JAKOBUS 2

1Rudam er ngak, el oumerang er a Rubak er kid el Jesus Kristus el Rubak er a klebkall, ng kmal diak le kiriu el mengetukel er a re chad el osenged er a teletelir a uchul. 2Chomko ng ngar ngii a meteet el chad el oukebkab er a kolt e kmal ungil a bilel el mei er a ongdibel er kemiu, ma chebuul el chad el kmal mechut a bilel me ng dirrek el mei, 3e kemiu a mengull er a ungil bliull el chad me kom dmu er ngii el kmo, “Bo mdengchokl er tial kot el ungil kingall,” e sola e dmu er a chebuul chad el kmo “Bo mdechor er sei, ma lechub e be mdengchokl er tiel ulaol er bitar ochik,” 4seikid e kom mocha mekngit, ele kom mengetukel er a re chad er a delongeliu, e mocha mekngit ele ng chebirukel a uldesuiu cho moruul a tekoi. 5Morrenges, kemiu el odam er ngak! A Dios a millilt er a re mechebuul er tial beluulchad el mo mesisiich el oumerang er ngii e mo ngma dikesir er a rengedel el le dilu el kmo ng mo omesterir tirkel betik a rengrir er ngii. 6Ngdi kemiu omekrur er a re mechebuul! Te ngera tirkel mengebuul er kemiu e mengurs er kemiu el mor medal a chad er a kerrekeriil? Te meteet! 7Ng tir a melekoi a mekngit el kirel sel ungil ngakl el cho bla mnguu. 8Kom meruul a ungil tekoi cho moltirakl a llechul a Rengedel a Dios el ngar a Chedaol Llechukl el kmo, “Bo le betik a rengum er a ngar bitar kau el ua le betik a rengum er kau.” 9Ngdi lsekum omerellem el mor a re chad a ultuil er osengem er tir, e kau a mocha er a klengit, ma Llach omasech er kau el melemall a llach. 10Ngikel tomellii a di tar a llach a mla tomall el rokui. 11Ele ngikel dilu el kmo, “Lak bo le melaok a rengum,” a dirrek el dilu el kmo, “Lak bo momekoad.” Ma lsekum ng dimlak bor a laokreng, me kau a di melemall a llach a cho momekoad. 12Mongedecheduch e moruul a tekoi el ua re chad el mo mukerrekeriil omerellir er a llach el meruul er a re chad el mo mimokl. 13Ele Dios a bo loukerrekeriil omerellel a chad e ng diak bo le chebur ngikel dimlak bo le chebur a tar a chad; ngdi klechubechub a mo mesisiich er a kerrekeriil. 14Rudam er ngak, ngera klungiolel a lsekum a chad a dmu el kmo ng oumerang e diak lochotii er omerellel? Ng sebechel isel kmo “ng oumerang” er ngii el osebelii? 15Chomko ng ngar ngii a re bebil er kid el ousbech a bail e diak a kelir, 16e ng ngera ng mo rullii er tir Cho mdu el kmo, “A Dios lomekngeltengat er kemiu! Bo lak mekerasem e bo mungil el omengur!”, a lak besterir a ikel lesal ousbech? 17Ma doumerang er a Dios me ng ua isei; a di doumerang e lak omeruul el obengkel, e ng di ua lak doumerang. 18Ngdi tar a chad a mo dmu el kmo, “A tar a chad a oumerang e a kuk tang a ungil omerellel.” A nger er ngak a kmo, “Ka mochotii er ngak el kmo ng mekera chad a loumerang e lak lecholt er omerellel. E ngak a mo ochotii er kau el kmo ak uumerang el oeak a omerellek.” 19Kom oumerang el kmo ng ngar ngii a di tal Dios? Ng ungil! A mekngit el chelid me ng dirrek el oumerang, e omritel er a dakt. 20Kemiu el mesesuau! Ng somiu a kuchotii er kemiu el kmo a doumerang el diak lecholt er omerelled, e ng diak a belkul? 21Ng milekera ucheled el Abraham e mo ungil er a rengul a Dios? Ng uleak omerellel er a lodersii a ngelekel el Isak er bebul a olengetongel. 22Me ng diak mosang? Ng uluumerang e chilolt er omerellel. Me ng mlecherrungel el oumerang el omerellel a uchul. 23Me ng mlo tmaut a Chedaol Llechukl el kmo, “A Abraham a uluumerang er a Dios, me ng ngii el uluumerang a uchul ma Dios a rirellii el mo ungil er a rengul.” Misei e a Abraham a lulengklii el sechelil a Dios. 24Me bo modengei el kmo, a chad oeak omerellel e mo ungil er a rengul a Dios; ng diak di loumerang e le merekong. 25Ng dirrek el mle ua isei a Rahab el ulelterau a bedengel er a deleboes. Ng merruul el mo ungil er a rengul a Dios el omerellel a uchul, er a le ngititerir a ruurabek el chad er a Israel e le ngesuterir el chemiis el oeak a kuk tar a rael. 26Kede ua bedengel a chad el ulekoad, a doumerang e lak a ngeral de rellii el olechotel.

will be added

X\