LUKAS 1

1Betik er a renguk el Theofilus, te betok el chad a mla mor a ikel sebechir el meluches a chisel a ikel tekoi el mlar ngii er a delongeled. 2Te liluches a ikel luluuchais er kemam tirkel miles a ikal tekoi er a uchelel, el tir a ulemerk er ngii el klumech. 3Isei e kau el betik er a renguk el Theofilus, ak millatk el kmo ng ungil a klechesii a ungil blechebechel ngii el tekoi el ekor kau ele ng mle blak a renguk el mesuub ngii el tekoi el rokui er a uchelel el mei. 4Tiang a kuruul er ngii me bo modengelii a cherrungel el klemerang el kirel a ikel bek el bla mosisechakl er ngii. 5Ser a le king a Herodes er a Judea, e ng mlar ngii a tal prist el Sekaria ngklel, el chad er a kleprist er a Abia. E a ngklel a bechil a Elisabeth el dirrek el mlar a telungalek er a re prist. 6Ngdi dul mle ungil a klengar er tir er medal a Dios e mle mui el olengesenges a llechul a Rubak ma ikel ledung. 7Ng dimlak a re ngelekir ele Elisabeth a dimlak lomechell, e ngii ma Sekaria a dul kmal mechudelang. 8A tar a klebesei e a Sekaria a mlar a Templo el mirruul er a urerel er a kleprist me ng meruul er sel kuk telutk el kirel er omesiungel sel sils. 9Ng mle siukang el tirkel prist a melmors el osiik er a mo melul ochod er olengetongel, me te milelmors e a Sekaria a mlengilt. Isei e ng mlo soiseb er a Templo er a Rubak, 10e a klou el seked er a re chad el ngar rikl a milluluuch er sel taem er omelul el ochod. 11E a anghel er a Rubak a mlo duum er ngii, el dilechor er a kadikm er sel olengetongel el lullul a ochod er ngii. 12Ma Sekaria er a lesang, e ng kilebetiekl e mlo medakt. 13Ma anghel a dilu er ngii el kmo, “Sekaria, lak medakt! A Dios a mla remenges a nglunguchem, ma bechim er a Elisabeth a mo mechellii a ngelekem el sechal, me ke mo mengklii el Johanes. 14Ng kmal mo dmeu a rengum, ma re betok el chad me ng mo ungil a rengrir sel le mechell! 15Ng mo chetengakl el chad er medal a Rubak. Ng diak le kirel el mo melim a bilong ma lechub e ng mesisiich el ilumel. Sel le mechell e ng mo mui er a Chedaol Reng 16e mo olluut er a re betok el chad er a Israel el mor a Rubak el Dios er tir. 17Ng mo oeak uchei er a Rubak el ultebechel e mesisiich el ua Profet Elias. Ng mo lmuut el oldak er a re chedam ma re ngalek, e mo omult er a re diak le bekongesenges el chad me te lmuut el mo melemalt a uldesuir, e ngii a mo rulleterir a re chedal a Rubak me te mo kldmokl el kirel.” 18Ma Sekaria a dula er a anghel el kmo, “Ng mekera e ak mo medengei el kmo tia mo ua isei? Ngak a chudela el chad ma bechik me ng dirrek el chudelang.” 19Ma anghel a ulenger el kmo, “Ngak a Gabriel. Ak dechor er medal a Dios el ngikel ulderchak el me mengedecheduch er kau e mesubed er kau er tial ungil chais. 20Ngdi kau a diak moumera tekingek el ngii a mo tmaut er sel belsechel. Ng mo diak molekoi ele uchul e kau el diak moumerang; ke mo bengong el mo lmuut er sel sils el bo letaut a ikal tekingek.” 21Tiaikid e a re chad a milengiil er a Sekaria e mechese rengrir el kmo ngera me ng kmal meketeketang el le ngar a Templo. 22E tia er a be le tobed e ng dikea le sebechel el mengedecheduch er tir me te mlo medengei el kmo ng mlar ngii a ngerang el lilsang er a Templo. Ng mlo bengong me ng ullab a chimal el mengedecheduch er tir. 23Ma Sekaria a liluut el mo remei er ser a bocha le merek omesiungel er a Templo. 24Uriul er itiang e a bechil er a Elisabeth a mlo dioll me ng di mlar a blil el eim el buil. 25Ng dilu el kmo, “Chelechang e a Rubak a mla ngosukak ma re chad a dikea bo loltuub er ngak!” 26E a bocha le elolem el bilel a Elisabeth, e a Dios a ulderchii a anghel Gabriel el mor a tal kekerel beluu er a Galilea el Nasareth a ngklel. 27Ng ullab a tekoi el mor a tal kekerel redil el mle telbiil el mo bechil a tal chad el Josef a ngklel, el chad er a blil a King David. A ngklel ngiil kekerel redil a Maria. 28Me ngiil anghel a mlor ngii e dmu el kmo, “A budech lekor kau. A Rubak obengkem e kmal mla omekngeltengat er kau!” 29A Maria a kmal mlo ouedikel a rengul er a tekingel a anghel e millebedebek el kmo ng kol ngera belkul a ikel tekoi. 30Ma anghel a dilu er ngii el kmo, “Lak medakt e Maria ele ke kmal ngeltengat er medal a Dios. 31Ke mo dioll e mo mechellii a ngalek el sechal, e mo mengklii el Jesus. 32Ng mo chetengakl e mo okedongall el Ngelekel a Kot el Ngarbab el Dios. E a Rubak el Dios a mo rullii el mo king el ua uchelel er a David 33me ng mo mengedereder er a re ngelekel a Jakob el mo cherechar, ma rengedel a mo diak a ulebengelel!” 34Itia e a Maria a dula er a anghel el kmo, “Ng mekera e mo ua isei tial tekoi? Ng dirkak a chad el bo kubengkel.” 35Me ng ulenger a anghel el kmo, “A Chedaol Reng a mer kau, ma klisichel a Dios a mo obengkem. Tia ia uchul me ngii el chedaol ngalek a bo lomekedo er ngii el kmo Ngelekel a Dios. 36Mesang a chedam er a Elisabeth a lolekoi er ngii a re chad el kmo ng diak el sebechel el mo omechell, e a lechub e ngkakid el kmal chudelang e mla mo dioll el elolem el bilel. 37Ele Dios a diak a diak el sebechel.” 38Ma Maria a dula el kmo, “Ngak a mesiungel a Rubak, me bo le ua isei a ikel bla mdung.” Itia e a anghel a chilitii e merael. 39Ng dimlak bo le meketeket e a Maria a kildmeklii e mlor a tal kekerel beluu el ngar a beluu er a bukl er a Judea. 40Ng mlor a blil a Sekaria e uluuetkeu er a Elisabeth. 41Ma Elisabeth er a le rengesii a Maria el ouetkeu er ngii, e a ngalek a uluuedikel er a chelsel a delel. A Elisabeth a miltuchel er a Chedaol Reng 42me ng mlo klou a ngerel el melekoi el kmo, “Kau a kot el ngeltengat er a re bek el redil me ngikel ngalek el bo mochellii me ng ngeltengat! 43Ngera uchul ma delal a Rubak er ngak a me oldingel er ngak? 44Ser a cho mouetkeu er ngak, e a ngalek a uluuedikel er a delek el dmeu a rengul. 45Ke meral ngeltengat ele koumerang el kmo a tekingel a Rubak el ekor kau a mo tmaut!” 46Ma Maria a dilu el kmo, “A renguk oldanges er a Rubak, 47ng ungil a renguk el Dios el Osebelek a uchul 48ele ng ngileltak ngak el ngariou el mesiungel! Chelechal mong e a rokui el chad a mo melekoi el kmo ngak a ngeltengat, 49ele Mesisiich el Dios a riruul el mer ngak a ikel meklou el tekoi. A ngklel a chedaol. 50Ng olecholt er a klechubechub er ngii el mor tirkel mengull er ngii er a bek el telecheroll. 51A mesisiich el chimal a mla mrideterir a re mekedidai a rengrir er a ikel rokui el uldesuir. 52A rulab a klisiich a bla loltengel er tir er a kingellir, e a re ngariou a bla lolengesechekl er tir. 53Ng mla omekeek er a re mechebuul er a klungiaol, e a re merau a le bechititerir me te merael el di chim. 54Ng mla mei el me olengeseu er a mesiungel el Israel, el oltaut er a telbilel el mor a rucheled. 55Ng dimlak lobes el olecholt er a klechubechub el mor a Abraham ma rokui el ngelekel el mo cherechar!” 56A Maria a kiliei el obengkel a Elisabeth el bekord el edel buil e sola e mlo remei. 57Ng mlo belsechel a Elisabeth el mo omechell me ng milechellii a ngelekel el sechal. 58Ma re ngar bita er ngii ma re chedal er a le renges el kmo a Rubak a kmal mle ungil mor ngii, e te rokui el uleldeu a rengrir el obengkel. 59Ma bocha le tal sandei a ngalek, e a re chad a mlong el mo omotk er ngii, e a leko tomngakl er ngii el Sekaria el di ua ngklel a demal. 60Ngdi delal a dilu el kmo, “Ng diak! Ng mo Johanes a ngklel.” 61Me te dilu er ngii el kmo, “Ng diak a re chedam el oungakl er tilechal ngakl!” 62E sola me te mocha mengedecheduch er a demal el olab a chimorir el oker er a ngakl el soal a bo le ngklel ngii el buik. 63Ma Sekaria a ullengit er a bo llechesii a ngakl er ngii e lilechesii el kmo “A ngklel a mo Johanes.” Te rokui el kmal mlo mechas a rengrir. 64Iseikid e a Sekaria a liluut el mo sebechel el melekoi me ng ulemuchel el oldanges er a Dios. 65Ma re mlar bita er tir a rokui el mlo medakt, ma chisel ngiil tekoi a uleberk er a beluu el ngar a bukl er a Judea el rokir. 66A re bek el chad el rirengesii ngiil chais a millebedebek er ngii e uleker el kmo, “Ng ngera mo deruchellel ngikal ngalek?” Ng mle bleketakl el kmo a klisichel a Rubak a ulebengkel. 67A Sekaria el demal a Johanes a meltuchel er a Chedaol Reng me ng millekoi a tekingel a Dios el kmo: 68“Bo le modanges a Rubak el Dios er a Israel! Ng mla me olengeseu e olsobel er a re chedal el mo mimokl. 69Ng mla kudmeklii el kirel a mesisiich el Osobel, el ngalek er a blil a mesiungel el David. 70Ng tilbir er a ngar a mong el okiu a re mechedaol el profet er ngii 71el kmo ng mo olsobel er kid er a re cherroued, ma klisichir tirkel rokui el ouketui er kid. 72Ng dilu el kmo ng mo olecholt er a klechubechub el mor a rucheled e diak bo lobes er a chedaol telbilel. 73- 74A Dios a ulekiu a mesisiich el telbiil el mlor a ucheled er a Abraham e ng tilbir el mo olsobel er kid er a re cherroued e kongei er kid me kede mesiou er ngii el diak de medakt, 75me kede mo chedaol e melemalt el ngar medal er a klemengetel a klengar er kid. 76“E kau el ngelekek, a mo mokedong el profet er a Kot el Ngarbab el Dios. Ke mo oeak uchei er a Rubak el mo mengedmokl er a rolel el kirel, 77e ouchais er a re chedal el kmo a kngterir a musubes me te mo suobel. 78A Dios er kid a bekokuii e kmal chubechub. Ng mo rullii Osobel el me duum er bebud el ua le ngasech a sils a le tutau 79me ng ngar a eanged e dmiich er bebrir tirkel rokui el kiei er a milkolk el chungel a kodall, e omekrael ochid el mor a rael er a budech.” 80Me ngii el ngalek a mirrael el mo klou e mellomes a rengul. Ng kiliei er a ked el mo lmuut er sel sils er a bo le bleketakl el chemolt er a re chad er a Israel.

will be added

X\