HEBRU 9

1Sel kot el telbiil a mlar ngii er ngii a llechul omengull el meluluuch er a Dios e dirrek el mlar ngii a blil omengull el meluluuch. 2Ng merruul a tento, e sel ngelong er ngii el lomekedo er ngii el kmo Chedaol Delemerab a mlar ngii er ngii a blil olbidel ma tebel er a uldars el blauang. 3Ng mlar ngii a ongerul chebill el milleakl er a kot el tento er sel ongerul tento el lomekedo er ngii el kmo Kmal Chedaol Delemerab. 4Sei ia mlar ngii er ngii a kolt el olengetongel er a ochod, ma Blil a Telbiil el di bliull er a kolt el rokir, e a kolt el bekai el ngar ngii a mana er ngii a mlar a chelsel, ngii ma skersel a Aron el mla duubech a tiul, ma ikel bad el llechukl a telbiil er ngii. 5E a bebul sel Blil a Telbiil a mlar ngii er ngii a re kerubim el mle berrokel osebekir el mo mengucheb er sel blil omelubet el klengit. Ngdi ikal tekoi a diak el sebeched el oudertal mesaod er chelechang. 6Tiakid a mle rolel okedmeklel a rokui el tekoi er a blil olengetongel. A re prist a mle bek el sils el bo le siseb er a chelsel sel kot el tento el mo meruul a ngerchelir. 7Sel ongerul tento a di ngikel ngarbab el prist a mo soiseb er ngii, el di tang er a tal rak. Ng olab a rasech el mong el bo lolenget el kirel a kngtil ma kngterir a re chad el dimlak lodengei e remuuul. 8Ng oeak itiang a Chedaol Reng el olecholt el kmo a rael el mo soiseb er sel Kmal Chedaol Delemerab a dirkak le mengai a chesmerel, ele ng dirk dechor a tento er a ngelong. 9E tia okesiu el melutk er chelechang. A doltirakl er ngii, e a uldars ma tenget el charm el metenget a diak el sebechel el mo ungil kikidii a rengul a chad el mengull el meluluuch er a Dios. 10A ikang a di tekoi er a kall ma ilumel ma kakerous el rolel omengikiid, el llechul a klechad el di melemolem el mor sel bo lukbeches a rokui el tekoi a Dios. 11Ngdi Kristus er a le mei el Ngarbab el Prist er a mla mor ngii el klungiaol, e seikid e ng mlo soiseb er a kuk klou e lmuut el ungil el tento el diak le rruul er a re chad, el ka le klalo er tial beluulchad. 12Ng di mle tal bo le siseb er ngii el Kmal Chedaol Delemerab el dimlak lolab a rsechel a kaming ma sechal el kerbou, e ng bai ullab a rsechel, me ng chirrengelii a ngbetel a klengit el diak a ulebengelel. 13A lsekum a rsechel a kaming ma rsechel a sechal kerbou ma chebul a tenget el ngelekel a kerbou a le ngilai el meliim er a re chad el diak le klikiid me te mlo klikiid, 14ng diak bai lluut el klou a le rirellii a rsechel a Kristus, el uleak a Reng e uldersii a klengar er ngii el klikiid e cherrungel el tenget el mor a Dios. Ng mengikiid a rengud er a diak a ultutelel el omeruul, me ng mo sebeched el mesiou er a di ngar el Dios. 15Sei a uchul ma Kristus a meruul er a beches el telbiil, me tirkel mokedong a mo sebechir el ngma dikesir er a klengeltengat el diak a ulebengelel el le dillii a Dios er a telbilel. Ng ua isei ele ng mlad a chad el melubet a kngterir el le riruul er a le ngar ngii a kot el telbiil. 16Sel bla le moterekokl el kmo ng mla mad a chad, e kid a mochu melebedebek a ikel llechukl el tekingel el kirel a kloklel. 17Ele llechukl el tekingel a chad er uchei er a le mad a diak a belkul sel dirk le chad, e ngdi mor ngii a belkul er uriul er a le mad. 18Me ng dirrek el ua isei sel kot el telbiil el le mlak lousbech a rasech e ng dimlak bo le tekoi. 19A Moses er ser a ledu er a re chad el rokui a bek el tekoi er a Llach, e ng ngila rsechel a ngelekel a kerbou ma rsechel a kaming, e dirrek el ngila ralm ma bekerkard el bsechel a sib ma hisob, e dilimii ngii el babier er a Llach e dirrek el milliim er a re chad el rokui 20e dmu el kmo, “Tial rasech a melisiich er sel telbiil el bla ledu er kemiu a Dios el kmo kom mo oltirakl er ngii.” 21Ng dirrek el ullab a rasech el meliim er a Chedaol el Tento ma ikel rokui el klekedall el luluusbech er omengull el meluluuch er a Dios. 22Me ng ua isei, a doltirakl a Llach, e a bek el tekoi a oumesingd el mekikiid er a rasech, ma lak le tobed a rasech e ng diak le mengubet a klengit. 23A ikel okesiul a ikel ngar a eanged, a mle kirel mekikiid el ua isei. Ngdi ikel ngar a eanged a ousbech a lmuut el ungil el tenget. 24A Kristus a dimlak bo le siseb er a rruul er a re chad el Chedaol Delemerab, el di okesiul sel meral blil a Dios. Ng bai mlo soiseb er a eanged, el le ngar ngii er chelechang e olecholt er ngii er medal a Dios el omtechei er kid. 25A ngarbab el prist a mo soiseb er sel Kmal Chedaol Delemerab er a bek el rak el olab a rsechel a charm. Ngdi Kristus a dimlak bo le betok el lolenget er a klengar er ngii, 26ele chomko ng ua itir, e ng ulemuchel el mo chuarm er ser a lomuchel a beluulchad e di chuarm el mer chelechang. E ngdi chelechal ulebongel ku er a beluul-chad, e ng di mle tal be ledum el me melubet a kngterir a re chad el oeak a klengar er ngii el le tilengetengii. 27A re chad a di tal le mad, e sola e ng mochu oukerrekeriil er tir a Dios. 28Ma Kristus el mla tal le metenget el melubet a kngterir a re betok el chad, a lmuut el mei el dikea lolubet a klengit, e ng bai mei el me olsobel er tirkel blak a rengrir el mengiil er ngii.

will be added

X\