HEBRU 7

1A Melkisedek a king er a Salem, e prist er a Kot el Ngarbab el Dios. A Abraham er a lodelecheklterir a re king e lleta er a mekemad el mei e a Melkisedek a ulsiueklii e ulemekngeltengat er ngii. 2Ma Abraham a milsa ongeltacher er a bek el kloklel. A kot e a belkul a ngklel a Melkisedek a “King er a Llemalt,” e sola e king er a Salem el belkul a kmo, “King er a Budech.” 3Ng diak a demal, el diak a delal, el diak a medengelii a uchelel. Ng diak a olechotel a cherellel ma lechub a olechotel a kodellel. Ng ua Ngelekel a Dios el di prist el mo cherechar. 4Bo modengei el kmo ng ngarbab el chad! A Abraham el bdelul a kebliil a milsa ongeltacher er a ikel klalo el le ngilai er a mekemad. 5Tirkel ngelekel a Levi el ngiluu a ngerachel er a kleprist a mlor tir a Llach el mo melai ongeltacher er a re chad, el tir a bebil er tir, el dirrek el ngelekel a Abraham. 6E ngdi Melki-sedek a dimlak le rasech er a Levi e ngila ongeltacher er a Abraham e ulemekngeltengat er ngii, el ngii el Abraham el mlor ngii a telbilel a Dios. 7Ng bleketakl el tekoi el kmo a ngarbab el chad a omekngeltengat er a ngariou el chad. 8A de nguu er a re prist e a ongeltacher a lullai a re chad el di mo mad, e a de nguu er a Melkisedek e a ongeltacher a lullai a chad el diak bo le mad. 9Me ng sebeched el kmo a Levi el milla ongeltacher, a millecha ongeltacher er ngii el okiu a Abraham, 10ele ng dirk mle rasech el ngar a bedengel a demal er a Abraham er ser a bo le kebetech ngii ma Melkisedek. 11Chomko ng dimlak a telemellel a kleprist er a Levi el ngii a uchul ma re chad a ngiluu a Llach, e ng ngera belkul a le bor ngii a ngodech el kleprist el oltirakl er a deruchellel a Melkisedek, e diak loltirakl er a deruchellel a Aron? 12A lsekum ng ngar ngii omelodech er a kleprist, e ng dirrek el kirel mor ngii omelodech er a llach. 13Ele Rubak er kid el ngii a medu ikal tekoi el kirel, a chad er a ngodech el kebliil, el dimlak a chad er ngii el mesiou er olengetongel. 14Ng bleketakl el kmo ngii a chad er a kebliil er a Juda, e a Moses a dimlak a ngeral ledung el kirel ngii el kebliil er ser a lolekoi er a kleprist. 15Ng mengal mo bleketakl sel le bor ngii a prist el ua Melkisedek, 16el mo prist el diak loltirakl a llach er a klechad, e ng bai oltirakl er a klisichel a klengar el diak bo le metemall. 17Ele tekoi el meldung el kirel a kmo, “Kau a prist el mo cherechar el oltirakl er a deruchellel a Melkisedek.” 18Chelechang e a dimla llach a mo medechel, ele ng mechitechut e diak a ultutelel. 19Ele Llach a dimlak a ngeral le cherrengelii; misei e ng ngar ngii a lmuut el ungil el tekoi el chemotang el dolatk e mengiil er ngii, el doeak ngii e kede mo kmeed er a Dios. 20E ngar ngii a lmuut el mesisiich el telbiil el obengkel tiang. 21Tirkel mlo prist er a ngar a mong a mlo ngma deruchall el dimlak a mesisiich el telbiil el kirir, e ngdi Jesus a mlo prist el oeak a mesisiich el telbiil el le dillii a Dios el mor ngii el kmo, “A Rubak a rirellii a mesisiich el telbiil el diak bo le mengodech; e ngii el telbiil a kmo, ‘Kau a prist el mo cherechar.’” 22Me tia rullii a Jesus el mo tebechelel a lmuut el ungil telbiil. 23Ma lmuut el tang a kmo, tirkel prist er a ngar a mong a mle kaimedmad me ng mlo diak el sebechir el melemolem a urerir misei a uchul me ng betok er tir a mlo prist. 24E ngdi Jesus a di ngar el mo cherechar ma kleprist er ngii a diak le moiuid el mor a tar a chad. 25Me ng di blechoel el sebechel el lolsobel er tirkel olekeed er tir er a Dios el oeak ngii, ele ng di blechoel el di ngar el meluluuch el kirir. 26Ng ungil el le ngar ngii er kid a ua isel Ngarbab el Prist, el chedaol, e diak a telemellel, el diak a kngtil, e mleakl er a re mekngit el chad, e mlekider el mor bab er a eanged. 27Ng diak le ua tirkel ngarbab el prist el bek el sils el loldars a tenget, el ma omuchel el melenget el kirel a kngterir e mochu melenget el kirel a kngterir a re chad. A Jesus a di mle tal loldars er a tenget er ser a lodersii a klengar er ngii. 28A Llach a melutk er a re chad el ngar ngii a chelitecheterir el mo ngarbab el prist, e ngdi tekoi er sel mesisiich el telbiil, el mlor ngii er uriul er a Llach, a melutk er a Ngalek el mo ngarbab el prist el ngikel cherrungel el diak a telemellel el mo cherechar.

will be added

X\