HEBRU 6

1Misei e bai de ngesechekl el mor a osisechakl el kirir a re ultebechel el chad, e lak di de ngar a uchelel osisechakl el kirel a Kristus. Ng diak le kired el omelekl el meruul er omekedecheraol er a bult el mo imikr a diak a belkul el ureor ma mo oumera er a Dios; 2ma osisechakl el kirel omelecholb, ma omekngeltengat el omor a chim; ma okiis er a kodall, ma kerrekeriil el diak le mengodech el mo cherechar. 3Ma bo lungil er a rengul a Dios, e kuk de ngesechekl el bedul uchei. 4Tirkel mla mo diak loumerang te mekera e lmuut el obult? Ng mle tal le chermii e mlo medengelii ngiil ngat el mlar a eanged el mei, e ngila dikesir er a Chedaol Reng, 5e mlo medengelii a klungiolel a tekingel a Dios ma klisichel sel mei el beluulchad. 6Me ng ua isei e tir okor e mo diak loumerang. Misei e ng diak a rolel e lluut el mo oumerang ele ng di tir el ua lluut el meleel er a Ngelekel a Dios er a kerus e oltuub er ngii er mederir a re chad. 7A Dios omekngeltengat er a chutem el le mekudem el mor ngii a chull er ngii e ng mekdubech a dellomel el ngar ngii a belkul er a re chad el ousers. 8E ngdi lsekum ngiil chutem a duubech er ngii a tochedulik ma chudel e ng soal el mo medebeakl er a Dios. Ng diak a ultutelel me ng mo meseseb er a ngau. 9Ngdi, kemiu el betik er a rengmam, aki melekoi el ua isei, e aki di ungil el medengelkemiu. Aki medengei el kmo kom olab a lmuut el ngarbab el klengeltengat el kirel osebeliu. 10A Dios a diak le chebirukel me di lobes a ureriu ma bltkil a rengmiu er ngii el mulechotii er cho mosiou er a re chedal. 11Aki kmal oureng ma ta ma tar kemiu bo le blak a rengul el mo lmuut er a ulebongel, ma ikel tekoi el molatk e mengiil bo letaut, 12e lak bo mesaik, e bai bo moltirakl a blekerdelir tirkei el di uluumerang e uleba kllourreng me te mlo ngma dikesir er a telbilel a Dios. 13A Dios er ser a loruul er a telbilel el mor a Abraham, e ng dimlak a kuk ngarbab er ngii el bo loeak ngii el olsiich er a telbilel, me ng di mle ngii el ousbech er a ngklel el olsiich a tekingel 14el kmo, “Ak ulterekokl el mo omekngeltengat er kau e mo omdois er a re ngelekem.” 15A Abraham a milengiil ma uchul e ng mlo tmaut ngiil telbiil. 16A re chad a le meral olsiich a tekingir e tousbech er a ngakl el kuk ngarbab er tir, e seikid e ngii a mo mutebechel sel telbiil. 17A Dios er ser a bo le soal el kmal meketeklii er tirkel mo ngma dikesir er a telbilel el kmo ng diak bo le ngodech a uldesuel, e ng ulelsiich er a telbilel el oba lmuut el mesisiich el tekoi. 18Me ng ngar ngii a ikal erul osichel a telbiil el diak el sebechel el mengodech, ma Dios me ng diak lomulak el kirel a ikang, e kid el chiliis el osiik osebechakl bo le meduch a rengud el orekedii sel omelatk el de chelebangel er ngii. 19Tiaikid el omelatk a otil a klengar er kid. Ng ungil el kldmokl e ulterekokl, e soiseb el engelakl er a chebill el mor sel kmal chelsel a blil a nglunguuch. 20A Jesus a mla oeak uchei el mo soiseb er ngii el omte-chei er kid, el mla mo ngarbab el prist el diak a ulebengelel, el oltirakl er a deruchellel a Melkisedek.

will be added

X\