JAKOBUS 5

1Chelechang e morrenges er ngak kemiu el meteet el chad! Mlangel, moldiu el lmangel el kirel a ikel ringel el merekung er kemiu! 2A iltetiu a mechetong ma biliu a mla mekang er a bechars. 3A kolt ma silber er kemiu a di mla mo chemert, e tiaikid a mo uchul a ultutekliu e mo okngemed a bedengiu el ua ia ngau. Kom mla chemudel a iltetiu er a ikal ulebongel sils. 4Ng dirkak a tal momdoud er tirkel chad el oureor er a sersiu. Morrenges a ikel cherdechir! A lengelir tirkel mengib a rodech er a sersiu a mla mor a dingal a Dios, el Rubak el Olab a Bek el Klisiich. 5A klengar er kemiu er tial beluulchad a di meseked er a ungial a klalo ma tametereng. Ng di kemiu el mla mengedelebuu er kemiu el kirel a sils el bo lomekoad er kemiu. 6Kom mla melseterir e mekodeterir a re chad el dimlak a ngeral le temellii, e tir a diak lomtok er kemiu. 7Misei e mkilou a rengmiu e rudam er ngak, el mo lmuut er sel le mei a Rubak. Ka momes er a kllourreng er a chad er a sers a longiil er a chetemel el mo oltobed a ungil rodech. Ng klou a rengul el mengiil er a okiu uche ma okiu uriul el belsechel a chull. 8Me kemiu me ng kiriu el dirrek el kilou a rengmiu. Bo le mesisiich a rengmiu, ele sils el le mei er ngii a Rubak a di kmedang. 9Lak mchacheremrum er a delongeliu e rudam er ngak, me lak bo loukerrekeriil er kemiu a Dios. Ngikel Chad er a Kerrekeriil a kmedang el dumiung. 10Rudam er ngak, molatk er a re profet el ulemlaoch el oba ngklel a Rubak. Mola klubeliu er tir el kmal mle meklou a rengrir el outekangel er a ringel. 11Ka mesang, tirkel dimlak le mesim e uluutekangel, a dolekoi er tir el kmo te ngeltengat. Kom mla rongesii a chisel a kllourreng er a Job, e mesa uldesuel a Rubak el kirel. A Rubak a kmal bekokuii e chubechubchad. 12Ngdi sel kmal ungil e rudam er ngak, a lak molsiich a tekoi el ousbech er a eanged ma chutem ma lechub a ngii di le ngerang. Di mdu “Choi” cho momdasu er a “choi”, e mdu ng “Diak” cho momdasu er a “diak”, me lak bo medebeakl. 13Ng ngar ngii er a delongeliu a chuarm? Loluluuch. Ng ngar ngii er a delongeliu a dmeu a rengul? Longitakl odanges. 14Ng ngar ngii er a delongeliu a smecher? Lomekedong er a re mechuodel er a ikelesia el mei, me loluluuch el kirel el oba ngklel a Rubak el choiltii er a cheluch. 15Tiaikid el nglunguuch el modars ele toumerang a mo omekungil er a chad el smecher; e a Rubak a lmuut el msa klisichel a bedengel, e a le blar ngii a kngtil e ng mo musubes. 16Ma le ua isei, e mkaiuecholt a kngtmiu e mkaingeseu el meluluuch el kirel a ta ma tar kemiu me bo mungil. A nglunguchel a melemalt el chad a kmal klou a le rellii. 17A Elias a di mle chad el ua ikid, e milluluuch el blak a rengul el olengit me bo lak lerebet a chull, me ng mlo diak a tal chull er a beluu el edel rak ma tedobech. 18Ng liluut el meluluuch ma eanged a urrebetii a chull, ma beluu a dilubech a dellomel er ngii el mo ourodech. 19Rudam er ngak, a lsekum ng ngar ngii a tar kemiu el oberius el mo cheroid er a klemerang, e a tang a mo ochudii el lmuut el mei, 20e bo modengei el kmo, ngikel meltii a chad er a klengit el le ngar ngii me ng lmuut el mer a klemerang a osebelii er a kodall ma betok el kngtil a mo musubes.

will be added

X\