EFESUS 6

1Re ngalek, ng ngercheliu er a klekristiano el olengesenges er a re demmiu ma re delemiu, ele tia ia melemalt el tekoi el kiriu el meruul er ngii. 2“Mongull er a demam ma delam” a kot el llach el uldak er a telbiil, 3“me bo lungilbesul a rokui el tekoi er kau, me bo mchad el meketeket er tial beluulchad.” 4Re chedam ma re chedil, lak molengasech a rengrir a re ngelekiu. E bai momekeroul er tir el oba omellach ma osisechakl er a Rubak. 5Kemiu el sibai, molengesenges er a re mastang er kemiu el kmal mengull er tir; e bo le blak a rengmiu el oureor el ua cho mosiou er a Kristus. 6Ng diak di sel lomes er kemiu e mua isei, ele ng somiu a lechat er kemiu; bai molab a rengmiu el rokir el meruul a soal a Dios ele kom sibil a Kristus. 7Moruul a ureriu el oba ungilreng, el ua cho mosiou er a Rubak, el diak mosiou er a re di chad. 8Lak mobes el kmo a Rubak a mo meliukes er a rokui el chad, a le sibai ma lak, el kirel a ungil ureor el loruul. 9Mastang, mdirrek el ua isei el mor a re sibmiu e mereko e lak morrouk er tir. Lak mobes el kmo kemiu ma re sibmiu a dul di chederdellel osisiu el Mastang el ngar a eanged, el oukerrekeriil er a rokui el chad el diak a longetukel er ngii. 10E orekil a kmo, molisiich er kemiu el ultuil er a Rubak ma klou el klisichel. 11Mousbech a rokui el klekedall er a mekemad el le beskemiu a Dios, me bo le sebechiu el dechor el mtok a ikel mekngit el chelebeldil a Diabelong. 12Ele kid a diak doumekemad el omtok er a re di chad; kede bai omtok a ikel mekngit el chelid el ngar a melidiul, ma ikel mengetikaik, ma mengedereder, ma rokui el klisiich er a chelsel tial mekngit eltel el beluulchad er tial milkolk el taem. 13Me mlecha er chelechang a klekedellel a mekemad el le bilskemiu a Dios! Ma le mei sel mekngit el sils, e bo le sebechiu el mo mesisiich er a cherarou; e sel moumekemad el mor a ulebongel, e dirk mdechor er a ikel cho mngar ngii. 14Me di mdechor el kldmokl el ousbech er a klemerang el ua ia lolekesongel el kmes el meliuekl er a chelechedemiu, e mousbech er a llemalt el mo ua ia le tekerngel a ulumiu, 15e di mkldmokl el omerk er a Ungil Chais er a budech el ua ia loecheriu. 16E di moumera er a Rubak el ua ia le tekerengem; ele cho moumera er ngii e ng mo sebechem el dmokou el mekoad a rokui el kmard el belechel ngikel Mekngit. 17E mousbech er a osebeliu el ngar a Dios el mei el ua ia le lkungiu, ma tekingel a Dios el ua ia kedorm el saider el le beskemiu a Chedaol Reng. 18Mousbech a ikal rokui el oba nglunguuch, el olengit er a Dios me lolengeseu er kemiu. Moluluuch er a rokui el techall sel lomeklatk er kau a Chedaol Reng. Tiaikid a uchul e di mekar e lak bo mesaik; di blechoel el meluluuch el kirir a rokui el chedal a Dios. 19E dirrek el moluluuch el kirek, ma Dios bo le beskak a tekingel sel bochu kungedecheduch, me bo le sebechek el bekeu el mengedecheduch e olecholt er a klemera el ngar a Ebangkelio el dimlak lodengelii a re chad. 20Ak ngar a kelebus e ngdi ngak a melekingel e oltechil a Rubak el Jesus, el kirel a Ebangkelio. 21A Tikikus, el betik er a rengud el odam er kid e blak a rengul er omesiungel er kid, el ngar a urerel a Rubak, a mo ouchais er kemiu a rokui el chisek me kom mo medengei el kmo ak ua ngerang. 22Sei ia uchul mak uldurech er ngii el ekor kemiu, el mo ouchais er kemiu el kmo aki ua ngera el rokui e mo melisiich a rengmiu. 23A Dios el Chedam ma Rubak el Jesus Kristus le besterir a rokui el Kristiano a budech ma bltikerreng e le rellemiu el mo oumerang. 24A krasia er a Dios le bor tirkel rokui el betik a rengrir er a Rubak er kid el Jesus Kristus el oba diak le ngemed el bltikerreng.

will be added

X\