HEBRU 2

1Isei e ng kirel mo blak a rengud er a ikel klemerang el bla derenges, me lak doberius el mo cheroid er ngii. 2A lsekum a klumech el lullekoi a re anghel a meral mle sebeched el ultuil er ngii, ma bek el telucheklel ma oietel a ulebals, 3e kede mekera e diak bo dobals a lsekum kede choitii choua itial ngarbab el osobel? A Rubak a mle kot el ochotii ngiil osobel, e tirkel rirengesii el olisechakl a ulechotii er kid el kmo ng merang. 4Iseikid e a Dios a dirrek el mlo osiich a ikal ochotir el oeak olangch, ma mengasireng el tekoi, ma bek el bedengel a tekoi el chelid ma omerusel a nglat el oeak a Chedaol Reng el ngar sel soal. 5A Dios a dimlak loterekeklii er a re anghel sel mei el beluulchad el dolekoi er ngii. 6A kuk tar a bades a melekoi el kmo, “Ng mo ngera chad me ke kmal melebedebek er ngii; ng di chad e ke kuk kmal omekerreu er ngii? 7Ke rirellii el mor iou er a re anghel el di mle tedeb, e mla msa krone er ngii er a klebkellel ma deruchellel, 8e mla remuul a rokui el tekoi el mo chederdellel.” Me chelechang el bla bo le cheder-dellel a rokui el tekoi, e ng diak a ngeral diak longedereder er ngii. E ngdi dirkak bo domes a rokui el tekoi el chederdall er ngii. 9Ngdi kede omes er a Jesus el mlo tedeb el le kuk ngariou er a re anghel, me loeak a krasia er a Dios e le mad el kirir a rokui el chad. Kede omes er ngii er chelechang el mla nguu a krone er a klebkellel ma deruchellel el rengelel a kodellel a uchul. 10Ng ungilbesul a le Dios el ngikel omeob e omecheliu a rokui el tekoi, a bo loruul er a Jesus el mo cherrungel el diak a telemellel el oeak a rengelel me bo le ngititerir a re betok el ngalek el mo obengkel el ngma dikesir er a klebkellel. Ele ng Jesus ingii a orrael er tir el mor a osobel. 11Ele ngikel mengedaol me tirkel mechedaol a rokui el di ta Demerir. Sei a uchul ma Jesus a diak le merur el omekedong er tir el kmo te bebil er ngii, 12ele ng kmo, “Ak mo ochotii a ngklem er a rudam er ngak; ak mo odengesau sel bo le kldibel” 13Ng dirrek el melekoi el kmo, “Ak mo oumeral ulsirs er a Dios.” E dirrek el kmo, “Ngak tiang el obeteterir a re ngalek el le bilskak a Dios.” 14Ng tir el ngalek a ngar ngii a bedengir ma rsechir a uchul ma Jesus a mlo chad el ua itir, me loeak a kodall el tomellii a Diabelong, el ngikel oba klisiich er a kodall. 15Me tiaikid bo luchul e bo le ngebeteterir tirkel rokui el mle meketeket el rrengodel er a dakt er a kodall. 16Ng bleketakl el kmo ng dimlak lolengeseu er a re anghel e bai ullengeseu er a re ngelekel a Abraham. 17Seikid e ng mle kirel el kmal di mo ua re bebil er ngii er a rokui el tekoi, me bo le chubechub e le blak a rengul el Ngarbab el Prist el mesiou er a Dios, el kirel olbetelel a kngterir a rokui el chad. 18Ng ngii el mlo chuarm e dirrek el mlor ngii ongarm a uchul me ng sebechel el olengeseu er tirkel mor tir ongarm.

will be added

X\