GALATIA 1

1Mlar a Paulus el dimlak bo le apostol el okiu a re chad ma lechub e le chad a uchul, e ng bai Jesus Kristus ma Chedam el Dios a uchul, el ngikel ulekisii er a kodall, 2e dirrek el mlar a rokui el oumerang el kimdak, el mor a ikel ikelesia er a Galatia: 3A Dios el Demad ma Rubak el Jesus Kristus le beskemiu a krasia ma budech. 4A Kristus a ultireklii a soal a Dios er kid e Demad, el di mle ngii el tongetengii a klengar er ngii el kirel a kngtid, el mo melubet er kid er tial mekngit el beluulchad er chelechang. 5Ma odanges le bor a Dios el di blechoel el diak a ulebengelel! Amen. 6Ng mechas a renguk er kemiu! Kom di mereched el mo cheroid er ngikel milekedongemiu el oeak a krasia er a Kristus, e mla mo oltirakl er a kuk tar a ebangkelio. 7A mera er ngii, e ng diak a “kuk tar a ebangkelio”, e ngdi kdulii tiang el kmo te ngar ngii a re bebil er a re chad el ouedikel er kemiu e melasem el melodech er a Ebangkelio er a Kristus. 8E ngdi lsekum a ngii di le tar kemam ma lechub e ng anghel el mlar a eanged el mei a mo olisechakl er kemiu er a ebangkelio el kuk ngodech er sel bla kim osisecheklemiu er ngii, e bo le medebeakl el mor a beluu er a ngau! 9Tia di bla kim molekoi er ngii er kemiu, e chelechang e ak lmuut el melekoi er ngii el kmo, a le ngar ngii olisechakl er kemiu er a ebangkelio el kuk ngodech er sel cho bla mnguu, e bo le medebeakl el mor a beluu er a ngau! 10A kulekoi el ua isei, e ng ua kulasem el meruul a rengrir a re chad? Ng kmal diak! Ngak a soak el meruul er a rengul a Dios! Ada ngak ak melasem el meruul a chisek er a re chad? Chomko kdirk meruul a chisek er a re chad, e ngak a diak kmesiungel a Kristus. 11Mei, kemiu el odam er ngak, me ksbedemiu el kmo a Ebangkelio el kulisechakl er ngii a dimlakle ngar a re chad el mei. 12Ng dimlak knguu er a ngii di le chad, ma ka le mlar ngii a chad el olisechakl er ngak er ngii. Ng Jesus Kristus a ulechotii er ngak. 13Kom rirenges a chisel a blekerdelek er ser a le blak a renguk el oltirakl er a klechelid er a re chad er a Judea, el mle meringel el oldechelakl er a ikelesia er a Dios e mlor a ikel sebechek el melemall er ngii. 14Ngak a mlar uchei er a ruumesingd el chad er a Judea el kim klebekoll er omerellek er otireklel a klechelid er a re chad er a Judea, e lmuut el kmal mle blak a renguk er tir er a tekoi el uldedelid er a rucheled el mei. 15E ngdi krasia er a Dios a uchul me ng ngileltak er uchei er a kmechell, e milekedongak el mo mesiou er ngii. E ser a le tibir 16el mo olecholt er a Ngelekel er ngak, me bo le sebechek el mo olisechakl er a re Chisentael er a Ungil Chais el kirel, e ng dimlak bo kuker a uldesuel a ngii di le chad, 17ma ka kblor a Jerusalem el mo omes er tirkel di mla mo apostol er uche er ngak. Ak bai di mle mereched el mor a Arabia, e sola e liluut el mor a Damaskus! 18E uriul ku er edel rak e ak mlor a Jerusalem el mo omes er a Petrus, e kiliei el obengkel el erul sandei. 19Ng dimlak a ngodech el apostol el kisang, ngdi mle tal Jakobus el tar a Rubak. 20A ikal kuluches a meral tekoi. A Dios a medengei el kmo ng diak kumulak! 21Uriul er isei e ak mlor a ikel renged er a Siria ma Silisia. 22Seikid e a re bebil er a re chad er a ikel ikelesia er a Judea a dimlak lodengelkak el chad. 23Te di mle medengei a tekingir a re chad el kmo, “Ngikel chad el uleldechelakl er kid a olisechakl er sel doumera er ngii el tekoi el lullasem el melemall er ngii.” 24Me tuleldanges er a Dios el kirek.

will be added

X\