HEBRU 13

1Molemolem el kaubltikerreng e le ta rengmiu. 2Mo metechakl er a re merael el chad, e te ngar ngii a re mla ua isei, e dimlak lodengei e kudmeklterir a re anghel. 3Molatk er a re ngar a kelebus, el ua cho mteloi er tir er a kelebus; e mdirrek el melatk er a lomekcharm er tir, el ua cho mcharm el obengterir. 4Mongull a chebechiil el bek el chad, e lak kom mongikiongel a dusall er a chebechiil, ele Dios a mo oukerrekeriil a deleboes ma laokreng. 5Mongeroid a klengar er kemiu er a ngibes er a udoud. Bo lungil a rengmiu er a ikel ngar ngii er kemiu; ele Dios a dilu el kmo, “Ng kmal diak bo kchitau ma ka bo kubes er kau.” 6Misei e ng sebeched el oumerang e melekoi el kmo, “A Rubak a olengeseu er ngak me ng diak bo kmedakt. Ng ngera sebechel a chad el rullii el mer ngak?” 7Molatk er a re mengetekliu el tirkel milengedecheduch a tekingel a Dios er kemiu. Molebedebek er a blekerdelel a klengar er tir el mo lmuut er a kodellir e bo mosuub er tir el oumerang. 8A Jesus Kristus a di osisiu er chelii, me chelechang, el mo cherechar. 9Lak kom mechetikaik er a kakerous el ngodech el blekerdelel osisechakl. Ng bai ungil a reng a bo le mesisiich el oeak a krasia er a Dios, e lak molsiich er ngii el olab a llechul omengang, el dimlak le sisicheterir tirkel uleltirakl. 10Ng ngar ngii er kid a chimol olengetongel el tirkel milsiou er a tento a diak le kirir el menga uldars er ngii. 11A ngarbab el prist a ullab a rsechel a charm el mo soiseb er a Kmal Chedaol Delemerab el mo melenget el kirel a klengit; ngdi bedengel a charm a lullul er a ikrel a tento. 12Ma Jesus me ng dirrek el mlo chuarm er a ikrel a beluu e mlad me ng mlo uchul e ng chemedolterir a re chad el olab a rsechel. 13Misei e de bor ngii er a ikrel a kiamp, me dobengkel er a rrengel er otubir a re chad. 14Ng diak a beluad er tiang el de kiei er ngii el mo cherechar, me kede osiik er sel merekung el beluu. 15Me doeak a Jesus, e de blechoel el oldars a tenget er odanges el mor a Dios, el ngii a urerel a ngor el olecholt er a ngklel. 16Lak mobes el meruul a ungil e morous a ikel ngar ngii er kemiu, ele Dios a dmeu a rengul er choua isel tenget. 17Morrenges er a re mengetekliu e moltirakl a tekingir. Ng diak lolengull el omecheliu er kemiu ele te mo mesaod er tir er a Dios el kiriu. Me mrelleterir me ledeu a rengrir el meruul er a urerir, ele ng diak bo le klungioliu a lsekum ng mekngit a rengrir. 18Moluluuch el kiram. Aki kmal medengei el kmo ng diak a metacherbesul el ngar a rengmam, ele ng somam el di blechoel el meruul a ungil. 19Ak kmal olengit er kemiu me bo le blak a rengmiu el meluluuch el kirek me bo le sebechek el mereched el lmuut el eko er a delongeliu. 20Mada Dios er a budech, el ngikel ulekisii er a kodall a Rubak er kid el Jesus, el Ngarbab el Mengkerengel a sib, loeak a rasech er sel diak a ulebengelel el telbiil, 21el meskemiu a ikel rokui el ungil el cho mousbech el meruul a soal. Loeak a Jesus Kristus e le rellii er a chelsiu sel ungil er a rengul. A klebkall le bor a Kristus el mo cherechar. Amen. 22Kemiu el odam er ngak, ak ulengit me lak bo le kekere rengmiu er a ikal tekoi el kungelechel er kemiu, ele tial babier er ngak el ekor kemiu a di kedeb. 23Ak mesubed er kemiu el kmo a odam er kid er a Timothy a mla tuobed er a kelebus, ma bo le mereched el mei e aki dmak el ekong. 24Mdu yorosku el mor a rokui el mengetekliu ma rokui el chedal a Dios. Tirkel odam er kid el mlar a Itali el mei a dirrek el melekoi a yorosku el ekor kemiu. 25A krasia er a Dios bo lobengkemiu el rokui. Amen.

will be added

X\