HEBRU 5

1A re bek el ngarbab el prist a mengilt er a delongelir a re chad e metutk el mo omtechei er tir el mesiou er a Dios, el oldars a tenget ma uldars el kirel a klengit. 2Ng ngii el betok a chelitechetul a uchul me ng sebechel el medemedemek omerellel el mor a re metitur ma re touchakl. 3Ng ngii el mechitechut a uchul me ng diak di loldars a tenget el kirel a kngterir a re chad e le merekong, e ng dirrek el oldars a tenget el kirel a kngtil. 4Ng diak a chad el di ngii el mo melai er tial deruchall, ng bai Dios a mekedongii el di ua iser a lomekedong er a Aron. 5Ma Kristus me ng ua isei el dimlak di le ngii el olengesechekl er ngii el mo ngarbab el prist. Ng bai Dios a dilu er ngii el kmo, “Kau a Ngelekek; chelechal sils e ak mla mo Demam.” 6Ng dirrek el millekoi el ngar a Chedaol Llechukl el kmo, “Kau a prist el mo cherechar el oltirakl er a deruchellel a Melkisedek.” 7A Jesus er a le ngar a beluulchad e ng mle klou a ngerel e dirrek el lilangel er a loluluuch e lolengit a ngera er a Dios, el ngikel mle sebechel el osebelii er a kodall. A Dios a rirengesii ele ng mle ngariou a rengul e blak a rengul er ngii. 8Ng mle Ngelekel a Dios e ngdi uleak a ringel el mo meduch el olengesenges. 9Ser a le rekui a ikel kirel el meruul, e ng mlo uchul e a diak a ulebengelel osobel a mor tirkel rokui el olengesenges er ngii, 10ma Dios a dilu el kmo ng ngarbab el prist, el oltirakl er a deruchellel a Melkisedek. 11Ng betok a kimolekoi el kirel tiang e ngdi meringel a dosaod ele ng kmal cheldeng a rengmiu. 12Ng mla mo kiriu el olisechakl e ngdi kom dirk ousbech er a chad el mo olisechakl er kemiu a ikel kot el uchelel a tekingel a Dios. Ng mla mo kiriu el menga medecherecher el kall e kor a re ngalek el dirk tmut. 13A chad el tmut a dirk kekerei el ngalek, me ng diak lodengelii a melemalt ma chebirukel. 14A medecherecher el kall a kirir a re meklou el chad, el loeak a ikel bla lesuub e ng sebechir el tiriter a ungil ma mekngit.

will be added

X\