JAKOBUS 1

1Ngak el Jakobus, el mesiungel a Dios ma Rubak el Jesus Kristus a meluches el ekong e outkeu er kemiu el rokui el chedal a Dios el berberriid er a beluulchad el rokir. 2Rudam er ngak, bo lungil a rengmiu sel cho bo mcharm a bek bedengel a ringel, 3ele kom medengei el kmo sel di moumerang el outekangel a ikal ringel e ng merael el mo meduch a rengmiu. 4Molemolem el outekangel el mor a ulebongel, me bo mungil el cherrungel el diak a telemelliu, ma diak olengesonges er kemiu. 5A le ngar ngii er kemiu olengesonges er a llomeserreng, e lolengit er a Dios, me le bsang; ele Dios a ungil a tekingel el diak a le kiresii er a ngii di le chad. 6Ngdi ngikel olengit a kirel el oumerang e diak di le telkib el oumededenger. Ele ngikel oumededenger a ua ia chedesaoch er a daob el medoko er a eolt el mol mei. 7- 8Ele ngikel chad el teloadel a rengul, e diak lultebechel er a ngii di le ngerang el loruul, a diak le kirel el omdasu elkmo ng ngar ngii a ngeral bo le nguu er a Rubak. 9Ngikel chedal a Rubak el che-buul, bo lungil a rengul a longe-secheklii a Rubak, 10ma meteet el chedal a Rubak bo ledeu a rengul a longengetii a Rubak. Ele meteet el chad a di ua bngal a chudel el mo moalech e ruebet. 11Ele sils a ngmasech el merredes a kleldelel el durur a chudel, me ng mo moalech e ruebet a bngal, e remiid a klebekelel. Ma meteet el chad me ng di ua isei a blekerdelel el di mechesang er a urerel e mengai el mo dibus. 12Ng ngeltengat ngikel chad el di outekangel er a ringel el mor a ule-bongel, ele ng mo nguu omeksullel er sel klengar el le dilu Dios el kmo ng mo mesterir tirkel betik a rengrir er ngii. 13A lsekum a chad a measem er a ua isei el ongarm, e ng diak le kirel el kmo, “Tial ongarm a mlar a Dios el mei.” Ele Dios a diak el sebechel el mecharm er a mekngit, ma diak longarm er a ngii di le chad. 14Ngdi chad a di ngii el mor ongarm sel le mekesuseu e lobedikl er a ikel mekngit el soal a rengul. 15E a ikel mekngit el soal a rengul a be le dubech e ng mo mechellii a klengit; e a klengit, a le medechang e ng mechellii a kodall. 16Lak kom mecheblad, kemiu el betik er a renguk el odam er ngak! 17A bek el ungil e cherrungel sengk a ngar a eanged el mei; ng mei el ngar a Dios, el ulemeob a llomes el ngar a eanged, el diak le mengodech, ma diak le bor ngii a telkib el milkolk er ngii. 18Ng di mle ngii el tibir er a rengul e omekdubech er kid el oeak a tekoi er a klemerang, me bo de kot el ngar uchei er a rokui el blebelel. 19Lak kom obes er tial tekoi, kemiu el betik er a renguk el odam er ngak. A re bek el chad bo le mereched el orrenges, e le meoud el mengedecheduch, e le meoud el ngmasech a rengrir. 20A ngesechel a rengul a chad a diak a ngeral le rellii er a ikel ungil er a rengul a Dios. 21Me bedobed el chemoit a ikel bek bedengel a mengelengalek e kikiongel el blekerdeliu ma omerelliu. Mnga rengmiu el mer iou er medal a Dios e mngai a tekoi el lolalem er a rengmiu, el ingii a sebechel el osebelemiu. 22Lak di le kemiu el mengeblad er kemiu me di morrenges a tekingel e le merekong; bai mngai lotaut er omeruul. 23Ngikel di orrenges er a tekoi e diak loruul er ngii a ua chad el omes er ngii er a dirk e mesa teletelel. 24Ng mo ungil mesang er a dirk e sel lorael e ng di obes el kmo ng ua ngerang. 25Ngdi ngikel mo ungil el omes er a diak a telemellel el llach el meruul er a re chad el mo mimokl, e kerekikl er ngii, e diak di lorrenges e lechoit, e bai ngmai e otaut er omeruul, ingikel chad ia bo lomekngeltengat er ngii a Dios er a ikel loruul. 26A le ngar ngii a chad el omdasu el kmo ng blak a rengul er a tekoi er a klechelid, e diak el sebechel el orekedii a chural, e a klechelid er ngii a diak a belkul e ngii a di ngii el mengeblad er ngii. 27Tiakid a lomasech er ngii a Dios el Chedam el kmo ng merang e bliochel el rolel a klechelid, momekerreu er a re diak a demerir ma re derrir el ngalek, ma re melakl dil er a chelebulir, e mkerekikl el omekiai a klikingelel a beluulchad.

will be added

X\