HEBRU 4

1Me chelechang el dirk le medechel ngiil telbiil er a mo soiseb er a ulengellel, e bo mkerekikl me lak a tar kemiu el bo le betik er ngii el diak el sebechel el mo soiseb er ngii el ulengull. 2Ele Ungil Chais a mler kid el di ua sel mlor tir, e ngdi klumech el mlor tir a dimlak bo le klungiolir, ele tirkel rirengesii a dimlak bo loumera er ngii. 3Misei e kid el mla mo oumerang a soiseb er ngii el ulengull el le dilu Dios el kmo ng mo meskid, el ua ikel bla ledung el kmo, “Ng mle ochedechudel a renguk mak ulsichii a tekingek el kmo, ‘Ng kmal diak bo le siseb er a beluu el leko kmo omesterir a ulengellir er ngii,’” me ng mlo merek a urerel er ser a lomeob er a beluulchad, e ngdi ngii a dillii tiang. 4Tiakid a lolekoi er ngii a Chedaol Llechukl el kirel Ongeuid el Sils el kmo, “Ongeuid er a sils e a Dios a ullengull er a rokui el urerel.” 5E dirrek el kmo, “Ng kmal diak bo le siseb er a beluu el leko kmo omesterir a ulengellir er ngii.” 6Tirkel mle kot el rongesii ngiil Ungil Chais a dimlak le siseb er isel ulengull ele ng dimlak loumerang, e ngdi ngar ngii a re kuk bebil er a re chad el mo sebechir el soiseb er ngii. 7Ma Dios a liluut el tutkii a tar a sils el domekedo er ngii el kmo “Chelechang.” Uriul er a betok el rak e ng uleak a David el dmu ikal mla medung el tekoi el kmo, “Cho mrengesii a ngerel a Dios er chelechang, e lak molecherecher a rengmiu.” 8Chomko Josua a milsterir a ulengull, e a Dios a dimlak lolekoi er uriul er a kuk tar a sils. 9A le ua isei e ng dirk ngar ngii a ulengull el kirir a re chedal a Dios el di ua ulengellel a Dios er a ongeuid el sils. 10Ele ngikel soiseb er isel ulengull el lulekoi er ngii a Dios a mo olengull er a urerel, el di ua ia Dios el ullengull er a urerel. 11Mada bo le blak a rengud el mo soiseb er ngiil ulengull, me lak a tar kid el mo diak bo le siseb el ua itir ele tir el dimlak lorrenges a tekingel a Dios. 12A tekingel a Dios a di ngar e mesisiich, e kuk kedorm er erebita medal el saider. Ng melobech el di ngmoech el mor sel le ngar ngii omingel a klengar ma reng, el mor sel le ngar ngii a ulengeruaol ma cherrengul a chiuis. Ng merriter a urungulel ma uldesuel a rengul a chad. 13Ng diak a ngeral sebechel el obart er a Dios; a rokui el tekoi a di bleketakl er osengel, me kede rokui el mo mesaod er kid er ngii. 14Chelechal le ngar ngii a Ngarbab el Prist er kid el Jesus, el Ngelekel a Dios, el ngilasech el mor a eanged el mor sel le ngar ngii a Dios, e bo le blak a rengud el oreked a ikel doumerang. 15A Ngarbab el Prist er kid a diak di le tar a chad el diak lolechesiu a chelitechetud. A Ngarbab el Prist er kid a mlor ngii a rokui el ongarm el ua ikid, e ngdi dimlak le bor a klengit. 16Mada doumerang e dolekeed er kid er a kingall er a krasia, me bo de nguu er ngii a klechubechub e de betik er a krasia el mo ngosukid sel dousbech er ngii.

will be added

X\