LUKAS 10

1Uriul er itiang e a Rubak a ngililteterir a re kuk 72 el sechal e odercheterir el derteru el oeak uchei er ngii el mor a bek el beluu el le bochu er ngii. 2Ng dilu er tir el kmo, “Ng ngar ngii a klou el sim, e ngdi te di mekesai a ruureor el kirel. Molengit er a merreder er a sim me lotebedeterir a re chad el mo oureor el kirel a sim. 3Morael! Ak uldurech er kemiu el ua ngelekel a sib el mor a delongelel a tebelik el charm. 4Ng diak molab a chidib, ma tutuu, ma lechub oeacher; e diak bo mdechor er a melengel a rael el ouetkeu er a ngii di le chad. 5E sel bo mtuu er a bek el blai e kom omuchel el dmu el kmo, A budech le mer tial blai.’ 6E a lsekum ng ngar ngii a chad el kiei er ngii el soal a budech, e a budech er a klauetkeu er kemiu a mor ngii, ngdi lsekum ng diak, e a budech a lmuut el ekor kemiu. 7Kom mo kiei er a di osisiu el blai el menga e melim a ikel le beskemiu ele oureor el chad a melai a kirel a urerel. Ng diak mongesuch a delengchokl. 8Me sel cho bor a beluu e le ngikemiu, e monga ikel lecha er medemiu, 9e momekungil er a re smecher er isel beluu, e mdu er a re chad er ngii el kmo, A Rengedel a Dios a mla me kmeed er kemiu.’ 10Ngdi lsekum kom mor a beluu e ng diak le ngikemiu, e kom tuobed el mor a rael e dmu el kmo, 11‘Ng mo lmuut er a chebechab el mo bereked er oecheram a kimsuld el olechotel a kmo a omerelliu a mekngit. Ngdi molatk el kmo a Rengedel a Dios a mla me kmeed er kemiu!’ 12Ak meral dmu er kemiu el kmo sel sils er a kerrekeriil e a Dios a bai mo chubur a Sodom e sel beluu a diak. 13“Ng kmal mo kdekudel el kirem e Korasin! E dirrek el kmal mo kdekudel el kirem e Bethsaida! Chomko ongasireng el merruul er a chelsiu a merruul er a Tyre ma Sidon, e a re chad er ngii a meketeket er a bo loubail a bek e bo le dengchokl e lomriid a chab er tir el olechotel a kmo te mla obult er a kngterir! 14Sel sils er a kerrekeriil e a Dios a bai mo chubur a Tyre ma Sidon e kemiu a diak. 15E kau el Kapernaum! Ng mle soam el mengider er kau el mor bab el ua kldidiul a eanged? Ke bai mo obidokl el mor a beluu er a ngau!” 16A Jesus a dilu er a rubengkel el kmo, “Ngikel orrenges er kemiu orrenges er ngak; ma oltngakl er kemiu oltngakl er ngak; e a oltngakl er ngak a oltngakl er ngikel ulderchak.” 17A re 72 el chad a liluut el mei el kmal dmeu a rengrir. Te dilu el kmo, “Rubak, ng mo lmuut er a mekngit el chelid me ng ullengesenges er kemam er ser a kim oba ngklem el mengedereder er tir!” 18Me ng dula er tir a Jesus el kmo, “Ak milsa Diabelong el ruebet er a eanged el ua bisebusech. 19Ka morrenges! Ak mla meskemiu a klisichel omerreder me ng sebechiu el roderd a bersoech ma iusbeluu e mo mesisiich er a rokui el klisichel a cherarou, e diak a ngeral mo tomellemiu. 20Ngdi lak lungil a rengmiu el kmo a mekngit el chelid olengesenges er kemiu; e bai bo lungil a rengmiu el kmo a ngkliu a llechukl er a eanged.” 21Iseikid e a Jesus a mlo dmeu a rengul el klisichel a Chedaol Reng a uchul me ng dilu el kmo, “Chedam, el Rubak er a eanged ma chutem! Ak mereng a sulem ele ke mla ocholt er a re metitur e diak a skulir a ikel cho bilart er a leko te mellomes a rengrir ma leko te meduch e ngar ngii a skulir. Ng ua isei e Chedang, tiaikid sel mle soam. 22“A Demak a mla meskak a rokui el tekoi. Ng diak a medengelii a Ngalek, ng di tal Chedam, el diak a medengelii a Chedam, ng di tal Ngalek me tirkel mlo soal a Ngalek el ochotii a Chedam er tir.” 23E sola e a Jesus a mileltii el mor a rubengkel e mle ileakl el mengedecheduch er tir el kmo, “Kom ngeltengat el omes a ikel tekoi el momes! 24Ak subedemiu el kmo te betok el profet ma re king a mle sorir el mes a ikel cho momes e dimlak el sebechir, e mle sorir el remenges cho morrenges, e dimlak le renges.” 25E a tal sensei er a Llach a milekiis el mor a Jesus e mle soal el omdechem er ngii er a cheldechedechal me ng uleker er ngii el kmo, “Sensei, ng ngera bo krellii e ak mo nguu a diak a ulebengelel klengar?” 26Ma Jesus a ulenger er ngii el kmo, “Ng ngera ng dmu Chedaol Llechukl? Ke mekera cho mosaod er ngii?” 27Me ngiil chad a ulenger el kmo, “‘Bo le betik a rengum er a Rubak el Dios er kau el oba rengum el rokir, ma klengar er kau el rokir, ma klisichem el rokir, ma uldesuem el rokir;’ e ‘Bo le betik a rengum er a ngar bita er kau el ua le betik a rengum er kau.’” 28Me ng dmu Jesus el kmo, “Ng ua isei; moruul er itiang me bo mnguu a klengar.” 29Ngdi ngikal sensei er a Llach a mle soal el di ngii el meledaes er ngii me ng oker er a Jesus el kmo, “Ng techa ngar bitar ngak?” 30Ma Jesus a dmu el kmo, “A tal chad a mlar a Jerusalem e mirrael el mo metengel er a Jeriko e osiueklterir a re merechorech me te smodel a bilel e cholebedii el di mlo ocherur a kodall e choitii e merael. 31E a tal prist a mirrael el mo okiu ngiil rael; ngdi ser a lesa ngiil chad, e ng di ilengelakl er ngii el oeak a bital rael. 32Ma tal chad er a kleblillel a Levi a dirrek el mlo me ng milsa ngiil chad e merael el engelakl er ngii er a bital tkul a rael. 33E sola e a tal chad er a Samaria el ulekiu ngiil rael a mlo metik er ngiil chad, me ser a lesang, e ng mlo chubur. 34Me ng mocha er ngii me ng oitel a cheluch ma bilong er a ikal telemall er a bedengel e lmechet e sola e nguu el otekir er a chermel e nguu el mor a lengiil el blai me ng kudmeklii. 35E a bo le kukuk e ng mocha otobed a teblol udoud el msa ngikal oungerachel er ngiil blai e dmu er ngii el kmo, ‘Ke mengedmokl er ngii e sel kluut el mei e ak mo kokad a ngelsengesel a ilechal udoud.’” 36E sola e a Jesus oker er ngii el kmo, “Cho momdasu e ng techa er tirkel tedei a ngilsuir ngikel meltemall er a re merechorech el ua ia le chad el ngar bita er ngii?” 37Me ngiil sensei er a Llach a dmu el kmo, “Ngikel mlo bekokuii el mor ngii. Ma Jesus a dula er ngii el kmo, “Bong e moruul er osisiu el tekoi.” 38A Jesus ma rubengkel er a lorael, e te mlor a chimol beluu el mlar ngii a tal redil el Martha ngklel el ngilititerir el mor a blil. 39Ng mlar ngii a merrengel el Maria ngklel el mlo dengchokl er bitar ochil a Rubak e mle blak a rengul el orrenges osisecheklel. 40E a Martha kmal mlo meriked me ng mlor a Jesus e dmu el kmo, “Rubak, kau ke di mechere merrengek me ng choitak me ng di ngak el tal meruul a rokui el ureor? Mdu er ngii me be le ngesukak!” 41Ma Rubak a dmu er ngii el kmo, “Martha, Martha! Kau a suebek a rengum e ouedikel el kirel a kmal betok el tekoi, 42e ngdi di tal tekoi a klou a belkul. A Maria a mla ngiltii ngiil tekoi, me ng diak bo le mengai er ngii el mo cheroid.”

will be added

X\