HEBRU 12

1Me chelechal le ngar ngii tial klou el ildois er a re chad el mlo chemolt el mesisiich el oumerang el iliuekl er kid, e de dirrek el mo mechei a ikel rokui el omekberaod er kid, ngii ma klengit el mesiiich el omereked er ngii er kid, e bo le meduch a rengud er sel klaidesachel er a rurt el de chelebangel er ngii. 2Di doturk osenged er a Jesus, el ngii a doumera er ngii er a uchul el mor a ulebongel. Ngii a dimlak bo le mechitechut a rengul er a kerus. Sel deurreng el dirk merael el mei a uchul me ng dimlak a belkul er ngii a rrengel a mo mad er a kerus, me chelechang e ng mla mo nguu a kingellel er a kadikm er a kingellel a Dios. 3Molatk er ngikel uluutekangel a choua isel odechelakl er a re mekngit el chad, me lak bo le kekere rengmiu. 4Kemiu a dirkak le tobed a rsechiu er a telekengeliu el omtok a klengit. 5Lak kom obes er omengelechel el ilekor kemiu el ngelekel el kmo, “Rungalek, lak le beot a rengum a losmechokl er kau a Rubak, e lak bo le kekere rengum a loungeroel er kau. 6Ele Rubak a mesmechokl er ngikel le betik a rengul er ngii, e omals er ngikel le nguu el mo ngelekel.” 7Mukduch a rengmiu sel mobals. A omerellel a Dios el ekor kemiu a omerellel el mor a re ngelekel. Ng ngar ngii a ngalek el diak losmechokl er ngii a demal? 8Chomko ng diak losmechokl er kemiu el ua re bek el ngelekel, e ng diak kom meral ngelekel, e kom ngalek er oreomel. 9A re demad er tial beluulchad a mesmechokl er kid, me kid a mengull er tir. Ma le ua isei, e ng diak bai lesal kirel ngii el Chedam el mo mengedereder a rengud me bo de ngar? 10A re demad a milsmechokl er kid el di kirel a tedeb el lomdasu er ngii e ng ungil, e ngdi Dios a mesmechokl er kid el kirel a klungioled, me kede mo chedaol el ua ingii. 11A rokui el omesmechokl sel le mer kid er chelechang e ng meringel er kid e chetid; e ngdi uriul e tirkel ngila klubelir er ngii a mo meridm a redechel a ungil klengar er a budech. 12Mada modars a ikel mesula el chim, e msisiich a ikel omretelal bkul a uach. 13Muklemalt a roliu, ma chitechut el uach lak leiit a chiuesel, e bai bo lungil. 14Bo le blak a rengmiu el omudech a delongeliu kemiu ma rokui el chad, e moruul er kemiu el mo chedaol, ele ng diak a chad el mo mesa Rubak a lak bo le chedaol. 15Bo mkerekikl me lak a choitii a krasia er a Dios. E dirrek el bo mkerekikl me lak el dubech er a chelsiu a mekngit el mo uchul a uldikel, e mo uchul ma re betok el chad a mo chelsechusem er a mekngit. 16Lak bor a deleboes ma lechub e bo mua Esau el dimlak longull er a Dios, me ng di mle kirel a teleblengur e ng oterur a llemeltel el kot el ngalek. 17Kom medengei el kmo uriul e ng mlo soal melai a dikesel er a klengeltengat, e ngdi dimlak le nguu. Ng lilangel el osiik a cheldechulel e ngdi dimlak el sebechel ngodechii sel le rirellii el tekoi. 18Kemiu a dimlak kom mei er a sebechiu el merutech er ngii el ua ia re ngalek er a Israel er a le bor a Rois Sinai el mlar ngii a kerdel a ngau, ma ilkolk, ma chucheb, ma oiu, 19ma ngerel a trombetang, ma ngor el ikel lolekoi a rirelleterir tirkel rirenges me tullengit me lak lluut el mengedecheduch er tir. 20Ng mle meringel er tir sel tekoi el meldu el kmo, “Ng mo obetech er a bad a chad el mo lmuut er a charm a bo le retechii tial rois.” 21Ng kmal mle kdekudel ma Moses a dilu el kmo, “Ak umritel er a dakt.” 22Ko bai mlei er a Rois Sion, el mler a belual a di ngar el Dios, el Jerusalem er a eanged, el le kldibel er ngii a re diak le mochur a ildisir el anghel el ngar a ungilklebesei. 23Kom mlei er ongdibel er a re kot el ngalek el llechukl a ngklir er a eanged. Kom mlei er a medal a chad er a kerrekeriil el ngii a Dios er a rokui el chad. Kom mlei er a mederir a re melemalt el chad el merruul a klengar er tir el mo cherrungel el chedaol. 24Kemiu a mlei er a Jesus, el ngikel merenged er sel beches el telbiil. Kom mlei er a meldiim el rasech el kuk bedochel a lolekoi er a ikel lolekoi a rsechel a Abel. 25Isei e bo mkerekikl, e lak bo le chetimiu el orrenges er ngikel mengedecheduch. Ele lsekum tirkel mle chetirir el orrenges er ngikel milengelechel er tir er tial beluulchad a dimlak el sebechir el chemiis me ng diak bo lobals, e kid kede mekera e mo sebeched el chemiis me ng diak dobals a lsekum ng chetid el orrenges er ngikel ngar a eanged e mengelechel er kid. 26Seikid e a ngerel a silmesmengii a beluulchad; ngdi chelechang e ng mla tibir a telbilel el kmo, “Ak lmuut el tal bo ksimesmengii a eanged ma chutem.” 27Sel kmo “Lmuut el tang” a olecholt el kmo a ikel mo mesmesim el di rruul er a chim a mo mengai el mo cheroid, e ngii a mo medechel a ikel diak el sebechel el mesim. 28Me ng kired el mereng a sulel a Dios ele kede mla nguu a rengedel el diak el sebechel el mesim. Dongull el meluluuch er ngii el ngar sel ungil er a rengul, el medakt e mengull er ngii; 29ele Dios er kid a meral kor a ngau el meleseb el diak a bo le becherei.

will be added

X\