GALATIA 6

1Kemiu el odam er ngak, a lsekum ng ngar ngii a chad el rullii a mekngit, e kemiu el oltirakl er a Reng moba delemedemek el omeklemalt er ngii, e bo mkerekikl me lak bor a klengit el ua ingii. 2Bo mkaingeseu el mengebekakl a berraod er a delongeliu, me motutii a llechul a Kristus. 3A chad el diak a belkul, e omdasu el kmo ng ngar ngii a belkul, a di ngii el mengeblad er ngii. 4Ma ta ma tar a chad di le ngii el merriter a urerel, me ng ngar ngii a ungil el le rirellii e bo lungil a rengul, e lak lomekesiu a urerel er a urerel a kuk tar a chad. 5Ele re bek el chad a di chemur oberaod el telechellir. 6Ngikel lolisechakl er ngii er a tekingel a Dios bo lomdasu a kuk kirel a siungel ngikel olisechakl er ngii. 7Lak kom mecheuid; a Dios a diak le mecheblad, ele ikel lolalem a chad, ia ikei a bo loridm. 8Ngikel di meruul a soal a klechad er ngii a mo remiid; e ngikel meruul a soal a Reng, a mo ngar el diak a ulebengelel. 9Me lak bo de mesaul el meruul a ungil, ele di dolemolem el meruul a ungil e kede mo meridm a le me belsechel. 10Ma le ua isei, e sel le bor ngii a techelled, e doruul a ungil el mor a re bek el chad, e a ngar uchei e doruul el mor tirkel bebil er kid el oumerang. 11Mesang, ak di oba chimak el meluches a ua ika mekllungel el llechukl el ekor kemiu. 12Tirkel sorir el meruulchisir el okiu a moues er a bedengir, itirkei ia sorir el orrimel er kemiu el mo obotk, me bo lungil e lak le modechelakl ele tir el diak lolisechakl el kirel a kerus er a Kristus. 13E tir el ulebotk a diak loltaut a llach, ng di sorir cho mobotk me bo luchul e loruul a chisir er a botk er kemiu. 14Ngdi ngak, bai le meruulchisek er a kerus er a Rubak er kid el Jesus Kristus, ele kerus er ngii a uchul e a beluulchad a ulekoad el kirek, me ngak a ulekoad el kirel a beluulchad. 15A chad a le blotk ma lak me ng di osisiu; a bai klou a belkul a kmo a chad a mla lmuut el obeob el mo beches. 16A budech ma klechubechub le bor tirkel rokui el oltirakl er tial tekoi ma rokui el chedal a Dios. 17Chelechal mong e lak a chad el lmuut el omekcharm er ngak; ngak a ngar ngii er a bedengek olengchelel a Jesus. 18A krasia er a Rubak er kid el Jesus Kristus bo lobengkemiu el rokui el odam er ngak. Amen.

will be added

X\