EFESUS 1

1Ngak el Paulus, el mle soal a Dios a bo ktar a apostol er a Kristus Jesus— A meluches el mor a re chedal a Dios el ngar a Efesus, el kerekikl el omtebechel a klengar er tir el bereked er a Kristus Jesus: 2A Dios el Demad ma Rubak el Jesus Kristus le beskemiu a krasia ma budech. 3Kede oldanges er a Dios el Demal a Jesus Kristus el Rubak er kid! Ng kid el chedal a Kristus a uchul me ng mla omekngeltengat er kid er a ikel rokui el klengeltengat er a reng el ngar a beluu er a eanged. 4A mera er ngii a kmo a uchei er a lobeob a beluulchad, e a Dios a mla ngiltid el mo chedal el oeak a deleuill er kid ma Kristus, me bo de chedaol el diak a telemelled er medal. Ng bltkil a rengul a uchul 5e a Dios a di mla tibir er a rengul el kmo ng mo oeak a Jesus Kristus e rullid el mo ngelekel; tia telbilel el mle soal a bo le ua isei. 6Doldanges er a Dios el kirel a kmal klou el krasia el lulechotii er kid el oeak a betik er a rengul el Ngelekel. 7Ng ngii a uchul olbeteled el okiu a uldersel a klengar er a Kristus el belkul a kmo, a kngtid a mla musubes. Ng meral kmal ungil a krasia er a Dios 8el mler kid el kmal diak a delbedebelel. Ngii el mellomes a rengul e ungil medenge rokui el tekoi a uchul ma 9Dios a riruul a ikel lulemdasu, e mileketeklii el mer kid a berrotel el uldesuel el bla le tibir er a rengul el mo oltaut el oeak a Kristus. 10Tiaikid el uldasu, el bo loltaut er ngii a Dios sel bo le belsechel, a mo oldak a ikel rokui el mle duubech el ngar a eanged ma beluulchad, e a Kristus a mo bdelul. 11A rokui el tekoi a meruul el oltirakl er a uldesuel ma telbilel a rengul a Dios; e a Dios a millilt er kid el mo chedal el oeak a deleuill er kid ma Kristus el oltirakl er a uldesuel, el ultuil er a ikel telbilel a rengul er a kot el uchul. 12Mada kid, el mle kot el mo melatk e mengiil er a Kristus, doldanges er a klebkellel a Dios! 13Me kemiu me kom dirrek el mlo chedal a Dios er ser a cho mrengesii a meral osisechakl el sel Ungil Chais el ulsebelemiu. Kom mlo oumerang er a Kristus, ma Dios a lilia olengchelel er kemiu el kmo kom chedal er a le beskemiu a Chedaol Reng el ua ikel le dilung. 14Kid el mla nguu a Chedaol Reng a uchul me kede ulterekokl el mo nguu sel le tilbir a Dios el kmo ng mo mesterir a re chedal, e tia ia uchul ma Dios a ulterekokl el mo rulleterir a re chedal el mo diak a le rrengodel er ngii. Doldanges er a klebkellel! 15Tiaikid a uchul, me ser a kkot el mo orrenges chisel a kmo kom mla mo oumera er a Rubak el Jesus ma chisel a bltkil a rengmiu el mor a rokui el chedal a Dios el mer chelechang, 16e ng dirkak kmekimd el mereng a sulel a Dios el kiriu. Ak melatk er kemiu er a nglunguchek, 17e olengit er a Dios er a Rubak el Jesus Kristus, el chetengakl el Chedam, me le beskemiu a Chedaol Reng er ngii, el mo omekllomes a rengmiu e ochotii a Dios er kemiu, me bo modengelii. 18Ak ulengit me lobok a medal a rengmiu el mesa llemesel, me bo modengelii sel omelatk el luleba el lomekedo er kemiu, ng ua ngeral kmal ungil klengeltengat el telbilel el mor a re chedal, 19ma kmal klou el klisiich el oureor er a chelsed kid el oumerang. Tiaikid el klisiich el oureor er a chelsed a osisiu ngii me sel klou el klisiich 20el luluusbech er ngii er a lokisii a Kristus er a kodall e lokedengcheklii er a kadekmel er a eanged. 21A Kristus a mengedereder er a eanged el ngar bab er a rokui el mengedereder er a melidiul, ma rulab a klisiich ma re ngar a deruchall, ma omerreder, ma re merreder; e telechull er a dui el kuk ngarbab er a rokui el dui er a klisichel omerreder er tial beluulchad me sel mei. 22A Dios a ngila rokui el tekoi el locha er eungel ochil a Kristus e ulterekeklii er a ikelesia el kot el ngarbab el Rubak el merreder a rokui el tekoi. 23A ikelesia a bedengel a Kristus, el cherrengelel ngikel mengerrungel a rokui el tekoi er ker me ker.

will be added

X\