EFESUS 4

1Mak mengelechel er kemiu, ngak el kelebus ele kmesiou er a Rubak. Momtebechel a klengar er kemiu el oltirakl er sel rolel a klengar el lulterekeklii a Dios el kiriu er ser a lomekedo er kemiu. 2Di blechoel el oba ngariourreng, ma delemedemekerreng, ma kllourreng. Molecholt a bltikerreng er kemiu el outekangel a rengmiu er a blekerdelel a ta ma tang. 3Bor sel kot er bab el sebechiu el omtebechel er a kltarreng el loliukes er ngii a Chedaol Reng el okiu a budech el merenged el oldak er kemiu. 4Ng di ta chelechad ma di ta Chedaol Reng, el di ua isel di tal omelatk el mengiil er a klungiaol el lulemekedo er kemiu a Dios el mor ngii. 5Ng di ta Rubak, e di ta rolel a doumerang, el di ta omelecholb; 6e di ta Dios el Demerir a rokui el chad er a beluulchad, el Rubak er a rokui, el oureor el oeak a rokui, e ngar a chelsel a rokui el tekoi. 7A ta ma tar kid a mla nguu a ileakl el duch er a tekoi er a reng el kuk kmal di rruul el kirel el ngar sel kuk telkelel a ruklel er a Kristus el mor ngii. 8Ng di ua ikel lolekoi a Chedaol Llechukl el kmo: “Ser a le bor bab el mor a eanged, e ng chilteklterir el okiuellel a re betok el chad el blo le mesisiich er tir; ng mirrous a sengk el mor a rokui el chad.” 9Me ng ngera belkul a kmo “ng mlor bab”? Ng belkul a kmo a kot e ng mle metengel el mor iou er a chelsel a chutem. 10Ma le ua isei, e ngikel mle metengel a di osisiu el ngikel mlor bab, el mlo engelakl er a eanged, me ng di mekekii a beluulchad ma eanged el rokir el roureur ker me ker. 11Ng ngii a “mirrous a sengk el mor a rokui el chad”; ng millutk er a re bebil el mo apostol, ma re bebil el mo profet; ma re bebil el mo chad er a berkel a Ebangkelio, ma re bebil el mo pastor ma re mo sensei. 12Ng mle ua isei el mengedmokl er a re chedal a Dios el rokui el kirel a omesiou er a ikelesia, me bo loleketek er a bedengel a Kristus. 13Me kid el rokui a di mo tang a de ngar ngii el oumera e medengelii a Ngelekel a Dios; kede mo mukeroul el mo ultebechel el chad, el kmal di mo cherrungel el ua teletelel a Kristus. 14Seikid e ng mo diak de ngalek, el di oberius er a chedesaoch e medokou el mol mei er a eltel a ngii di le diak le meral osisechakl er a re cheblad el chad, el mengetikaik er a re chad el mor a cheleuid el olab a tekoi el di mle tir el melibech. 15Ng bai kired el mukeroul el mo ultebechel er a bek el blekerdeled el mor sel tkul er bab el mo ua Kristus el bdelud el oeak a klemerang el dolekoi el ngar a reng er a bltikerreng. 16A rokui el klekedellel ngii el chelechad a longedereder e ng mo uldeod er a ikel meral olsechelel, e ng locha omechoel er ngii el rokui me ng obech el mo churrengelii ngiil chelechad. Ma ikel derta ma tal klekedall a kuk di bo loungerachel el meruul a ikel lulebeob el kirel, e tial chelechad el rokir a mukeroul e di ngii el meleketek er ngii el oeak a bltikerreng. 17Ma le ua isei, e ak mengelechel er kemiu el ngar a ngklel a Rubak me bo mkerekikl; lak molemolem a klengar er kemiu el ua teletelir a re diak loumera er a Dios el chad, el uldesuir a di chelsengsang, 18ma bderrir a di milkolk. Ng diak a ruklir er sel klengar el ngar a Dios el mei, ele te kmal mesesuau e medecherecher a rengrir. 19Te mla oriid a rrengir, me te mla oterau a bedengir ma rengrir el mor a deleboes ma bek el bedengel a kikiongel el omeruul el diak a bo le turk er ngii. 20Se dimlak le ngii cho msilubii el kirel a Kristus! 21Kom ulterekokl el rirenges a chisel e mlosisechakl er a klemerang el ngar a Jesus. 22Me bedebedii sel mechut el klechad er kemiu el choitii, el ngii a rirellemiu me kom di mlar a ikel mekngit el blekerdeliu, sel mechut el klechad er kemiu el millemall er kemiu er a ikel mekngit el urengulel. 23A uldesuiu ma rengmiu a kmal kirel el mukbeches el rokui, 24e kemiu a loia beches el klechad el bleob el ua teletelel a Dios. Tial klechad a di ngii el ochotii el oeak a meral klengar el melemalt e klikiid. 25Le mereko blulak! A re bek el chad bo lolekoi er a klemera el mor a tar ngii, ele kede rokui el klekedellel a tal chelechad el bedengel a Kristus. 26A lsekum ng ngmasech a rengmiu e lak bechere klsbengel a rengmiu me le ngikemiu el mor a klengit, e lak di le kesib a rengmiu el ongeltii a sils. 27Lak ko bsa techall a Diabelong. 28Ngikel mirrechorech bo lak lorechorech e bo loureor me bo le sebechel el melemalt el mengereker a kirel a delengcheklel e bo le sebechel el olengeseu er a re mechebuul. 29Lak mousbech a ikel melemall el tekoi, e di molekoi a ikel ngar ngii a le rellii, el ikel ngosuir a chad e ngar ngii a belkul, me bo le sebechel a ikel molekoi el mor ngii a le rellii er tirkel rongesemiu. 30Lak molirm er a rengul a Chedaol Reng er a Dios; ele Chedaol Reng a olengchelel a Dios el ngar kemiu a re chedal. Ng olechotel a kmo a Sils a mei el Dios a rullemiu el mo mimokl. 31Bedobed a rokui el uchul a kngtil a rengmiu, ma cheldechuderreng, ma ngasechereng. Mereko klaiuediu, ma otuub, ma bek el teletelel a klauketui. 32Bai bo bekokuii er a delongeliu e mkaukerreu e mkausubes, el ua Dios el mla ousubes a telemelliu el oeak a Kristus.

will be added

X\