GALATIA 4

1A kulekoi er ngii a kmo, a ngalek el mo oudiukes a kloklel a demal sel dirk le kekerei e ng di ua tar a mesiou, ngdi ngii a meral mo oudiukes a rokui el kloklel a demal. 2Sel dirk le kekerei, e te ngar ngii a re chad el mengedmokl er ngii e mengkar a kloklel el mor sel belsechel el bla le tetkii a demal. 3Me kid me kede ua isei; ser a dirk de ngalek er a tekoi er a reng e kede dirrek el mle chederdall er a ikel chelid er tial beluulchad. 4Ngdi ser a le mei a belsechel, e a Dios a ulderchii a Ngelekel, el mlechell er a redil me ng mlo chad, e kiliei el chederdall er a Llach er a re chad er a Judea, 5me ng mo ngubeteterir tirkel chederdall er a Llach, me kede mo ngelekel a Dios. 6A Dios a milskid a Reng er a Ngelekel el mer a rengud el olecholt el kmo kom ngelekel, el ngii el Reng a rullid el mo omekedong el kmo, “Abba! Chedam!” 7Me ng dikea msibai e kom ngelekel a Dios, ma Dios a mo meliukes er kemiu el ngelekel. 8A ngar a mong er a le dirkak bo modengelii a Dios, e kom mle sibai el mengull a chelid el diak le meral chelid; 9e chelechang e kom mla mo medengelii a Dios, ng diak, ng bai Dios a mla mo medengelkemiu, e ngera me ng somiu el lmuut el mo sibil a ikel mechitechut e diak a ultutelel el chelid? 10Kom kmal kerekikl a otireklel a bebil er a sils, ma buil, ma blingelel a rak, ma rak. 11Me ng suebek a renguk er kemiu! A urerek el kiriu ng di mo diak a ultutelel? 12Ak ulengit er kemiu el odam er ngak me bo mua ingak, e ak mla mo ua ikemiu. Ng dirkak a ngeral mekngit el mrellii el mer ngak. 13Kom medengei el kmo ser a kot el kulisechakl er a Ebangkelio er kemiu e ak mle smecher a uchul me ng mlo sebechek el kiei e olisechakl. 14Ma secherek a mlo klou el ongesang el ekor kemiu, e ngdi dimlak bo le chetimiu ngak ma lechub e blo meterekakl er ngak. Ko bai ngilikak el ua ia le anghel er a Dios a mlei e ngilikak el ua ia le Kristus Jesus a mlei. 15A ikel deuil a rengmiu ng ngar ker er chelechang? Ak kmal dirk medengei, ele seikid e ng di mle beot er kemiu el meskak a ngii di le ngerang el mo lmuut er a chelsul a medemiu me ng mle sebechiu el meskak. 16Ng mocha chetimiu ngak, ele ngak el di bleketakl a kungedecheduch er kemiu? 17Tirkel chad el leko ng blak a rengrir er kemiu a diak le meral osiik a klungioliu. Te di meruul er kemiu el mo beot a rengmiu er ngak e mo blak a rengmiu er tir. 18Ng ungil a di le blechoel el blak a rengmiu el kirel a ungil tekoi el diak di le sel kubengkemiu. 19Re ngelekei el kmal betik er a renguk, ak lmuut el ua bo kcharm er a rengelel a cheroll el kiriu el dimerkmo cho bo mua teletelel a Kristus. 20A llechulekum mak ngar a delongeliu er chelechang me ng mo ngodech a delecherul a ngerek e mengedecheduch er kemiu. Ng kmal mla mo rrau a renguk er kemiu. 21Ka msall e kuker er kemiu el somiu el ngar eungel a Llach. Kemiu kom meral medengei a ikel lolekoi a Llach? 22Ng dmu el kmo a Abraham a mle teru re ngelekel, el tang a ngelekel er a sibai el dil, ma tang a ngelekel er a bechil el diak le sibai el dil. 23Ngikel ngelekel er a sibai el dil a mlechell el di ua re bek el chad, e ngikel ngelekel er a bechil el diak le sibai el dil a mlechell el oltirakl er a telbilel a Dios. 24Tia okesiu. Tirkel terul redil omtechei a ikel erul telbiil. A Hagar a milechelleterir a re ngelekel el ngar a klsibai me ng omtechei er sel telbiil el merruul er a Rois Sinai. 25Ngii el Hagar a okesiul a Rois Sinai el ngar a Arabia, el rredemelel a Jerusalem er chelechang, ele Jerusalem ma re ngelekel er chelechang a sibai. 26Ngdi sel Jerusalem el ngar bab a diak le sibai el dil, el ngii a delad. 27A Chedaol Llechukl a kmo, “Bo ledeu a rengum kau el kebai el dil, el diak momechell; moldiu el dmeu a rengum kau el diak modengelii a rengelel a cheroll; ele ngikel dil el mlechoit er a bechil a kuk mo betok a re ngelekel er ngikel dimlak le mechoit er a bechil.” 28Me kemiu el odam er ngak a ua Isak el ngalek er a telbilel a Dios. 29Ngdi seikid e ngikel mlechell el di ua re bek el chad a uleldechelakl er ngikel mlechell el oeak a Reng er a Dios, me ng dirrek el dirk ua isei er chelechang. 30Ngdi ngera ng dmu Chedaol Llechukl? Ng dmu el kmo, “Modikii ngikel sibai el dil ngii ma ngelekel, e ng diak el sebechel a ngelekel a sibai el dil el mo oudiukes el obengkel a ngelekel a mimokl el dil” 31Kid e rudam a diak de ngelekel a sibai el dil, e kede bai ngelekel a diak le sibai el dil.

will be added

X\