HEBRU 1

1A irechar e a Dios a milengedecheduch er a rucheled el mle betok el kakerous a rolel a longedecheduch er tir el okiu a re profet; 2e ngdi ikal uriul sils e ng mla mengedecheduch er kid el okiu a Ngelekel, el bla le tetkii el mo oudiukes a rokui el tekoi, e dirrek el uleak ngii el mebii a eanged ma beluulchad. 3Ngii el Ngalek a ole-chotel a didichel a klebkellel a Dios, e ngii a kmal diak le ngodech er a Dios; ng omtebechel er a eanged ma beluulchad el rokir el oba klisichel a tekingel. Ser a le rekir omengikidel a kngterir a rokui el chad, e ng mlo nguu a kingellel er a kadekmel a Dios el Olab a Bek el Klisiich. 4A Ngalek a merruul el ngarbab er a re anghel el di ua ngklel el le bilsa Dios el lmuut el ngarbab er a ngklir. 5Ele Dios a dirkak a tal ledu er a ngii di le anghel el kmo, “Kau a Ngelekek, el kulechellau er chelechal sils “ El ka le dilu er a ngii di le anghel el kmo: “Ak mo demal, me ngii a mo Ngelekek.” 6A Dios er ser a bochu loldurech er a ketengel sechal el mer a beluulchad, e ng bai dilu el kmo, “A rokui el anghel er a Dios bo longull el meluluuch er ngii.” 7E a le dilu el kirir a re anghel a kmo, “A Dios a meruul er a re anghel er ngii el mo ua eolt, ma re mesiungel a loruul er tir el mo ua kerdel a ngau.” 8E ngdi le dilu el kirel a Ngalek a kmo: “A Rengedem kau el Dios a di melemolem el diak a ulebengelel! Ke mengedereder er a re chedam el oba llemalt. 9Ng mle soam a melemalt el tekoi e mle chetim a chelebirukel; misei ia uchul ma Dios, el Dios er kau a mla ngiltau e meskau a deuil a rengum er a deruchellem el kuk ngar uchei er sel le bilsterir a re bebil er kau.” 10Ng dirrek el dilu el kmo, “Kau el Rubak a milebii a beluulchad er a kot el uchul, e a eanged a rellel a chimam. 11A ikang a mo nguemed, e ngdi kau a di melemolem el di ngar; ng rokui el merael el mo mechut el ua bail, 12me ke mo imuil el ua ikrel a bail, me ng mo mengodech. Ngdi kau a di osisiu, ke di ngar el diak a ulebengelel.” 13Ng techa er a re anghel a bla ledu er ngii el kmo, “Bo mdengchokl er a kadekmek, el dimerkmo krelleterir a re cherrouem el mo deruchellel ochim?” 14Misei e a re anghel a mesiungel a Dios, me ng oldurech er tir el mo olengeseu er tirkel mo nguu Osobel.

will be added

X\