GALATIA 5

1A Kristus a millubet er kid me ng mo diak de sibai; me msisichemiu el mtebechelemiu, e lak komluut el mo sibai. 2Me ngak el Paulus a dmu er kemiu el kmo, a lsekum kom mor a botk, e a Kristus a mo diak a belkul er kemiu. 3Mak lmuut el mengelechel er a re bek el chad el kmo ngikel mor a botk a mocha kirel el oltaut er a Llach el rokir. 4Kemiu el melasem el mo ungil er a rengul a Dios el okiu a Llach, a meakl el mo cheroid er a Kristus; kom mla mengesakl er a krasia er a Dios. 5E kemam oeak a Reng e klou a rengmam el melatk e mengiil er a Dios el mo meruul er kemam el mo ungil er a rengul ele kemam el oumerang. 6A doltirakl er a Kristus e ng diak a belkul a de blotk ma lak; a klou a belkul a doumerang e dochotii el kmo kedoumerang el oeak a bltikerreng. 7Kom mle ungil el merael; e techa ultucheklemiu el mo diak moltirakl er a klemerang? 8Ng dimlak le Dios el ngikel ulemekedong er kemiu. 9Ng di telkib el omkukel a blauang e mkukii a rremotel el blauang el rokir. 10Ak ultuil er a Rubak e dirk oumerang el kmo a uldesuiu a diak bo le ngodech er a uldesuek; e a ngii di le chad el ouedikel er kemiu, a mo obals er a Dios. 11Kemiu el odam er ngak, chomko kdirk olisechakl el kmo ng ngar ngii a belkul a botk, e ngera me ng dirk mer ngak odechelakl, ma osisecheklek er a belkul a kerus a dirk omuchel a uldikel? 12Ak uureng el llechulekum me tirkel ouedikel er kemiu a melemolem el di mo tir el melekosek er tir! 13Kemiu el odam er ngak a mlokedong el mo diak kom sibai. Ngdi tia diak le ilmokl el mo meruul a ikel di somiu. Bai moba bltikerreng el kesiou. 14Ele Llach el rokui a uldak er a di tal llach el kmo, “Bo le betik a rengum er a ngar bitar kau el ua le betik a rengum er kau.” 15Kom mo kerekikl, ele cho bo mua charm el diak kom kaukerreu e di ketemall, e kom dul di mo nguemed. 16Ak melekoi er kemiu el kmo, a Reng bo le tebechelel a klengar er kemiu, me lak bo molemolem el oltirakl a ngibes er a klechad. 17Ele ngibes er a klechad omtok er a Reng, ma ikel soal a Reng omtok er a klechad; me ng di dul kautok, ma uchul me ng diak komruul a ikel somiu. 18Ngdi lsekum a Reng omesiur er kemiu, e ng diak kom chederdall er a Llach. 19A urerel a klechad a di bleketakl, el deleboes, ma ngellengalek, ma klekad, 20ma omeluluuch el bleob el chelid, ma olai, ma klaucherarou, ma klakoad, ma blechelechelingaorreng, ma ngasechereng, ma cheldesongel, ma blekilekiakl, ma klautok ma klekakeakl, 21ma chelechei, ma cheltelaol er a rrom, ma klaiueong, ma ikel ua ingii. Ak mengelechel er kemiu el ua ikel di bla kdu el kmo, tirkel meruul a choua isel tekoi a diak bo le nguu a Rengedel a Dios. 22Ngdi Reng a omuchel a bltikerreng, ma deurreng, ma budech, ma kllourreng, ma blekokuiirreng, ma ungilreng, ma blakerreng, 23ma delemedemekerreng, ma ulserechakrreng; e a ikang a diak a llach el melekoi a ngeral kirel. 24Tirkel mla mo chedal a Kristus Jesus a ua ia bla lokodir a klechad er tir ma ikel loureng a klechad el soal el meruul. 25Ma lsekum a Reng omesiur er kid, e bo domtebechel a klengar er kid el oltirakl er a Reng. 26Ng diak el kired el oumead er kid, ma lechub e de kaiuengasechereng, ma ka de kachechei.

will be added

X\