HEBRU 8

1A belkul a kimolekoi er ngii el tekoi a kmo ng ngar ngii er kid a choua ngikal Ngarbab el Prist el mlo nguu a kingellel er a kadikm er a kingellel a Dios er a eanged. 2Ng mesiou er a chelsel sel Kmal Chedaol Delemerab el ngii a meral tento, el lulleketek er ngii a Rubak el dimlak le chad a meleketek er ngii. 3A re bek el ngarbab el prist a metutk el kirir el mo oldars a uldars ma tenget el charm; me ng dirrek el kirel ngkaikid el Ngarbab el Prist el ngar ngii a ngerang el bo lolenget. 4Chomko ngkaikid el Prist a ngar a beluulchad, e ng mo diak le prist, ele te betok a re prist el melenget a tenget el oltirakl a Llach. 5A ikel loruul tirkal prist a di okesiul e llechul sel ngar a eanged; ele Moses er ser a bochu lomekedechor er a tento, e a Dios a dilu er ngii el kmo, “Ke mo kerekikl el oltirakl a bek el teletelel sel cho milsa er a rois.” 6Me chelechang e a Kristus a mla nguu a omesiou el lmuut el ungil er sel di mla ngar ngii, el di ua isel telbiil er a rengedel a deleuill er a delongelel a Dios ma re chad el kuk ngarbab er sel di mla ngar ngii, ele ng milekedmokl el ultuil er a lmuut el ungil el telbiil. 7Ele chomko sel di mla telbiil a dimlak a mekngit er ngii, e ng diak a belkul a le bor ngii ongerul telbiil. 8Ngdi Dios a medenge kngterir a re chedal me ng dilu el kmo, “A tar a klebesei e ak mo rullii a beches el telbilek ngak ma blai er a Israel ma blai er a Juda; 9el diak le ua sel telbilek el mor a re demerir er ser a kureked a chimorir e kngititerir el otebedeterir er a Ekipten. A Rubak a kmo, tir a dimlak lotireklii a telbilek, ma uchul me ng dimlak kurrenges er tir. 10A Rubak a kmo, tiakid a telbiil el bo kuruul er ngii er a tar a klebesei ngak ma blai er a Israel. Ak mo locha llechuk er a uldesuir, e mo lmuches er a rengrir. Ak mo Dios er tir, me tir a mo chedak. 11Ng diak bo le kaosisechakl ma lechub e a chad bo ledu er a odam er ngii el kmo, ‘Bo modengelii a Rubak,’ ele te rokui el di mo medengelkak, a re mekekerei el mo lmuut er a re meklou. 12Ak mo chubteterir er a chelebirekelir, e diak kluut el mo melatk a kngterir.” 13Ma lolekoi er a beches el telbiil, e sel di mla ngar ngii a mocha mechut. A mechetong el tekoi a di kmedung e ng remiid el mo diak.

will be added

X\