HEBRU 11

1A chad el oumerang a kmal medengei a ikel tekoi el lolatk e mengiil, e ultebechel a uldesuel el kirel a ikel diak le moues. 2A re chad er a ngar a mong a uluumerang a uchul ma Dios a mlo ungil a rengul er tir. 3Kid oumerang a uchul me kede medengei el kmo a eanged ma beluulchad a ulebeob el oeak a tekingel a Dios, ma ikel moues a merruul er a ikel diak le moues. 4A Abel a uluumerang a uchul me ng tilengetengii a kuk ungil tenget er a tengetengel a Kain. Ng ulebasech el melemalt el chad, ele Dios a mlo ungil a rengul er ngii me ng ngiluu a tengetengel. Ng mla mad e ngdi dirk mengedecheduch ele ngii el uluumerang. 5A Enok a uluumerang a uchul me ng dimlak le mad e mengai el mor a eanged. Ng dimlak a metik er ngii ele Dios a ngiluu el mor bab. A Chedaol Llechukl a kmo uchei er a le bor a eanged e ng uldeuir a rengul a Dios. 6Ng diak a chad el diak loumerang e sebechel el odeuir a rengul a Dios, ele ngii di le chad el mor a Dios a kirel el oumerang el kmo ng ngar ngii a Dios, e ngii a omesterir omeksullir tirkel osiik er ngii. 7A Noah a uluumerang a uchul me ser a losubed er ngii a Dios er a tekoi el kirel a ngar medad el klebesei, e ng ulerrenges me ng mlo meruul er a arhe el olsobel er ngii ma re chad er a blil; seikid e a beluulchad a mlo chemolt el mledebeakl, e ngii a mlor a belsachel er tirkel meruul el mo ungil er a rengul a Dios ele ng ngii el uluumerang. 8A Abraham a uluumerang me ng ullengesenges er a Dios er ser a le mokedong el merael el mor sel beluu el bo lolai er ngii el mo dikesel. Ng dimlak lodengelii a beluu el le bor ngii e ngdi di mirrael. 9Ng di uluumerang me ng mlo kiei er isel beluu er a telbiil el ua chad er a ngodech el beluu. Ng kilie tento el di ua Isak ma Jakob el dirrek el mo ngma dikesir er ngii el beluu el telbiil el kirir. 10Ele Abraham a milengiil er sel beluu el luldesuii a Dios e toketekii el mesisiich omekedecheraol er ngii. 11A Sara el mle kebai a uluumerang a uchul me ng ngiluu a klisiich el mo sebechel el mo dioll, ele ng uluumerang el kmo a Dios a mo otutii a telbilel. 12Seikid e a Dios a uleak a tal chad, el bedengel a di ua le medkung, el mechelleterir a re betok el ngalek el ua ildisel a btuch er a eanged ma diak le mochur el chelechol er a rriil. 13Tirkal rokui el chad a mlad el uluumerang. Te dimlak lengai a ikel telbilel a Dios, e ngdi te miles me ng dirk cheroid e toutkeu me tullecholt el kmo te chad er a tar a beluu e ultechakl er tial chutem. 14Ele re chad el melekoi el ua isei a meketeklii el kmo tosiik er a meral kotir. 15Chomko te millebedebek er sel beluu el le tilobed er ngii, e ng mlar ngii a techellir el lmuut el mor ngii. 16E ngdi bai mle sorir a lmuut el ungil el beluu, el ngii a beluu er a eanged. Isei e a Dios a diak le merur a lomekedong er ngii el kmo ng Dios er tir, ele ng mla kudmeklii a mo belurir. 17A Abraham a uluumerang a uchul me ng uldersii a ngelekel el Isak el mo tenget er ser a longarm er ngii a Dios. A Abraham ingikel lurruul er a telbiil a Dios el obengkel, e ngdi ngii a mle kldmokl el mo odersii a ngelekel el mo tenget. 18A Dios a dilu er ngii el kmo, “A re ngelekem a mo oeak a Isak el mei.” 19A Abraham a mle medengei er a rengul el kmo a Dios a sebechel el olekiis er a re chad er a kodall. Seikid ia uchul ma Isak a ua ia le mlad e lluut el mo chad. 20A Isak a uluumerang a uchul me ng ulemekngeltengat er a Jakob ma Esau el kirel a ngar medad el klebesei. 21A Jakob a uluumerang a uchul me ser a le medkung e ng uluuderta er a re ngelekel a Josef el omekngeltengat er tir, e mlo otilii a bdelul er a skersel e mengull el meluluuch er a Dios. 22A Josef a uluumerang a uchul me ser a le medkung e ng millekoi er a tebedir a re chad er a Israel er a Ekipten, e dirrek el childereder a tekoi el kirel a cheklechel er uriul er a kodellel. 23A demal ma delal a Moses a uluumerang a uchul me ser a le mechell a Moses e lesang el ungil ngalek, e ng dimlak le medakt er a llechul a king e milertii el edel buil. 24A Moses a uluumerang a uchul me ser a bo le klou el chad e ng mle chetil a lolekoi er ngii el kmo ng ngelekel a ngelekel a Farao el redil. 25Ng bai mle soal el mo chuarm el obengterir a re chedal a Dios, e dimlak el soal el ngar a tedeb el deurreng er a klengit. 26Ng ulemdasu el kmo a bo lecharm er a dellenguul el kirel a Mesias e ng kuk lmuut el klou a belkul er a rokui el klungiaol er a Ekipten, ele ng ultaut osengel er a mo omeksullel el merael el mei. 27Ng uluumerang a uchul me ng tilobed er a Ekipten el diak le medakt er a ngesechel a rengul a king. Ng mle meduch a rengul el outekangel el ua lulemes er a Dios el ngikel diak le moues. 28Ng uluumerang a uchul me ng mirruul er a Baskua e ultebedii a tekoi el mor a re chad er a Israel me lediim a rasech, ma Anghel er a Kodall lak bo lokodeterir a re kot el ngelekir el sechal. 29A re chad er a Israel a uluumerang a uchul me te mlo imuul er a Bekerkard el Daob el ua luleak a medirt el chutem; e a re chad er a Ekipten er a losuub er tir el leko te mo imuul, e te di riros. 30Tuluumerang a uchul ma cheuotelel a Jeriko a mlongkangk er uriul er a loliuekl er ngii el euid el klebesei. 31A Rahab el ulelterau a bedengel er a deleboes a uluumerang, e tia ia silebecheklii me ng dimlak le mad el obengterir tirkel dimlak loltirakl er a Dios, ele ng ngilititerir a re mlo ourabek el chad er a Israel. 32Ng dirk sebechek el ouchais a betok, e ngdi ng kmal mo kemangel a bo kuuchais a chisel a Gideon, ma Barak, ma Samson, ma Jeftha, ma David, ma Samuel, ma re profet. 33Tirka uluumerang a uchul me te mlo mesisiich er a bebil er a beluu, e mirruul a melemalt el tekoi, me te ngila ikel telbilel a Dios, e milutek a ngerel a laion, 34e milekoad a meklou el ngau, e dimlak le mad er a saider. Ng dimlak a klisichir e di mlo mesisiich, e mle mesisiich el ngar a mekemad, e mlo mesisiich er a re soldau er a bebil er a beluu. 35A redil el uluumerang a uchul me te liluut el ngoititerir a re chederir, el mlad e liluut el mo chad. E a re kuk bebil a lulemekringel er tir e mle chetirir el mengubet, me le mad e bo le bekiis er a kodall el mor sel lmuut el ungil el klengar. 36A re bebil a mlo chuarm er otuub ma meringel chelebed, e mellechet e mengai el mor a kelebus. 37Te mlar ngii a rulebetech er a bad, ma re meltuk er olecholech, ma re mlad er a saider. Te mlar ngii a re mirrael el meliuekl el oubail a budel a sib ma budel a kaming, e dimlak a tal ngera er tir, e a re chad a ulturk a rengrir, e ulemekcharm er tir. 38Tial beluulchad a dimlak a klungiolel er tir me te di mirrorael a ked ma rois, e kilie chelsel a ii ma kliokl el chutem. 39Tuluumerang a uchul me ng dilubech a ikal mor tir e seikid e ng dirrek el dirkak le nguu a telbiil, 40ele Dios a di mla mdesuii a lmuut el ungil el uldasu el kired. Ma uldesuel a Dios a kmo ng diak bo le mecherrungel a lileakl er kid.

will be added

X\