmo, “Kom cheblad! A ta ma tar kemiu ng kor a mengedoked er a chermel kerbou ma lechub e ng donkey er a blil e obal mo omngim er ngii er a ralm a le Ulengull el Sils. 16E chelechang e ngikal ngelekel a Abraham el le rirengedii a Satan el truich ma eai el rak, ng diak lungil a le mengubet er a Ulengull el Sils?” 17A re cherrouel a mlo merur er a le renges a ikang, e ngdi re chad a mlo ungil a rengrir er a ikel rokui el mengasireng el tekoi el le riruul. 18Ma Jesus a uleker el kmo, “A Rengedel a Dios ng ua ngerang? Ak mekesiur er a ngerang? 19Ng ua tiakid. A tal chad a ngiluu a tane er a meringel el mo dolemii er a sersel. Ngiil dellomel a mirrael el mo klou el mo kerrekar, ma suebek el charm a meruul a lukel er a rechelel.” 20E liluut a Jesus el oker el kmo, “Ngera kmekesiur a Rengedel a Dios er ngii? 21Ng ua tiakid. A redil a lenga sesel omkukel a blauang el mrechemii a chimol bek el merikengko e ng obkuuk el rokir.” 22A Jesus a ulekiu a meklou ma mekekerel beluu el olisechakl er a re chad er a le ngar omerolel el mo bedul a Jerusalem. 23E a tal chad oker er ngii el kmo, “Rubak, te di kesai el chad a mo suobel?” Ma Jesus a ulenger el kmo, 24“Bo le blak a rengmiu el mo soiseb er obutek el siseball; ele te betok el chad a mo melasem el mo soiseb er ngii e diak bo le sebechir. 25A mastang er a blai a le bekiis el chosmerii a chesimer, e sola e kom dechor er rikl e melngod er a chesimer e dmu el kmo, ‘Rubak, mnguu a chesimer el kiram!’ e ngii a mo onger er kemiu el kmo, ‘Ng diak kudengelkemiu el kmo kom mlar ker el mei!’ 26Isei e kom mo dmu el kmo, ‘Kemam a milengang e melim el obengkem; me kau a ullisechakl er kemam er a belumam!’ 27Ngdi ngii a lmuut el mo dmu el kmo, ‘Ng diak kudengelkemiu el kmo, kom mlar ker el mei; mcheridemiu er ngak el rokui, kemiu el meruul a mekngit!’ 28Sel bo mesa Abraham, ma Isak, ma Jakob, ma rokui el profet el ngar a Rengedel a Dios e kemiu mngar a ikrel, e kom kmal mo lmangel el olengchongch a ungeliu! 29A re chad el ngar a ongos, ma ngebard, ma diluches ma dimes, a mei el mo ngma kingellir er a ungilklebesei er a Rengedel a Dios. 30Isei e te ngar ngii a re ngar uriul er chelechang el mor uchei, ma re ngar uchei er chelechang el mor uriul.” 31Itia e a re bebil el Farisi a mlor a Jesus e dmu er ngii el kmo, “Ng kirem el tuobed el mo cheroid er tiang, ele Herodes a soal el omekoad er kau.” 32Ma Jesus a dilu er tir el kmo, “Bong e msbedii ngikel cheblad el chad el kmo, ak ultobed a mekngit el chelid e omekungil a rakt er chelecha ma klukuk, e ongede er a sils e ak mochu merekui er a urerek! 33Ng kirek el lomelemii omerolek er chelechang, ma klukuk, me ngiaos, ele ng diak le melemalt er a profet a lokodir er a ngodech el beluu el diak le ngii a Jerusalem. 34“Jerusalem, Jerusalem! Komekoad er a re profet, ma ruderchelel a Dios el ekor kau a cho mometech er tir er a bad! Ng mla mo betok el le soak el omechull er a rokui el chedam el ua dechuu el malk el mengudel a ngelekel er eungel osebekel, e dimlak el soam! 35Misei e a Templo er kau a mo mechoit. Ak kmal subedau el kmo ng diak bo mesekak el mor sel cho bo mdu el kmo, ‘Le modanges ngikal mermang el oba ngklel a Rubak.’”

will be added

X\