EFESUS 2

1A ngar a mong e ng mle ulekoad a rengmiu ma uldesuiu, ele kemiu el dimlak morrenges a tekingel a Dios e di mlar a klengit. 2Iseikid e kom di mirruul a ikel mekngit el omerellel a beluulchad; kom ulerrenges a tekingel ngikel merrederel a mekngit el reng er a melidiul, ngikel mekngit el reng el omekall er tirkel chad el diak loltaut a tekingel a Dios. 3A mera er ngii, e kid el rokui a di mle ua itir, el di longurs er kid a klechad el mor ngii, el meruul a ikel rokui el mlo soal a rengud ma bedenged el meruul. Ma di le klechad er kid e kede di ua ngii di le chad, el di mle kired el mo chuarm er a kerrekeriil er a Dios. 4Ngdi klechubechub er a Dios a medeel, ma bltikerreng er ngii el mer kid a kmal imis el klou, 5me ser a dirk lulekoad a reng er kid ele kid el dimlak dorrenges er a Dios, e ngii a ulemekngar er kid el obengkel a Kristus. Ng krasia er a Dios a uchul me kom mla suobel. 6Kid el bereked er a Kristus Jesus a lulekisid er a kodall el mo obengkel el mo mengedereder el obengkel er a ikel beluu er a eanged. 7Ng mle ua isei ma re chad er chelechal mor medad a mo medengei el kmo ng kmal klou el krasia er ngii a lulechotii er a bltkil a rengul er kid el oeak a Kristus Jesus. 8- 9Ele ng krasia er a Dios a uchul e kom mla suobel ele kom oumera er ngii. Ng diak lomerelliu a uchul; ng bai di sengk er a Dios, me lak a chad el di ngii el chemat er ngii. 10A Dios a milebid el mo chedal, me kede ngar a Kristus Jesus e ng milebid el kirel a ungil tekoi el di bla le kedmokl el kired el mo meruul. 11Kemiu a re mlechell el Chisentael, el lomekedo er kemiu a re chad er a Judea el kmo diak ko blotk, el di tir el omasech er tir el kmo te blotk el ngar ngii olangch er tir (el melutk a ikel loruul a re chad el mor a bedengir), molatk el kmo kom mle ua ngera er a ngar a mong. 12Iseikid e ng dimlak modengelii a Kristus. Kom mle kor a chad er a ngodech el beluu e dimlak mchederir tirkel ngellitel el chedal a Dios. Ng dimlak mulsiseb er a telbilel a Dios el mor a re chedal, e kiliei er tial beluulchad el dimlak omeltkiu er omengiil er a klungiaol el mei, e dimlak moumera er a Dios. 13Ngdi chelechal mchedal a Kristus Jesus, e kemiu el di mle cheroid a mla mo kmeed el okiu a uldersel a klengar er a Kristus er a kerus. 14Ele Kristus ingii ia milskid a budech er a le relleterir a re chad er a Judea ma re Chisentael el mo tal chad. Ng uleak a kodellel er a kerus el torudii orars el millenget er a delongelir el mirruul er tir me te di mle kaucherarou. 15Ng riruul a Llach er a re chad er a Judea el mo diak loureor, me luchul e le bor ngii a techall el lousbech a ikal erul kakerous el bedengir a re chad el mebii a di tal beches el bedengir a re chad el mo chedal a Kristus, me loeak itiaikid el mo rolel a budech er a delongelir a re kakerous el chad. 16Ng uleak a kodellel a Kristus er a kerus e ng urridii a klaucherarou er a delongelir; ng uleak a rolel a kerus el oldak a ikal erul bedengir a re chad el mo tal chelechad e olluut er tir el mor a Dios. 17Misei, e a Kristus a mlei e ulemerk er a Ungil Chais er a budech el mor a rokui el chad, el ekor kemiu el Chisentael, el mle cheroid er a Dios, ma re chad er a Judea el mle kmeed er ngii. 18Ng Kristus a dokiu ngii kid el rokui, el chad er a Judea ma re Chisentael, e mo sebeched el me dmak el oeak a di osisiu el Chedaol Reng el mor a medal a Chedam el ngar a eanged. 19Ma le ua isei, e kemiu el Chisentael a dikea mkor a chad er a ngodech el beluu ma lechub e mdengdengechel chad; kom mocha osisiu el chad er a chimol beluu kemiu ma re chedal a Dios e chad er a telungalek er a Dios. 20Kom dirrek el kor a blai el dechor er a omekedecheraol el lulleketek er ngii a re apostol ma re profet el sel mesisiich el bad el lorreked er ngii el rokir a Kristus Jesus, el di ngii el tang. 21Ngii ngikel orreked er a blai el oldak er ngii e meleketek er ngii el mo cherrungel el chedaol templo el ileakl el kirel a Rubak. 22Me sel cho bereked er ngii, e kemiu me tirkel rokui el bebil er a re chad a mo dmak el mo chimol blai el le kiei er ngii a Chedaol Reng er a Dios.

will be added

X\