GALATIA 2

1Ng mlo chuib a truich ma eual rak e ngak a liluut el mor a Jerusalem, ngak ma Barnabas, e a Titus a kngiluu me ng ulebengkek el mong. 2Ak mlong ele Dios a mileketeklii el mer ngak el kmo ng kirek el mong. Me ngak ma re mengeteklel a ikelesia a mlo kldibel el di mle kemam e ak milsaod er tir a klumech er a Ebangkelio el kullisechakl er ngii er a re Chisentael. Ng dimlak el soak a bo lak a belkul a urerek er a ngar a mong, ma urerek er chelechang me bo lak a belkul. 3A kldemek er a Titus a mle chad er a Gris e ngdi dimlak lorrimel er ngii el mo obotk, 4ngdi mlar ngii a re bebil er a re chad el mle sorir a lobotk. Te mirruul er tir el leko te dirrek el oumerang, e a lechub e te ngiloech el soiseb er a delongelam el me ourabek, el merriter er sel ilmokl er kemam ele kemam el mla mo oltirakl er a Kristus Jesus. Ng mle sorir el rullemam el mo sibai, 5ngdi dimlak kim telkib el konge uldesuir, el kirel me le mukedelad el kiriu a Ebangkelio. 6Tirkel leko te mengeteklel a ikelesia; ak melekoi el ua isei ele deruchellir a diak bo le ngedechii a uldesuek; ma Dios a diak longetukel er a re chad, itirkel mengeteklel a ikelesia a dimlak a beches el tekoi el le delii el kirel osisecheklek. 7Ng bai mlo bleketakl er tir el kmo a Dios a milskak a urerek el olisechakl er a Ebangkelio er a re Chisentael, el di ua Petrus el kuk le bilsa urerel el olisechakl er a Ebangkelio er a re chad er a Judea. 8Ele ngak a uleak a klisichel a Dios e mlo apostol el mor a re Chisentael, el ua Petrus el kuk mlo apostol el mor a re chad er a Judea. 9A Jakobus ma Petrus ma Johanes, el tirkel kulemtab er tir el kmo te mengeteklel a ikelesia a miltebengii el kmo a Dios a milskak tial ileakl el ngerachel; misei e turreked a chimak ngak ma Barnabas el olechotel a kmo aki rokui el kaukledem er ngii el ureor. Ng mlo ta tekingam el kmo ngak ma Barnabas a mo oureor er a delongelir a re Chisentael, e tir a kuk oureor er a delongelir a re chad er a Judea. 10A di tal tekoi el lullengit er ngii er kemam a kmo me lak kim obes er a re mechebuul el ngar a delongelir, el ngii el tekoi a di mla ngar ngii er a renguk a mo meruul er ngii. 11Ngdi ser a le ngar a Antiok a Petrus, e ak di mlar mederir a re chad e omtok er ngii, ele ng kmal mle cheleuid. 12A uche er a le mei a re bebil chad el luleldurech er tir a Jakobus, e a Petrus a ulemengur el obengterir a rudam el Chisentael. Ngdi ser a le mei tir el chad, e ng ngilseklii e dikea le soal el omengur el obengterir a re Chisentael, ele ng mlo medakt er tirkel chad el oldubech a botk. 13Me tirkel odam er kid el chad er a Judea me tulebengkel a Petrus el melodech er tir; ma Barnabas me ng dirrek el mlechetakl er a ua isel chelebelderir. 14Me ser a kumes er tir el dimlak le bleketakl el oltirakl er a klemera er a Ebangkelio, e ak di mlar mederir el rokui e dmu er a Petrus el kmo, “Kau a chad er a Judea, e ngdi blekerdelem a diak le ua blekerdelel a chad er a Judea, e bai ua blekerdelel a Chisentael. Ke mekera e orrimel er a re Chisentael me te mo ua re chad er a Judea?” 15Kom medengei el kmo, kemam a mlechell el chad er a Judea, el diak kim tirkel domekedo er tir el kmo “mekngit el chad el Chisentael.” 16Ngdi kede medengei el kmo a chad a meruul el mo ungil er a rengul a Dios a lsekum ng oumerang er a Jesus Kristus, el diak lokiu otutel a Llach. Kemam a dirrek el mlo oumerang er a Kristus Jesus maki merruul el mo ungil er a rengul a Dios ele kemam el oumera er a Kristus, el dimlak lotutel a Llach a uchul, ele ng diak a chad el meruul el mo ungil er a rengul a Dios el oeak a otutel a Llach. 17A lsekum kede ua isei el melasem el omeklemalt er kid er medal a Dios el okiu a delongeled kid ma Kristus, e mo metik er kid el mekngit el chad el di ua ia re Chisentael, e tia ng belkul a kmo a Kristus omuchel a klengit? Ng kmal diak! 18Ma chomko ak lmuut el mo meleketek a ikel tekoi er a Llach el bla kteruud, e ng olechotel a kmo ng ngar ngii a ktilemellii er a Llach. 19Ngak a ulekiu a Llach e mlad el kirel a Llach el uchul e ak mo ngar el kirel a Dios. Ngak a ulebengkel a Kristus el mad er a kerus, 20me ng dikea le ngak a ngar, e ng bai Kristus a ngar el ngar ngak. Me chelechang e a uchul mak ngar, ngak el oumera er a Ngelekel a Dios, el ngikel mle betik a rengul er ngak me ng tilengetengii a klengar er ngii el kirek. 21Ng dimlak krellii a krasia er a Dios el mo diak a belkul. Ele lsekum a chad a meruul el mo ungil er a rengul a Dios el okiu a Llach, e ng belkul a kmo a kodellel a Kristus a diak a ultutelel.

will be added

X\