JAKOBUS 3

1Rudam er ngak, ng diak le kirir a re betok er kemiu el mo chad er osisechakl. Ele kom ungil medengei el kmo, kid el chad er osisechakl a lmuut el mo meringel a kerrekeriil el mer kid. 2Kede rokui el blechoel el mo e mecheuid a omerelled. Ngdi lsekum a chad a diak a tal le mecheuid er a omelekingel, e ng diak a telemellel e sebechel el di ngii el mtebechelii el tal chad. 3Kede melbard er a tetuk el deel el oba okul er a ngerel a uos me ng mo oltirakl er kid, e sebeched el orolii el mor sel soad. 4Ma lechub e ka momdasu er a chimol diall, ng kmal klou e obekall er a mesisiich el eolt, e di mo sebechel el obesiur er a kmal kekerei el ongeu, me ng mo sebechel a chad el omekall er ngii el mesiurii el mor sel soal a le bor ngii. 5Me ng di ua isei a churad, ng di kekerei, e ngdi sebechel el melekoi a ngarbab e meklou el tekoi! Ka momdasu er a ngau el di kekerei e sosebii a klou el oreomel. 6E a chur a di ua ia ngau. Ng blil a mekngit, el medechel er olsechelel er a bedenged e omerk a mekngit el mekekid el tal chad. Ng otutii a ngau er a klengar er kid el rokir el oba sel ngau el mlengai er a beluu er a ngau. 7A chad a sebechel mengedung a charm, e mla remuul a rokui el bedengel a charm, el tebelik el charm, ma suebek el charm ma ngar ngii a chelibel el charm ma ngikel el mo mekedung. 8E ngdi dirkak a di tal chad el mla cholleklii a churad a re chad. Ng mekngit, e diak el sebechel mutebechel, e mui er a omekodall. 9Kede ousbech er ngii el mereng a sulel a Rubak e Chedam, e dirrek el ousbech er ngii el melebeakl er a tar a chad el di ua ikid, el ulebeob el okesiul a Dios. 10A tekoi er omerengelsaul ma omelebeakl a kaitebetobed er osisiu el ngor. Rudam er ngak, tiang a diak le kirel el ua isei! 11Ng diak a madedok el di ta oltobed a ungil ma mechuached el ralm. 12Rudam er ngak, a kerrekar el fig a diak el sebechel el ourodech a olib ma dellomel el bilong a diak el sebechel el ourodech a fig, ma ka le sebechel a mecherocher el madedok el oltobed a beches el ralm. 13Ng ngar ngii er a delongeliu a mellomes a rengul e medenge tekoi? Bo lochotii er a ungil klengar er ngii, ma ungil el omerellel el meruul el oba klengariourreng ma llomeserreng. 14Ngdi lsekum a rengmiu a mui er a chelechei, ma delebsochel, e di omdasu a mo kiriu, e lak bor a klengit el kirel a klemerang el chemat er a llemesiu. 15A ua isei el llomeserreng a diak le ngar a eanged el mei; ng bai di tekoi er a beluulchad, e diak el tekoi er a klereng, e ng tekoi er a mekngit el chelid. 16Sel le ngar ngii a chelechei ma re di omdasu er tir, e ng dirrek el ngar isei a uldikel ma bek bedengel a mekngit. 17Ngdi llomeserreng el ngar bab el mei a kot e ng klikiid, e sola e chelellakl, e medemedemek, e ungil er a re chad, e mui er a klechubechub, e meruul a bek bedengel a ungil, e ultebechel, e diak a cheleblad er ngii. 18Ma re chad er a budech sel lolalem a tane er a budech e te mo meridm er a llemalt.

will be added

X\