JAKOBUS 4

1A ikel bek el klakoad ma klaititekangel er a delongeliu ng ngar ker el mei? Ng ngar a ikel mekngit el soal a rengmiu el kirel a tametereng, el diak bo le chelellakl er a chelsiu. 2Ng ngar ngii a somiu, e diak er kemiu, me kom mo omekoad; e ngar ngii a kmal somiu el klalo e diak el sebechiu el ngmai, me kom kaititekangel e kakoad. Ng diak er kemiu a ikel moureng ele ng diak molengit er a Dios me le beskemiu. 3E sel molengit, e ng diak mngai, ele ng mekngit a uldesuiu el kirel; kom olengit el di mo kirel a temetel a rengmiu. 4Kom meral di deuaoch a rengmiu el chad! Ng diak modengei el kmo a dousechelei er a beluulchad e kede cherrouel a Dios? Ngikel soal el mo sechelil a beluulchad a di ngii el rullii el mo cherrouel a Dios. 5Lak momdasu el kmo ng diak a belkul sel tekoi el ngar a Chedaol Llechukl el kmo, “A reng el lilia Dios er a chelsed a mui er a mesisiich el urungulel.” 6Ngdi krasia el le beskid a Dios a lmuut el mesisiich. Ng di ua ikel lolekoi a Chedaol Llechukl el kmo, “A Dios omtok er a re mekedidai a rengrir, e ngdi ng omesterir a krasia a re ngariou a rengrir.” 7Misei, e bo moltirakl a tekingel a Dios. Momtok er a Diabelong, me bo lechiis er kemiu. 8Molekeed er kemiu er a Dios, me bo lekeed er kemiu. Mrisu a chimomiu, kemiu el chelsechusem er a klengit! Mongikiid a rengmiu, kemiu el teloadel a rengmiu el chad. 9Bo le mekngit a rengmiu, e bo meringel el lmangel; mruul a dereuakl er kemiu el mo lengeliu, ma deuil a rengmiu mruul el mo klengiterreng! 10Mnga rengmiu el mer iou er medal a Rubak, me bo longesecheklemiu. 11Rudam er ngak, lak mketemall a chisiu. Ngikel melemall a chisel a tar ngii ma lechub e ng omiich a telemellel, a melemall a Llach e mengetiit er ngii. A lsekum kom oukerrekeriil a Llach, e ng dikea mtar a rultirakl a Llach, e bai mla mo chad er a kerrekeriil. 12A Dios a di ngii el tang a omeskid a Llach e oukerrekeriil er kid. Ng di ngii el tang a sebechel el olsobel e melemall. E kau cho momdasu e ke techang me koukerrekeriil er a tar a chad? 13Chelechang e morrenges er ngak, kemiu el dmu el kmo, “Chelechal sils ma lechub e ng klukuk e aki mo merael bedul ker el beluu, el mo kiei el tal rak e mengerker el olsiseb a betok el udoud.” 14Ng kmal diak modengelii a di telkib el klukuk er kemiu el kmo ng mo ua ngerang! Kom di ua chetechat, el di moues el telkib e sola e nguemed. 15Tiakid a kiriu el dulii, ‘A lsekum ng soal a Rubak, e aki mo kiei e meruul er tiang ma lechub e aki meruul er sei.” 16Ngdi chelechang e ng mekedidai a rengmiu, e menglou a ngeriu; a ikel ua isei el omelekoi a cheleuid. 17Isei, e a chad el diak loruul a ungil el lodengei el kmo ng kirel el meruul, a kngtil.

will be added

X\