HEBRU 3

1Mada kemiu el odam er ngak el bla lokedongemiu a Dios, molatk er a Jesus, el apostol e Ngarbab el Prist er a ikel tekoi el doumerang. 2Ng mle blak a rengul er ngikel millutk er ngii, el di ua Moses el mle blak a rengul er a urerel er a blil a Dios. 3E ngdi Jesus a rredemelel a lmuut el ngarbab el klebkall er a Moses el ua chad el omekedechor er a blai el kuk chetengakl er a blai. 4A bek el blai a ngar ngii a chad el meruul, e ngdi Dios a ngii a meruul a rokui el tekoi. 5A Moses a mle blak a rengul er a urerel er a blil a Dios el mlar a deruchellel a mesiou, e millekoi a tekoi el bo lolekoi a Dios er a ngar medad el klebesei, 6e ngdi Kristus a mle blak a rengul el Ngalek er a blai el merreder er a blil a Dios. Kid a blil a Dios a lsekum kede melemolem el diak de medakt e meduch a rengud el kirel a ikel tekoi el dolatk e mengiil. 7Misei e ng ua ikel lolekoi a Chedaol Reng el kmo, “Cho mrengesii a ngerel a Dios er chelechal sils, 8e lak molecherecher a rengmiu el ua ruleak uchei er kemiu er a lomtok er a Dios, er sel sils er a lolasem er ngii er a le ngar a ked. 9Tulemes a ikel kriruul er isei el 40 el rak e di milengarm e millasem er ngak. 10Isei e ng ngilasech a renguk er ngii el telecheroll, mak dilu el kmo, ‘Te di mo blechoel el metetuchakl a rengrir; e diak loltirakl a tekingek.’ 11Ng mle ochedechudel a renguk mak ulsichii a tekingek el kmo, ‘Ng kmal diak bo le siseb er a beluu el mle kirek el mo omesterir a ulengellir er ngii!’” 12Bo mkerekikl e rudam er ngak, me lak le bor ngii er a delongeliu a chad el imis el mekngit a rengul e diak loumerang me ng mo ikrii e mo cheroid er a di ngar el Dios. 13E bai le bek el sils el mchachelechel, er chelechal dirk le ngar ngii “Chelechal Sils”, me lak a tar kemiu el mo medecherecher a rengul el oeak a chelebeldil a klengit. 14Ele kid a kldemel a Kristus a lsekum kede sisichid el diak bo le ngodech a rengud el mor a ulebongel el di ua ser a domuchel. 15Tiakid a lolekoi er ngii a Chedaol Llechukl er chelechang el kmo, “Cho mrengesii a ngerel a Dios er chelechal sils, e lak molecherecher a rengmiu el ua ruleak uchei er kemiu er a lomtok er a Dios.” 16Te rua techa tirkel chad el rirengesii a ngerel a Dios e di ulekor e omtok er ngii? Ng tirkel rokui el le chilteklterir a Moses el tuobed er a Ekipten. 17Te rua techa tirkel mle kesib a rengul er tir a Dios el 40 el rak? Ng tirkel chad el mlor a klengit me te mlad er a ked. 18Ser a le rellii a telbilel a Dios el kmo, “Ng kmal diak bo le siseb er a beluu el leko kmo omesterir a ulengellir er ngii,” e te rua techa lullekoi er tir? Ng tirkel ulemtok. 19Kede mocha medengei el kmo ng dimlak el sebechir el mo soiseb er a beluu, ele ng dimlak loumerang.

will be added

X\