EFESUS 5

1Chelechal mcheleoch el ngelekel a Dios, e ng kiriu el melasem el mo ua ingii. 2A klengar er kemiu a kirel el mo cheldereder er a bltikerreng, el di ua Kristus el betik a rengul er kid me ng uldersii a klengar er ngii el kired el ua bechochod a bul el tenget e cherrungel el uldars el odeuir a rengul a Dios. 3Ma le ua isei el mchedal a Dios, e ng diak le kirel a ngii di le teletelel a deleboes ma lechub e ng mengelengalek el omeruul ma lechub e ng nglemokel el di telkib el medu er a delongeliu. 4Ma diak lungilbesul a le tobed er a ngeriu a ikel mekngit el tekoi el kirel a deleuill er a sechal ma redil, ma kikiongel el tekoi, ma ngellakel er a deleboes. Ko bai mereng a sulel a Dios. 5Bo mungil medengei el kmo ng diak a chad el ngar a deleboes, ma lechub e ng mengelengalek el tekoi, ma lechub e ng nglemokel er a iltetel a beluulchad (ele nglemokel a di ua omengull el bleob el chelid) el sebechel el mo nguu a blingelel er a Rengedel a Kristus ma Dios. 6Lak bechere tar a chad me le chebeldkau er a klebelung el tekoi; ng ikaikid el tekoi a uchul e a ngesechel a rengul a Dios a mor tirkel diak lolengesenges er ngii. 7Me lak mongesechusem er kemiu er tirkel ua isel chad. 8Kemiu me kom mlar a ilkolk, e ngdi kom mlo chedal a Dios, me kom ngar a llomes. Me ng kiriu el remuul a klengar er kemiu el mo ua blekerdelir a re chad er a llomes, 9ele ng llomes a oltobed a bek el bedengel a ungil el rodech er a kldung, ma llemalt, ma klemerang. 10Molasem el mesuub el kmo ng ngeral tekoi odeuir a rengul a Rubak. 11Lak morutech a ikel diak a ultutelel el tekoi el loruul a re chad, el ikel tekoi er a ilkolk. Bai mochob el mor a llomes. 12(A mera er ngii a kmal imis el omekrur el tekoi me ng diak el sebeched el mesaod a ikel lomart er tir e meruul.) 13E sel be lecholt a rokui el tekoi er a llomes, e a ikel meral teletelir a kmal mo bleketakl; 14ele ikel mo ungil mocholt a mo llomes. Sei ia uchul me ng medu el kmo, “Mekar, kau el mechiuaiu, e bekiis er a kodall, e a Kristus a mo dmiich er kau.” 15Me bo mkerekikl a omerellem. Lak bo mua re mekebelung el chad, e bai bo mua re mellomes a rengrir el chad. 16Bo mungil el ousbech a bek el techelliu, ele ng mekngit el taem er chelechang. 17Lak bo le milkolk a uldesuiu, e bai molasem el osiik el kmo ng ngera soal a Rubak cho bo moruul. 18Lak bo mchetelaol er a bilong el di mo tomellemiu e merekong; bai bo lomesiur er kemiu a Chedaol Reng. 19Mchachedecheduch er a delongeliu a tekoi er a psalm, ma chelitakl er odanges, ma chelitakl er a reng; el mengitakl a chelitakl er odanges ma psalm el mor a Rubak el meral ngar a rengmiu. 20Di blechoel el mereng a sulel a Dios el Chedam el kirel a rokui el tekoi el oba Ngklel a Rubak el Jesus Kristus. 21Bo mkaiuerenges er a delongeliu ele ng omengull er kemiu el mor a Kristus a uchul. 22Kemiu el redil, morrenges a tekingir a re bechemiu el ua lomesiungiu el mor a Rubak. 23Ele sechal a ngar ngii a klisichel el mengedereder er a bechil el di ua Kristus el mengedereder er a ikelesia; e ngii el Kristus a Osebelel a ikelesia, el bedengel. 24Ma redil a kmal kirir el cherrungel el orrenges er a re becherir el di ua ikelesia el oltirakl er a Kristus. 25Kemiu el sechal, moubltikerreng er a re bechemiu el di ua teletelel a Kristus er a loubltikerreng er a ikelesia me ng uldersii a klengar er ngii el kirel. 26Ng mle ua isei el milleakl er a ikelesia el mo chedaol el uldersel el mor a Dios el oeak a tekingel, er uriul er a longikiid er ngii er a ralm, 27me bo le sebechel el di ngii el odersii er ngii a ikelesia me le nguu el kot el klebokel, el klikiid el diak a telemellel, e diak a cheisech er ngii, e diak a mekngit ma lechub e ng di telkib el telemall er ngii. 28A re sechal a kirir el mo betik a rengrir er a re becherir el di ua le betik a rengrir er a di bedengir. A chad el betik a rengul er a bechil a di ngii el betik a rengul er ngii. 29(Ng diak a chad el di ngii louketui er a bedengel. Ng bai omeka er ngii e mengedmokl er ngii, el di ua Kristus a lomekerreu er a ikelesia; 30ele kid a klekedellel a bedengel.) 31Me ng ua ikel lolekoi a Chedaol Llechukl el kmo, “Tia ia uchul ma chad a mo cheroid er a demal ma delal e mo bereked er a bechil, me tir el terung a mo tal chad.” 32Ng ngar ngii a dmolech e berrotel el klemerang el me chemolt er tial Chedaol Llechukl, el kumtab er ngii e ng okesiul a deleuill er a Kristus ma ikelesia. 33Ng di dirrek el melutk er kemiu el kmo, a re bek el sechal a kirir el betik a rengrir er a re becherir el di ua le tir, ma re bek el redil a kmal kirir el mengull er a re becherir.

will be added

X\