EFESUS 3

1Tiaikid a uchul e ngak, el Paulus, el kelebus el kirel a Kristus Jesus el kemiu el Chisentael a uchul, a meluluuch el mor a Dios. 2Kom ulterekokl el mla remenges el kmo a Dios a uleak a krasia er ngii el meskak tial ureor el bo kuruul er ngii el kirel a klungioliu. 3A Dios a ulechotii er ngak a berrotel el uldesuel. (Ak mla meluches el telkib el ouchais er tiang, 4ma lsekum kom menguiu a ikel bla kluches, e kom mo medengelii a utebengek el kirel a bertelel a Kristus.) 5A ngar a mong e ng dimlak le medu ikal tekoi er a ngii di le chad, e ngdi Dios a mla ocholt el okiu a Chedaol Reng er ngii er chelechang el mor a re mechedaol el apostol ma re profet. 6A berrotel el tekoi a kmo a re Chisentael a oeak a Ebangkelio el mor ngii a blingelir er a klengeltengat er a Dios el obengterir a re chad er a Judea; te klekedellel a tal chelechad e oudiukes er osisiu el telbiil el le rirellii a Dios el oeak a Kristus Jesus. 7Ak mlekedmokl el mo mesiou er a Ebangkelio el okiu a ileakl el ulengesuil a Dios, el le bilskak el oeak a klisichel el oureor el ngar ngak. 8Ngak a kot el ngar uriul er tirkel rokui el chedal a Dios; e a Dios a di milskak tial techall el mo ouchais er a re Chisentael a Ungil Chisel a diak a telkelel el klungiaol el ngar a Kristus el mei, 9e meruul er a rokui el chad el mo mesa el kmo ng mekera berrotel el uldesuel a Dios a bo loltaut. A Dios, el mileob a rokui el tekoi, a di ulemart er a bertelel er a irechar el mei, 10me bo le sebechir er chelechang, a re anghel el mengedereder ma rulab a klisiich er a melidiul, el oeak a ikelesia el mo medengei el kmo a Dios a kmal mellomes a rengul er a rokui el tekoi. 11A Dios a kildmeklii tiang el oltirakl er sel di melemolem el uldesuel el lultutii el oeak a Kristus Jesus el Rubak er kid. 12Ng kid el chedal a Kristus e oumera er ngii a uchul me ng ngar ngii a blekenged el mor a medal a Dios el diak de bekikl. 13Mak ulengit er kemiu me lak bo le moalech a rengmiu ele ngak el chuarm el kiriu; ng rokui el di mo klungioliu. 14Tiaikid a uchul mak uutubuach er medal a Chedam, 15el bek el ongalek er a eanged ma chutem a ngmai a ngklir er ngii. 16Ak ulengit er a Dios el diak a le ngesonges er ngii er a eanged me le beskemiu a klisiich el okiu a Chedaol Reng er ngii me bo le mesisiich a rengmiu er a klengar er kemiu, 17e ngak a meluluuch ma Kristus bo le rellii a delengcheklel er a chelsel a rengmiu, ele kom oumera er ngii. Ak meluluuch me bo le sebechiu el meruul a rokui el tekoi el okiu a bltikerreng, 18me bo mdak kemiu ma re chedal a Dios el rokui el mo sebechiu el mtebengii el kmo ng ngera klemengetel, ma kldidiul, ma delechel a ultirel a Kristus. 19Choi, bo molechesuar a ultirel, e a mera er ngii a diak el sebechel meteriter el rokir, me bo meral mo ua teletelel a Dios. 20- 21A klebkall le bor a Dios, el ngikel okiu a klisichel el oureor er a chelsed me ng sebechel kudmokl a lmuut el kmal obdois el tekoi er a ikel sebeched el olengit, ma me soiseb er a uldesued, el okiu a ikelesia ma Kristus Jesus el mo cherechar, el diak a ulebengelel! Amen.

will be added

X\